1 Kǝthlǝm ndaˈan chaɗi thlǝ nech chakan me yowuna kǝ nden wa mban hǝraˈtiyo sǝ wa, chika wun nako. Kǝɗ ǝnɗi natu chakan mee yowuna, tǝ nen chakan mee indiˈyo. Kǝthlǝm chaɗi thlǝ nech naa ǝnɗi chit yowun naa ndǝɗwa wa, ndaˈan paɗ thlǝ natu thlǝnanda. 2 Sǝn mǝn tǝ ndat wa chak meˈi Farta keˈkeˈ si kǝ ɗar fee thlǝ nech thlǝnandǝ ichiɗiya. 3 Chǝ nefa, chaɗi thlǝ nech naa ǝnɗi ha sǝɓandǝ nafchǝɗi thlǝ nech chit kǝɗu, chǝ tǝ indiyo thlǝ thlǝnancho, chuchan fǝ wa no hǝraˈta tǝ chak meˈi Farta wa? 4 Ndu paɗ tǝ nen njir tertǝ kaakǝti Farta wa, tǝ kǝris ǝn ˈyan, tǝ kumi wesha sǝɓtǝ hwira thla thlǝ chitǝn kaf ˈyo yu? Awi shinwen tǝ ndat wa, saktǝ kaakǝti Farta ndaˈan nech kaɓwech kǝ tǝrtǝ ha wa?

5 Kǝɗu tǝmɗi kwaˈkwaˈ tǝ inda thlǝ natu chita, tǝ kwaˈkwaˈ tǝ wanɗǝkaɗaɗi nech siyo, tǝ nen nggoman indiyo sǝɓtǝ hwiri Farta, thla nech pǝkwechi, fartǝ sǝɓtǝ hwiri Farta. Ə wanshengǝn ini, naa fee pǝn chakmeˈyan thla kǝmchǝ si. 6 Farta "Nech tiyan chika wuni kǝnau tarchǝɗi thlǝnandǝn kaɗi." 7 Nan fǝr shishingnda thla nech tarat ha kǝ poriˈ, kǝmɗi fee kǝrischa tǝ thlǝnandǝ kwastǝ ichiɗi nech ndiˈchan, nakandǝ kaa maanda, tǝ kapakǝta tǝ tarat ha. 8 Tǝ kǝɗu fee nech tǝ yah indǝf kaan, nakandǝ kar kittaˈan, hatǝ hwiri Farta, nan choktǝ fiyanda. Na Farta ɓahandata. 9 Nat pong nefa thla thlǝ thlǝnanchǝ ɓǝɓifata nan sa mɓahta, nan sa nggwarkana. Nech fee tǝrkwathl kanan tǝ Yahudawecha, kǝna ɓat kǝ pong nafcha. 10 Na Farta fǝr kapa kǝta tǝ maanda, tǝ kǝɓikaɗi kǝmɗi fee thlǝ chich kaa ǝna, tǝrkwathl kanan tǝ Yahudawecha kǝna ɓat kǝ pong nafcha. 11 Kǝthlǝm Farta pǝnwa yahˈinda wa.

12 Nat fee chich ɓǝɓifata ngga ɓukwa tǝ sǝn kusiˈ wa, nandǝ tǝktǝkaɗi ngga nat tǝ kusiˈtaˈan wa. Kǝɗu nat fee chich ɓǝɓifata hur sǝn kusiˈ, naa fee chakanda mee tǝ kusiˈ. 13 Kǝthlǝm ngga fee sǝkchǝ kusiˈtaˈan nech chokta kǝ chǝɗchǝɗ chaˈan pangngǝn Farta wa. Kǝɗu fee thlǝnanchǝ ǝnɗi mbuˈtǝ kusiˈ taˈan fen naa fee hǝraˈndata 14 (Ma pong nafcha fee nawak tǝ kusiˈtaˈan ˈyandǝ si, pǝnandak fatˈyandǝs wa chǝndǝ ǝnɗi nda kusiˈ kaɗi. Thleya pinchan wa, fen tǝ indiyanda chokchandǝ kǝ kusiˈ tǝ ˈyi indiyanda. Chika mǝ nakan wa ǝ kusiˈ ˈyandǝs wa. 15 Tar chiyanda ǝ pin wa, ǝnɗi mbuˈtǝ kusiˈ nechan kǝ yaraɗan hur wanɗǝkaɗech yanda. Kaɗatˈyanda mǝthlan mbuˈtǝ wa nechan kǝɗu. Kaɗatˈyanda nda ndat wa ǝ chindǝ ɓǝɓifata. Fartǝ yowuna thlǝ nechan nda ndat wa ǝnɗi chit nda keˈkeˈ si.) 16 Ə fartǝɗiya Farta, nan chakan mee pong nafcha, kǝ ichiɗi thlǝ thlǝnandǝ ndǝ nda tǝ wuɓtǝfa, tǝmɗi Yesu Kǝristi, kǝ kusheˈtǝ kwastǝ ndiktǝ mbinchan ˈyi sǝkta thla natǝn ɓassa.

17 Kǝɗu ma ndiin wa thlǝ Yahudawat nako, tǝ ndat wa ɗǝfcho fat kǝ kusiˈ, saɓ chǝ thlaˈndǝ kirsha tǝ Farta, 18 Ma, shinin ǝnɗi yahtǝn paɗ shinin mban chakandǝ ichiɗi ha nech ndiˈchan, kǝthlǝm ǝ chaˈuchǝ kusiˈ har. 19 Paɗ ǝ wathluchǝ wa chǝ nech kǝ thlǝ kǝs kalati komincha, chǝ ɗaˈkǝta thla thlǝ pǝnchǝ mǝta kǝmɗi fee nech hur wuthla, 20 thla thlǝ chaˈan chǝ mɓamchǝ har, thla thlǝ chaˈanchǝ nafchǝ har nech kǝ yuwa tǝrtǝ ha, kǝthlǝm hur kusiˈ, hur indiyosi ˈyi sǝnda tǝ sǝnda ˈyi kittaˈan. 21 Kǝɗu, chaɗi thlǝ nech chaˈandǝ nafchǝ har nggo mbahǝn chaˈan tǝ indiyo har wa? Chiɗi thlǝ ɓascha wa mǝ yarkǝ fee wa, chaɗana yerkǝwen wa? 22 Chaɗi thlǝndech wa kǝ chinfe fǝlaukǝta wa, chaɗan chiwen wa? chaɗi thlǝnech wiɗek tar nɗǝhacha, yerkǝwen hur kǝtǝn nɗǝhachawa? 23 Chaɗi thlǝ nech tarakta tǝ kusiˈ, awi, ngga tǝthl nen njir Farta, tǝ chendǝ kusiˈ kaɗ wa? 24 Kǝɗ ǝnɗi natǝn kǝ yaraɗan laulawaɗan, "Thlǝ nech fee njirandǝ thlǝm Farta kaɗi hur pong nafcha kǝthlǝm kun."

25 Kittaˈan hecheta kaa ǝna, ma thlǝ parecho kusiˈ. Kǝɗu ma thlǝ perewen kusiˈchaˈan wa, hechetˈyo ngga nechan meeˈi ǝna wa. 26 Paɗ ma nafɗi hechawakcha thlǝ perechan ichiɗi nda kusiˈ, nǝ fee tǝr ndi kǝɗ thla hechandǝ fee wa? 27 Awi thla hechawakcha mǝthlan para kusiˈ, pǝɗan tǝ thla ha hechecha mǝthlan para kusiˈtaˈanwa.

28 Nefa ngga thlǝ Yahudawata wa kǝthlǝm nat ǝ chimanda ndu ndat wa ǝ hechan fee hur fata wa. 29 Auwa, nefa thla nech kǝ thlǝ Yahudawata nechan hur wanɗǝkaɗata, hechata ˈyi kit ndaˈan nechan kǝ hechata hur wanɗǝkaɗta tǝmɗi Shemeta ngga tǝmɗi yara kusiˈ wa. Weˈtǝ nef ini Farta, thlǝ nech chim anchi, ngga wanpong nefa wa.