1 Mǝ nech kǝ ndat wa thlǝ Yahudawata nako? Ai chekti hecheta? 2 Aa, chektǝ si chik tǝ yen mbenna. Tǝrkwathl kanan, Yahudawecha fen fǝranda Farta ndiktiyan kǝ harˈyanda.

3 Hacha, ma fowunsi hurnada pǝnwakchǝ kumi fǝr kit kǝni? Mǝ nech kǝ saktǝ ǝnɗiya? Kǝthlǝm kumi kaakǝt ˈyanda nan ɗǝf Farta kǝ wulantǝ ndiiɗa ndǝ kaakǝt ˈyan ha hacha wa? 4 Ngga kǝɗu wa. chika ngguɗyah. Malan kǝ sǝn fee wa Farta mǝthlan nech tǝ kit fa chika mǝ nakan wa chika wun nefa thlǝ lektǝ nakan. Kǝɗ ǝnɗi natǝn kǝ yaraɗan hur laulawaɗan ndat wa.

"Nɗiktiˈyo kitsi,

Paɗ ǝ thlǝ thlǝn pang kǝˈin kǝ ɓǝra chika mii, ma tǝn fee tawus ǝna chit ˈyo."

5 Kǝɗu ma kumi kaakǝt ˈyamǝn nech pǝn kafati Farta hayang, mǝ natmǝn ndata? Namǝn ndat wa, nga Farta thlǝ kafata wa, ma fǝramǝn tǝ ɓahta? "Tǝni fǝr kaɗanan ha ndak." 6 Auwa, nga kǝɗu wa. Ma kǝɗuyu wa, tǝkǝni naa Farta chakan me heshi? 7 Ma kumi fǝr kit inchi tǝ lektinchi, Kittaˈan i Farta mǝthlan chekandǝ pǝn fata, saɓ chekan kan fǝran maanda, kǝthlǝm mi naa fee kǝnita kǝ ɗar ndat wa, nggǝt thlǝ ɓǝɓifata? 8 Ma kǝɗu yuwa, mǝ nawak tǝ mǝn ɗǝt kǝ pang tǝ chit ɓǝɓi tarchaˈan, kǝthlǝm kǝ ɓǝ kaa ǝn hacha wa? kǝɗ ǝnɗi thlǝ naa fowun leka ǝn ndǝ kafa tǝ ndat wa, thlǝ mbuˈchaˈan kǝɗu. Chak mii ɗi naa fee chanda weˈtǝ feya keˈkeˈ si.

9 Mǝ nat ǝn mbuˈta? Nggaˈan Yahudawecha ǝ mbraˈǝn takǝchaˈan ha wa? Auwa, chika top kǝɗa. Kǝthlǝm ɗǝfa ǝn Yahudawech tǝ pong nafcha ndat wa sǝɓandǝ kaɗi, ndat wa nat nda ɓǝɓifat nech chit alkǝt tǝ tanda. 10 Kǝɗ thla natǝn kǝ yaraɗan hur ndikti Farta tǝ ndat wa.

"Yowun si nech tǝ kafat fa wa,

neˈsǝ wa, chika arta.

11 Yowun si thlǝ wathlandǝ ǝna wa,

yowun si thlǝ kech Farta wa.

12 Nat nda ɗafǝrndǝ kaɗi, kang kangndǝ kirshi Farta fa,

Yowun si thlǝ nech thlǝnandǝ kafata wa,

yowun si wa, chika arta."

13 "Nggor nggorech ˈyanda kǝɗ kwi mǝrcha thla nech cha.

Tarchi wan shenuˈchi yanda ndaˈan nech kǝ tar lek nafcha."

"Ya hafchisi hur kǝsǝmǝn michi yanda."

14 "Michi yanda ndiiɗ kaɗ tǝ ɓǝɓǝ mee tǝ ˈyara fata."

15 "Thlǝ weshachandǝ ha tǝ thlǝrandǝ fer kaɗi,

16 Nat mǝɗi parat nda, chat tǝktǝkaɗi tǝ sǝɓtǝ hwira.

17 Paɗ sǝn wandǝ mban kǝɓikaɗ wa."

18 "Kwarandǝ Fartǝs ǝ wenitanda wa."

19 Nakanya sǝnmǝn tǝ ndat wa nat ǝnɗi thlǝ mbuˈtǝ kusiˈ, tǝn mbuˈandǝ fee nech kan ɗukwatˈyan. Kǝthlǝm kǝ nggǝlan fee meˈi chika wuni, paɗ nat nafchi heshi kǝ sǝnda wa, nechan kan ɗukwati chak meˈi Farta. 20 Tǝ mban para ǝnɗi nda kusiˈ wa kǝ chǝ fee, yowun si nech chok tǝ chǝɗchǝɗ kǝtfa panggǝn Farta wa. Ənɗi thlǝ chit kusiˈ taˈan kǝ pǝnan tǝ nef ɓǝɓifatˈyan.

21 Kǝɗu nakanya ǝ pǝn fee yowun mbanda ˈYi mbǝs kafata ǝ panggǝn Farta. Ngga tǝmɗi kusiˈ wa, chika nakan wa kusiˈ tǝ fee thlǝ ndikcha tǝ yahti Farta, fǝr ndǝ sǝnansi kǝ ndaˈan. 22 Kafaɗiya i Farta, thlǝ mbǝs chǝ fee tǝmɗi fǝr kit, hur Yesu Kǝristi. Kafaɗiya ˈYi nat nafcha fee fǝr chǝ kit, nggǝ ndat sǝ wa thlǝ Yahudawata samǝn ha tǝ pong nefa wa, 23 Kǝthlǝm nat nafcha ǝ chindǝ ɓǝɓifata, paɗ ǝ wulandech saˈ tǝ kǝ naa maandi Farta. 24 Kǝɗu kǝ ɓǝra kaakǝt ɗi chaa ndǝ Farta chika wuni pafǝn, chika wuni mbǝstǝ chokta ˈYi kumi sǝɓandǝ ǝn kaɗi pangngǝn Farta tǝmɗi Kǝristi Yesu. 25 Farta fǝr chan Yesu kǝ chok kǝnau pafǝn, ˈYi tǝr heˈti ɓǝɓifechˈyamǝn, kǝthlǝm tǝmɗi ferˈyan, fǝr pafǝnˈyan nan kalandǝ nafchǝ ɓǝɓifech ˈyandǝ ha, tǝmɗi fǝr kitˈyanda. Chich Farta thleya kǝthlǝm kǝ pǝn tǝ kafatˈyan, kǝthlǝm choh hur kǝris ǝn ˈyan, tǝran kan chimandǝ kaɗi ǝ ɓǝɓifechiɗi chit fee. 26 Kǝɗuyu Farta pǝntǝ kafatˈyan ǝ wan shengngǝnɗiya, kǝthlǝm mǝthlan tǝ indiyan thlǝ kafat nakan, paɗ thlǝ ɗǝf chan nat thla thlǝ fǝrchǝ kit kǝ Yesu, kǝ mbǝs tǝ chok sǝɓa waktǝˈǝn kaɗi ǝ pangngǝn Farta.

27 Ma Kǝɗuyu, kǝ mǝ natmǝn nat thlaˈandǝ kirsha? Ə mban thlaˈandǝ kirshawa. Tǝ yen mbenna mbǝhandǝ fee kaɗi, tǝmɗi chit tar chiɗi mbuˈtǝ kusiˈ yi Musa wa ngga kǝɗu wa, tǝmɗi fǝr kit ndak. 28 Kǝthlǝm ǝ nggǝmamǝn tǝ ndat wa tǝmɗi fǝr kit, thlǝ mbǝstǝ fee chok ta kǝ thlǝ sǝɓawaktǝ kaɗi ǝ pangngǝn Farta, ngga wa tǝmɗi chit tar kusiˈ yi Musa wa. 29 Ndu Farta, Farta Yahudawech ndak wa? Auwa, ngga ˈYi nafcha fee nawak chǝ kǝ Yahudawecha wa? Kittaˈan Farta i pong nafchǝ nakan paɗ. 30 Farta arta. Nan ɗǝf fǝ hechecha kǝ mbǝs ndǝ chok ta kǝ fee sǝɓawakchǝ ǝn kaɗi kafˈyan tǝmɗi fǝrkit, kǝɗu paɗ fee hechewakcha nan ndǝ mbǝs chokta kǝ fee sǝɓawak chǝ ǝn kaɗi ǝ pangngǝnan tǝmɗi fǝrkit. 31 Hachaa, tǝ mbǝhamǝn kusiˈ kaɗi kǝthlǝm fǝrkit tǝɗiya wa? Chika ngguɗyeh. Kǝ kwar ndaˈan, nggǝmǝn wathlandǝ kusiˈtaˈan ha.