1 Ma kǝɗu, mǝ nat mǝn ndat hacha? Namǝn ɗit kǝ pang tǝ nat ha hur ɓǝɓifata kǝthlǝm kǝ chek kaakǝ ti Farta wa? 2 Ngga kǝɗu wa. chika ngguɗyah. Ai tapi mǝrmǝn kǝ ɓǝɓifata. Mǝchicha nat mǝn ɗǝt kǝ pangga tǝ nat ha hur ɓǝɓifata? 3 Awi sǝn wowun wa nat nggǝmǝn tǝɗi chamǝndǝ fee Baptisma kǝ hur Kǝristi Yesu, chamǝnchǝ fee Baptisma kǝ hur mǝrtiˈyan hacha wa? 4 Ndat wa, tǝmɗi Baptisma ˈyamǝn tǝ thlohaminchǝ fee ɓukwa tǝ anchi, chok mǝn paɗ arta tǝ anchi hur mǝrtiyan, kǝthlǝm kǝɗ ǝnɗi thlaˈandǝ fee Kǝristi thlaˈtǝ hur mǝmatecha tǝmɗi alkǝti thlǝ maanda Chinda, Kǝɗu paɗ nggǝmǝn kǝ chokmǝn kǝ yuwa nat ha.

5 Kǝthlǝm kǝɗ nakan wa chokmǝn arta tǝ anchi hur weˈtǝ mǝrtiyan, nggǝ tutǝs wa namǝn choktǝ arta tǝ anchi hur thlaˈtiyan thlaˈtǝ hur mǝmatecha kǝɗu paɗ naafe thlaˈamǝnda. 6 Sǝn mǝn paɗ tǝ ndat wa ǝ kukwan fee teri fechˈyamǝn ˈyi choh ɓukwa tǝ anchi, kǝthlǝm kǝ mbǝhan fee alkǝti ɓǝɓifaɗi kaɗi nech hur fatˈyamǝn. chich fee kǝɗu kǝthlǝm mǝ nggǝrmǝn chok ta kǝ mafechi ɓǝɓifata wa. 7 Kǝthlǝm ma ǝ mǝr nefa, ǝ mbǝstǝ chok indiyan thlaˈta ǝ alkǝti ɓǝɓifat hacha.

8 Ma tapi mǝrmǝn ɓukwa tǝ Kǝristi, fǝrmǝn kit wa namǝn nat ha ɓukwa tǝ anchi paɗ. 9 Kǝthlǝm ǝ sǝn mǝn si tǝ ndat wa ǝ thlaˈan fee Kǝristi thlaˈtǝ hur mǝmatecha, paɗ nggech nggǝr tam mǝrwa wa, ndat wa, mǝrta peˈwu alkǝtˈyansi kǝ indiyan wa. 10 Mǝrtǝɗiˈyan chitǝn ya, mǝrchan kaɗ artǝ ndak chektaˈan sǝ wa kǝthlǝm kǝ chen tǝ alkǝti ɓǝɓifat kaɗi. Kǝɗu naɗi ha natǝn chit nakanya, nechan ha kǝ thlǝrɗaktǝ tǝ Farta.

11 Kǝɗuyu kun paɗ kǝ tǝr wun inchiyowun kǝɗ mǝrcha kǝ alkǝti ɓǝɓifata. Nakanya fee naa natˈyandǝha kǝ Farta, tǝmɗi Kǝristi Yesu. 12 Kǝthlǝm ndaˈan kǝ nggǝm wun fa ɓǝɓifat kǝ chit kuturakta hur faɗowun ˈyi thla nech mǝrtǝ kaɗ wa, kǝ ɗǝftǝ wunchi kǝ ɓǝɓi yahti wanfata wa. 13 Kǝ panawun tangathlech ˈyowunha kǝ ɓǝɓifata wa, paɗ kǝ chok ndǝ kǝ ǝna tarchi kumi kaakǝta wa. Kǝɗu taˈan kǝ fǝr wun inchiyowun kǝmɗi Farta, kǝɗ ǝnɗi kǝmchǝsi kǝd fee ɓǝtandǝ fee tandǝ kesh hari mǝrta kǝ mbǝs shishingnda, paɗ kǝ panawun tangathlechˈyowun ha kǝmɗi Farta, kǝthlǝm kǝ chok ndǝ kǝ ǝna tarcha ˈyi tar kaakǝta. 14 Kǝthlǝm ɓǝɓifata nech chit kuturakta kǝ indiyowun wa, kǝɗ thlǝ nakan wa ngga nechanwun fǝl kusiˈ nat wun wa, paɗ fǝl kaakǝti Farta.

15 Mǝ paɗi? Ndat wa, namǝn nɗǝt kǝ npang tǝ ɓǝɓifata nakan wa ngga nechamǝn fǝl kusiˈ wa kǝɗu ǝ kaakǝti Farta wa? Auwa. Chika ngguɗeyh. 16 Sǝn wowun wa ma fǝr wun inchi yowun kǝthlǝm kǝ chok wun kǝ fee thlǝ fǝran chǝ maandǝ yowuna, chok wun kǝ mafech hacha ǝ hari thla thlǝ fǝrandǝ wun maanan wa. Thlǝ mbahǝn chowun chok ta kǝ mafechi ɓǝɓifata, thla thlǝ saˈchǝ kǝ mǝrta, ndu paɗ mafechi maanda kǝmɗi Farta, thla thlǝ saˈchǝ kǝmɗi kaakǝta. 17 Kǝɗu usoko kǝ wathl ha kǝmɗi Farta, kǝthlǝm chika nakan wa choh kun mafechi ɓǝɓifata, kǝɗu nakan kǝɗaya thlǝ fǝr chowun maanda nat tǝ wanɗǝkaɗech yowun hur kit tǝɗi chaˈowundǝ fee har thla thlǝtwun. 18 Ə hǝraˈowun chǝ fee hur ɓǝɓifata, kuɗu paɗ chokko wun kǝ mafechi kaakǝta.

19 Thlǝ nechi ndikta tǝ wunchi kǝɗ ǝnɗi thlǝ ndiktǝ pong nefa, kǝthlǝm wulandǝ sǝn ǝnˈyowun yi tar fata. Kǝɗ thla choh fǝr tǝwun tanggathla fech ˈyowun kǝ mafechǝ tǝkǝmǝn icha tǝ ɓǝɓifata, tǝ paɗ, tǝ kumǝ fǝr maanda thla thlǝ nech chektǝ kǝɗu. Nakanya kǝɗu paɗ fǝram tanggathla fech ˈyowun kǝ mafakǝti kaakǝta, kǝthlǝm kǝ chok wun kǝ fee sǝsandǝ fee tǝ chǝdchǝɗ kǝta kǝ Farta. 20 Ə wanshengngǝn ɗi nat wun kǝ mafechi ɓǝɓifata, kǝmowun wu ǝn tǝ kaakǝta wa. 21 Mǝ nech kǝ ǝna chekta mbǝstǝ wun hur ichiɗi nakanya chokowunchǝf kǝ ǝna har tǝ fata? Ai, kǝnau ichiɗi enya mǝrta. 22 Kǝɗu nakanya ǝ hǝraˈowun chǝ fee ǝ hur ɓǝɓifata, chokkowun paɗ kǝ mafechi Farta. Chektǝ ɗi mbǝstǝ wun thlaˈtǝ ǝ thleya ndaˈan ɗich tǝ wunchi kǝ nat ha thla nech chǝdchǝɗ, thla paɗ thlǝ nggǝtowun chǝ shishingndǝ si thla kǝ poriˈ 23 Kǝthlǝm kǝnau ɓǝɓifata ndaˈan nech kǝ mǝrta, kǝɗu pafǝn i Farta ndaˈan nech kǝ shishingnda thla kǝ poriˈ tǝmɗi Chinmǝn Yesu Kǝristi.