1 Wanmanchina hǝssa tǝ nǝssa sǝnwowun wa? Kǝthlǝm nechi shenuˈta tǝ fee sinchǝ kusiˈ. Ndatwa kusiˈ tǝɗiya nechan tǝ alkǝtfa fi nefa ma peˈ tǝ shishingndǝf ndak. 2 Saktaˈan, nunefa thla nech kǝndi chimaɗan. Kusiˈ kǝnanchi ha fi chimaɗan ma peˈ ha tǝ shishingndǝ fa. Kǝɗu ma ǝ mǝr chimaɗan mbǝstǝ chok indiyan ǝ chaˈaɗi kǝnanchǝha kafi chimaɗan. 3 Kǝthlǝm ndaˈan ma chok tǝ yowun hǝsnef samǝn, ma peˈ chǝmaɗan ha, nech fee ˈyaˈan chǝ wa fǝlau. Kǝɗu ma ǝ mǝr chimaɗan mbǝstǝ chokta ˈYi indiyan hacha kǝɗ ǝnɗi chaˈandǝ kusiˈ kaɗi kǝ ɗar kǝn reta. Ma paɗ nggǝrtǝ kǝn ret tǝ yowun samǝn, ngga tǝn chit fǝlaukǝta wa.

4 Kǝɗu wanmanchina, saktaˈan tǝɗiya nechan kǝ kun. Tǝmɗi wumowunda tǝ fati Kǝristi chok wun kǝ mǝmatecha tǝ alkǝti kusiˈ, kǝthlǝm kǝ chok wun kǝ ˈyaˈan, ndat wa ˈYi thla thlaˈandǝ fee hur mǝmatecha, kǝthlǝm kǝ chǝmǝn tarchiɗǝ nech ndiˈchan kǝmɗi Farta. 5 Thlǝhaɗi natmǝn nat ha hur tar fata, faɗi ˈyamǝn thlǝ yahchǝ chit tar ɓǝɓifata, thleˈ kaˈan kǝthlǝm kusiˈ nɗǝfchǝndǝsi. Nat ǝchiɗiya thlǝ natmǝn chit ya thlǝ nɗichan tǝ mǝnchi kǝ mǝrta ndak. 6 Nakanya hǝraˈmǝn tǝ kusiˈ ǝ Musa, mǝrmǝn kǝ ɓǝra ichidi kǝnamǝncha. Kǝ thlǝm kǝ manamǝn Farta hur yuwa shishingnda tǝ shemeta nga tǝ ɗoh tǝ kusiˈ tǝɗawa.

7 Nechamǝn ndat wa kǝni? kusiˈ ɓǝɓǝfatawa? ngeng chok kǝɗuwa. paɗ chǝk kǝɗu, kǝthlǝm kusiˈ chich kǝ sǝni ɓǝɓǝfata. Ma ndawu kusiˈ taˈan wa, "Kǝ yehǝn ǝni nefawa," mǝ sǝnwi yah ǝni nefa wa. 8 Paɗ ɓǝɓǝfata mbǝstǝ mbanda tǝmɗi kusiˈ, ɓakan tǝ yah ichi samǝn samǝn hur wanɗǝˈkaɗatinchi, kǝthlǝm mannga kǝ kusiˈ ǝ Musa wa, ɓǝɓǝfata nechan kǝ mǝrta. 9 Choh tǝɗi sǝnwaktǝ kusiˈ, ngǝt tǝ shishingdǝfa, ɓak kusiˈ tǝɗaa, nak ɓǝɓǝfat tǝ shishingndǝfa, mǝrki kaɗi. 10 Kǝthlǝm ndaˈan Kusiˈ tǝdi fǝrtife kǝthlǝm kǝ ɓǝtǝ shishingnda, ǝ mǝɗǝnchi ɓǝtǝ mǝrta. 11 Ɓǝɓǝfata mbǝs tǝ mbanda tǝmɗi kusiˈ tǝɗaa, lǝmkan nenchi, tǝmɗiyan paɗ ɓǝlikan. 12 Kǝthlǝm kǝt ndaˈan kusiˈ tǝ indiyan nechan chǝɗchǝɗ, chaˈanan kaɗ paɗ nechan chǝɗchǝɗ, ɓǝɓi fatsǝ huran wa, paɗ ndǝˈchan si.

13 Nakanya, ni ndat wa ǝnɗi nech ndiˈchan nan ɓi mǝrtǝ hacha wa? Auwa, nen chǝ kǝɗu wa. Ɓǝɓifat ɓech tǝ mǝrta, tǝmɗi chǝt ter tǝ ǝnɗi nech ndiˈchan ɓakan mǝrta kǝthlǝm pǝntǝ indiyan ndat wa ɓǝɓifat nakan, tǝmɗi chaˈanan kaɗ paɗ, ɓǝɓifata pǝntǝ chok ndiiɗ ˈyan ha kǝ thlǝ ɓǝɓifat kaan.

14 Sǝnmǝnwa kusiˈ kusheˈti shemeta. Paɗ ngǝt hur fata, mafatǝ ɓǝɓǝfat ndak naki. 15 Sǝnwi ǝnɗi thlǝ chitiwa. Kǝthlǝm ichiɗi yahti kǝthl thlǝnani kaɗi, nga ndaan thlǝ chǝtiwa, ǝnɗi karti, ndaan ndak thlǝ chiti. 16 Ma thlǝ thlǝnani inɗi yahwakti chǝta, ngimani hachawa kusiˈ ǝn ndǝˈchan. 17 Nakanya hach nga ngǝt thlǝ chich ichǝ nɗawa, ɓǝɓifaɗi chokchǝha hwǝrinchi. 18 Sǝninchiswa nga ǝn ndǝˈchan nech finchǝwa, ndat wa hur tar fatǝnchi. Kǝthlǝm yahǝnchǝs kǝ thlǝnani ǝnɗi kaɗ nech ndiˈchan paɗ mɓahǝnwi thlǝna ndawa. 19 Ənɗi nech ndiˈchan thla yahti kǝ chi, nga ndaan thlǝ chitiwa. Nakan sǝɓtǝ ǝnɗi nawakchǝ ndiˈchan thla yahwaktisi kǝ chi, ndaan thlǝ nati chita. 20 Ma ngǝt chit ǝnɗi yahwakti kǝ chi, nga gǝt thlǝ chichawa, ɓǝɓifaɗi nech hur wanɗǝ kaɗatinchi thlǝ chicha.

21 Kǝthlǝm ndaˈan, sǝnninchiwa, chokchan kǝ kusiˈ, nat fartǝɗi yahti chǝt ǝnɗi nech ndiˈchan, thlǝ nechi indinchi chit ǝnɗi nawak chi ndiˈchan. 22 Hur wandǝ kaɗatinchi nakanya, ngǝminchi kusiˈ ǝ Farta fa. 23 Paɗ ngǝt naa kusiˈ samǝn, thla nech hur tangathlechinchi thla nech yanda tǝ kusiˈ tǝɗi nech hur wandǝ kadatichi chikan kǝ mafati ɓǝɓǝfata thla nech chit ter tǝ tangathlechi fatinchi. 24 Ai inchi. wun nech hǝraˈita hur faɗinchiya thla nech mǝrtǝ kaɗi? 25 Usoko kǝmɗi Farta, tǝmɗi chinmǝn Yesu Kǝristi. Kǝthlǝm ndaˈan ngǝt tǝ indinchi ni manani kusiˈ ǝ Farta tǝ wanɗǝ kaɗatinchi, paɗ tǝ fatinchi ngǝt manandǝ kusiˈ i ɓǝɓǝfata.