1 ሳብካ ክክን የካ ፍግዝድባብ ዎ ማቻንከካ የ ተያንደትም ሳብታ ዉች እምንተን ዉችኩን Ꮊይ ነክሰቴ ጋይሶቶ የም ምግዝዶቴ። 2 ሳብ፥

"ሶልምምሳንደት ሰጨንካ የዝደር ኤሰርሳቴ!

አቅንታ ሰጨንከረ የስም አልሳቴ!" ጋይድንኦል፥

"ይና ሶልምምሳን ሰጨና ታዬ፥ አቅንተንታ ሰጨነረ ታዬ"።✝6፡2 ኢሳ. 49፡8።

3 ዎንታ ፍክስና ይንኤርምዳክንግንዳ Ꮊረሰን ሪከረ Ꮊየን ካንታ ኮተርስባብ ማታዮቴ። 4 ስግስሰረ ማጠንምኬ ዘረም ገቅርካ ኦይምመረ ዳንዳኤሮቶ ሳብታ ፍክስንባብከስግንዳ ዎንታ ማተንም Ꮊምንጎግከረ ግግዝዶቴ። 5 ሳብታ ፍክስንባብ ዎንታ ማትንተንም ዎ መያ ማዝድንደረ Ꮊርድርካ፥ ዞክርካ፥ አዉልካ፥ ፍክስካ ጋፍካ፥ ግንአክሳ ነግንካ ዳቅርኬ፥✝6፡5 ኦይት. ፍ. 16፡23። 6 ኮትኮግንደረ ጭለጭልኬ፥ ኤሰካ፥ ዳንዳእካ ጋይንተካ፥ ላቅም ኤድ ማትንተካ፥ አያን ጭልንካ ጎርስምኬ አፈካ ገስ ካየንደት ሶልመካ፥ 7 ዶፈን ቃለንኬ ሳብታ ዎልቀንካ ኦስ ዎ ካይዝድንደረ ማታ ዎንዘን የልዳክንግንዳ ዎ ማርድንዳ ዎንታ ዳምንደና ጭለትቼኔ፥ 8 ቦንቻ ካንታናንከረ የላካንታ ዳቅልካ ከዝር ካንተረ ማታ አነረ ቦንችምካንታ ዎታ ግግምስባቦቴ፥ ዶፈንንከስ ዎ ናና፥ ገስንባብከስ ጋይምሶቴ። 9 ኤስምስባቦት ናና ኤስማክባብከስ ማቾቴ፥ ደእተኬ ዎም ጋይድንካ፥ ሰንፔካ ማትሶ Ꮊፈርዶቴ፥ ዎ ጉጰርስንከረ ደአኮቴ፥ 10 ሞርእ ዎም የልሰረ ሙዳᎺይካ ጉርምዶቴ፥ ሪካየንባብከስ ማትሶ ዎ ዶቅድንካ፥ በድንከስም ቆልማባብከትም ማስዝዶቴ፥ Ꮊረነረ ካየንባብ ዎ ማድንካ ሙዳ ሪ ዎንታ ዶቅዴ።

11 የታ ቆርንቶስ ካተመናር ዶቅድን ኤድንከሶ! ይና፥ መየካ የካንታ ከዝቶቴ፥ ዎንታ ቡደንመረ የካንታ መያ ማስቶቴ። 12 የታ የንታ ሶልመንም ዎካንታ ኡዘት ዳት ዎታ የካንታ ኡዛኮቴ። 13 ባቤና ይንታ ይንችንከስካንታ ኬዝድንግንዳ እ ኬዛጋካ፥ ዎታ ዎንታ ቡደን የካንታ መያ ማስቶቴ፥ ዎንታ ገቀንመረ የካንታ መያ ማስሳንግንዳ የተረ ኮትግንዳ ይይከቴ።

14 ዝግዝዳክንጎግካ አሜንዳክባብ ኤድንከስካ ክክን Ꮊይዙገረቴ፥ ጭለትቼኬ ጎመካ Ꮊስግንደክ የካ ማዳ? ሳክመኬ ኡምካ Ꮊስግንደክ የካ ዶቅካንታ ማዳ? 15 ክርስቶስኬ ዳብሎሰካ Ꮊስግንደክ ክክ ኤእዳ? አመንድባብኬ አመንዳክባብካ Ꮊረከክ ኮችምዳ?*6፡15 ዳብሎስ ጋይንት ግርክ አፈካ "በልያል" አነረ "በልያር" እብራይስጥ አፈካ "በልአል" ጋይምሶ ኤልምዴ። ቡልና "መይዳክንዳ" አነረ "ህግ ካየንዳ" ጋይንት ማድንካ ሰጣንታ ላም ማትሶ Ꮊፈርዴ። 16 ሳብታ ጭል ኤሄና ጮይስ ማታክባብከስም ጎይነርድንደትካ Ꮊራ ዋልቃትች ዶቅዳ? ሳበረ

"እስታ ዶቅንቴን እስታ ዎርሰንታ ዎክያር ማስዝድቴ፥

ከትከረ ክክን ዶቅትቴ፥

እታ ከታ ጮይስ ማትቴ፥

ከተረ እስታ ዎርሳ ማደኬ"

ጋይሶ ኬዛንደትግንዳ ዎታ ዋልቃ ዋልቀና ስለንካ ዶቅድባብ ሳብንታ ጭል ኤሆቴ።✝6፡16 ሌዊ. 26፡12፤ ሕዝ. 37፡27፤ 1 ቆሮ. 3፡16፤ 6፡19።

17 ጉጅሰረ ጮይስ ኩን ጋይቴ፥

ከ ኤድንታ ዎክያርንካ ፋስምሰቶ ዉትከቴ፥

ቱና ማቻን ሪን Ꮊይዎለቴ፥

እተረ የም እስታ ማስስቶ ኤልድቴ፥✝6፡17 ኢሳ. 52፡11።

18 እታ የንታ ባቤና ማድቴ፥

የተረ እስታ አⷝና ይንችኬ ማና ይንች ማተረቴ፥

ጋይዴ ሙደንም ጋምድባብ ጮይስ።✝6፡18 2 ሳሙ. 7፡14፤ 1 ሳሙ. 17፡13፤ ኢሳ. 43፡6፤ ኤር. 31፡9።