1 ይሁዳ ፍጨናር ዶቅድባብ አሜንድባብከስካንታ ይይምድን ዉቸንጎካ እ ጻብድንግንዳ የካንታ ዝክሳዬ፥ 2 "አካያ ፍጫ ኤድንከስ ስገዳን ስለንዘንካ የድሶ አላካንታ ግግምስባብከሰኬ" ጋይስቶ መቅዶና ፍጫ ኤድንከዝደር የጎካ እ ጋይርድንዳ የንታ ዳቅንተን እ ኤዝድንካንቴ፥ የንተረ ዳቅንተና አብንከስም አምስስቴ። 3 ኮ ሪንካ የንታዘን ዎንታ ዶቅድንዳ ጬቅና ዉች ማትሶ ነጋይንግንዳ ኬና እስመንከስም ኦይድቴ፥ የተረ ገታ እታ ኮታ እሪ እ ኦይቻንግንዳ ግግምሶ ካርስከቴ። 4 መቀዶንያ ኤድንከስ እንካ ክክን የንደር Ꮊድሶ ግግማክባብ ማትሶ የ ዶቅድንካ የም Ꮊፍሴ የንካ ዎንታ ጋይርንካ ኦስንዶቴ፥ የታ ማቼ እንድንካ ኦስንደቴ። 5 ኮካንታ እምካንታ የ ጋይሳን ቡዳርንካ እምንተን እሪናና የ ግግዝድን ግንዳ የም ገቀርዝድንግንዳ ጋይንተካ ኬና እስመንከስ እዘንካ እሪምሶ የንደር ኬት Ꮊድንግንዳ ይይንተና ዝግዝድንዳ ማቻንኦል፥ ኮግንደካ እ ᎺድንᎺይካ ቡዳርንካ የንታ እምንተና ግግምሳንዳ ማዴ፥ የተረ የ እምድንዳ ሶልማክሳ ማታክናና የንታ ቡዳርንካ ማትንተንም ሰጅዴ።

6 "ቶክም ማስባብ ቶክምካ ስክዴ፥ በድ ማስባብ በድካ ስክዴ" ጋይድንደትም ጋይተን ገቀርከቴ። 7 ኮካንታ ሳብ ሶልምድንዳ ጉርምካ እምድባብ ኤድም ማቻንካንታ ዋልቃ ዋልቀና እማካንታ ይዝግዛንደትም ይንታ ቡዳር ጋይሶ ጉርምካ እማ ዳት እምትቶ ነክትቶ ጋየሮ ሶልማክ ዶቆ Ꮊይ እማ። 8 ሙዳᎺይካ ሙዳ ሪካ የንታ ማተንካንታ ማድባብ ማትሰቶ ኡርማ ፍክስዘን ሙዳ Ꮊቅስካንታ የም ማተርንግንዳ ሳብ በድካ ይንታ አንጀንም የካንታ እምተሬ። 9 ኮነረ፥

"ሪካየንባብከስካንታ ቡዳርንካ እምሴ፥

ክታ ጭለትቼነረ ስለንክንደታ ዶቅተሬ"

ጋይምሶ ጻፍምሳን ግንዴ።✝

10 ማዝድባብካንታ ማሰንም፥ እችምካንታ ሶለንም እምድባብ ጮይስ የ ማዝድን ማሰን በችሶ የካንታ እምዴ፥ የንታ ቡዳርንካ እምንተንታ አፍን የካንታ በችስተሬ።✝ 11 የንታ ቡዳርንካ እምንተና ዎጎካ ከትም የልድን ኤድንከስ ሙዳ ሳብም ጋለተርንግንዳ ሙዳᎺይካ ቡዳርንካ የ እምድንግንዳ ሳብ ሙዳ ሪካ የም ቆልማባብ ማስተሬ። 12 ኮና የ ቦድንዳ ቡዳርንካ እምንታ ፍክስና አሜንድባብከስም ማጠናርንካ ዉችዘንከረ ስግ ኤድንከስ ሳብካንታ በድ ጋለቻን እምድንግንዳ ከትም ይስዝዴ። 13 ኮና የንታ ቡዳርንካ እምንታ ፍክስና የታ ክርስቶሰታ ክላ ኬዘንም ኤሰርሰቶ አሜንምስባብከስ የንታ ማትንተን ከትካንተከ አብንከስካንተረ የንታ ቡዳርንካ እምንተን መያ ማስዝድንዳ ማቻን ካንታ ሙደነረ ሳብም ጋለደኬ። 14 ከተረ ሳብ የካንታ እምሳንዳ ስግ ማቻንጎካ የም ከት ሶልምድንካንታ የካንታ ምግዝደኬ። 15 ኤታ ኬዝካ ከስት በይስምዳክን ዉች ክታ እምንተንጎካ ሳብ ጋለትማ።