1 ኦስ ኢጣልያ ፍጨናር ሎቀዘንካ ቃልዝድን ማርከብንካ ዎ አይድንግንዳ ኬዝምሳንደትᎺይካ ጳውሎስምኬ አብንከስ ዞከርስባብከስም አዉግስጦስታ ዳምንባብከሳር Ꮊቅባብ ዮልዮስ ጋይምድባብ ፖልስንከስም ገችዝድባብካንታ ከትም እምሴ። 2 እስያ ፍጨናር ባሀርንታ ካንተዘን ዶቅድን ጎግንከዘን አይድን አድራምጥዮን ካተመንታ ማርከብናር አርድሶቶ አይ የጆቴ፥ ተስሎንቃ ካተመናር ዶቅድባብ መቅዶንያ ኤችና አርስጥሮኮሰረ ዎንካ ክክን Ꮊቄ። 3 ዛማክንካ ኦስ ሲዶና ካተመናር የልሶቴ፥ ዩሎስ ጳውሎስካንታ ላቅም ኤድ ይማቻንጎካ ክታ ገርነንከዝደር አይሶ ክትም ዝግዝድንደትም አለንም ክትካንታ አልድንግንዳ ከትካንታ ጋይሴ። 4 ኮታርከረ አምሶቶ ዞገና ዎንታ እርጎካ ዞገሮ Ꮊቃንካንታ ሎቀንታ ዎክያር ዶቅድን ቆጵሮስ ደንን ኮታዘን ገክንሶቶ ማርከብንካ ዎንታ አይንም የጆቴ። 5 ክልቅያርኬ ጰነፍልያ ፍጨንታ ላማር ዶቅድን ባሀርን ዎ ቃልሳን ቡር ልቅያ ፍጨናር ዶቅድን ኦስ ሙራ ጋይምድን ካተመናር የልሶቴ። 6 ኮታር ፖልስንከስም ገችዝድባብታ ኦስ ኢጣልያ ፍጨናር አይድንዳ እስክንድርያ ካተመንታ ማርከብን Ꮊፍሶ ኮታር ዎ አርድንግንዳ ይሴ። 7 በድᎺይካ ዳልግሳ ሙክሶቶ በድ ማጠካ ቀንዶስ ካተመንታ ላማር የልሶቴ። ዞገነረ ኦስ እሪ ዎ አይዳክንግንዳ ዎም ማርሳንካንታ ሰልሞና ካተመንታ ላመካ ስግሶቶ ቀርጤስ ሎቀንታ ግድናር ደንንካ ገክንሶቶ አይሶቴ። 8 በድ ማጠካ ካንተን ካንተንካ ዎ ስገዳን ቡርጎካ ላስያ ካተመንታ ላማር Ꮊፈርድን ማርከብን ዎእድን "ላቅም ካርዬ" ጋይምድን ካርዘን የልሶቴ።

9 ዎንታ ሙክንትንዘን በድ ሳዓት ስገዳንጎኬ በቼካ ምክሰርድንደታ ሰጨና ስገዳንካንታ ኮትኮᎺይካ ባሀርንዘንካ አይና አንድር ዘርዝድንዳ ማቻንጎካ ጳውሎስ ኤድንከስካንታ ኩንጋየሮ ከትም ኤግዝምሴ። 10 "የታ ኤድንከሶ! ይና ኮዘንካ ኦስ ዎ አይድንደታዘን ዘርዝድንዳ ዶቅድንደትም እዝደር Ꮊፈርዴ፥ ጫነርሳን ርንዘንከ ማርከብንዘንካ Ꮊክ ማታክናና ኤታ ሰንፔዘነረ አንድር ኡፈልዝድንደትኬ ካይንተረ የልዴ"። 11 ፖልስንከስም ገችዝድባብ ማቼ ጳውሎስታ ዞረንዘንካ ስግ ማርከብን ክድባብተኬ ማርከብንታ ባቤና ኬት ጋይድንደትም ኤሰርድ Ꮊቄ። 12 ናኮና ጎግንዘን Ꮊዉስ ካርና በርግን ስግስካንታ ኡርማ ማታክንኦል በድ ኤድንከስ "ጎግንም አይደኮ ከደር ማደስናና ዘርመርጎኬ ታማርጎካ የረየር ዶቅድን ፍንቄ ፍጨናር ቀርጤስ ማርከብን ዎይሰርድን ካርንዘን የልሶቶ በርግንም ኮታር ዎ ስክሳ" ጋይሰኮ ኬዘኬ።

13 መርሳ ታማርጎካ ዞገና ዞግድንካ ከታ ይ ሰዳንደትካ ኬት ገቀርሳንግንዳ ከትካንታ ማቻን ካምስንካ ማርከብን ዎይስዝድን ሪን አምስሰኮ ጎግንም አይ የጀኬ፥ ማርከብን ዎይሰርድን ካርንዘንከረ አምሰኮ ቃርጠስ ሎቀንታ ዎክናር ዶቅድን ደንንታ ካንተካ ስገደኬ። 14 ኬዛር ማቼ ቶክም ሰጨታ ቡር "ዘርመርጎካ Ꮊይታ ዉትንታጎካ ቡርበች ዞገና" ሎቀንታ ዎክናር ደንንዘንካ አምሶ ባሀርንዘን ከደር Ꮊዴ። 15 ማርከብነረ የረየር Ꮊድን ዞገንካ Ꮊቅምሳንካንተኬ ዞገንም ዎይስካንታ ከደር ማታክን ካንታ ጫምን ጋይሶቶ ዞገንካ Ꮊንቅመሮቶ አይሶቴ። 16 ሎቀንታ ዎክናር ዶቅድን ቄዳ ጋይምድን ደንን መረን ገክንሶቶ ዎ አይድንካ መራ ዞገና አንድር ዘርዝድንካ ማርከብንካ ክክን ዶቅድን መራ ጃልበን የድሶቶ አቅሶቴ። 17 መርከብናርንባብከስ ጃልበንም ማርከብንደር ጎችሶ ዉችሳን ቡር ማርከብንታ ካንተካ ዛንም ላጨኬ፥ ማርከብና ሱርትስ ጋይምድን ሻምይ ካርያር ዋጅዳክንግንዳ ጳስሰኮ ሻረን Ꮊንችሰኮ ዞገካ በይመረኮ አይሰኬ። 18 ቡርበች ዞገና ዎንዘን ዳቀሮ Ꮊፈርሳንጎካ ዛማክንካ ማርከብንዘን ዳርጵምሳን ርንከሳርንካ ዋልቃ ዋልቀን ባሀርናር ኦይት የጀኬ። 19 ማክምስ ሰጨንከረ ማርከብንካንታ ፍግዝድንደትም ርን ከታ ይንታ ገታ አንንካ ሎቀናር ዛቅት ኦይቸኬ። 20 በድ ሰጫካንታ Ꮊይ ዉተዴ፥ ቤዝንከስ Ꮊፈራክንካንተኬ ዞገነረ ዎንዘን ዳቀሮ አይሳን ካንታ ይና ኮዘንካ ኦስ ዎንደር አቅምዳክዬ ጋይሶቶ ዎንታ ጉርምን ተቾቴ።

21 ኤድንከስ Ꮊረነረ እችም እቻክዶቆ በድ ሰጫ ዶቅሰኬ፥ ኮካንታ ጳውሎስ ከታ ዎክያር ዎእሶ ኩን ጋይሴ፥ "የታ ኤድንከሶ! እ የም ጋይሳን ኤሰርሰቶ ቃርጠሳርንካ የ አማከስናና ኮና ሙዳ ኡፍልንከ ካይንተንከ የም የልተራክ ዶቆ። 22 ታየረ ማርከብና Ꮊክ ኡፈልተራ ዳት የንታ ዋርንካ Ꮊየንዘነረ ካይንተና የልዳክዬ፥ ኮካንታ ዳእከቴ፥ Ꮊይጳሰቴ! ጋይስቶ የም ዞርድቴ። 23 እታ ክታ ማችባብኬ፥ እ ጎይንድባብ ጮይስና ናካ ሶይት ክት ኦይቻን ክታይንችና እስታ ላማር ዎእሶ፥ 24 ‘ጳውሎሶ! Ꮊይ ጳሴ! ሮማ ባንችንታ እሪ የስም ዎእንት ዝግዝዴ! ይና የስካ ክክን አይድባብከስመረ ሙዳ ሳብ የስካንታ ጋይሶ ደእያርንካ ከትም አቅዝዴ’ ጋይሶ እካንታ ከዝቴ። 25 ኮካንታ የታ ኤድንከሶ ዳእከቴ! ሳብ ኮም እካንታ ኬዛንደትም Ꮊረነረ ነግሳክዶቆ ክት ቦድንደትም አመንድቴ። 26 ማችንከረ ዞገና ዋልቃ ሎቀንታ ዎክያር ደንንታ ካንታር ተይ አይሶ ዎም ዛቅዴ"።

27 ታመኬ ኦይችምስ ሰጨንካ ሶይት አድርያ ባሀርናር ዞገንካ Ꮊቅመሮቶ ዎ አይድንካ ሶይት ገልትገር ማርከብናር ፍክስንባብከስ ፍጨዘን ከደር የልምሳን ካምሴ።* 28 ኮካንታ ባሀርንታ ጎርና የርክሰርድን ዛንንዘን ሰይን ዞክሶ ኬት ኦይድንካ ኦይድ ቦንዳ የርጋ ማድንዳ ማትሶ Ꮊፈርሴ፥ ቶክም ዶቅሰኮ የርክሰርድንደትም ካርንካ ኬት ኦይድንካ ማከን ቦንዳ የርጋ ማታባብ ጎር ማችንካ Ꮊፍሰኬ። 29 ዎንታ ማርከብና ባሀርንታ ካንታ ዶቅድባብ ሰይንንከስካ ባዉጭምዳክንግንዳ ጳስሰኮ ማርከብንታ ቡርጎካ ኦይድ ማርከብን ዎይስስዝድን ስብልንከስም ባሀርናር ኦይቸኬ። ኮታ ቡር ሶይትና ከታዘንካ ስግሶ Ꮊየክና ከትካንታ Ꮊድንግንዳ ምክስ የጀኬ። 30 ማርከብናር ፍግዝድባብከስ ማርከብናርንካ ዉትሰኮ አጥም ካንታ ዝግዛንጎካ ማርከብንታ እርጎካ ማርከብን ዎይስዝድባብከስ ኦይድ ስብልንከስ ካምስንካ ማርከብንታዘን Ꮊቃንደት ጃልበን ባሀርናር ኦይቸኬ። 31 ኮትኮᎺይካ ጳውሎስ ፖልስንከስም ገችዝድባብከስምኬ ዳምንባብከስም "ኬና ማርከብናር ፍግዝድባብከስ ማርከብንታዘን Ꮊዉስሶ ከት ዶቃክንዳ ማቼ የታ አቃየቴ" ከደር ጋይሴ። 32 ኮካንታ ዳምንባብከስ ጃልበንም የጃን ዛንንም ተችሰኮ ሎቀንዘን ላግድንግንዳ ዛቅሰኬ። 33 ፍጨና ሰጭካንታ ይድንካ ሙደነረ እችም ከት እጅድንግንዳ ጳውሎስ ከትም ምክሴ፥ ኩነረ ከትም ጋይሴ፥ "Ꮊረነረ እችም አፋር ባራከትዶቆ የ ካርዝድንካ ታሜከ ኦይድ ሰጫ ስክስተቴ። 34 ኮካንታ እችም የ እችተርንግንዳ የም ምግዝድቴ፥ ኮነረ ዳቅንታ የካንታ እምዴ፥ ይና ኮዘንካ ቦድሶ Ꮊረነረ የንዘን ኡፈልዝድን እር የልዳክዬ"። 35 ኮመረ ይ ጋይሳን ቡር እችምን አምስትዮ ሙደንታ እር ሳብንም ጋለቼ፥ አስተረ እች የጄ። 36 ኮትኮም ክት ይድንካ ሙደነረ ዳቅሰኮ እችም እቸኬ። 37 ማርከብንታ ዋር ሙደና ቃስተን ጨተኬ ማከን ቦንደኬ ታሜኬ ላ ኤድንከስ Ꮊቆቴ። 38 ሙደነረ እችሶ ከት ምሳንደታ ቡር ዳርጵምሳን ዘርግንም ባሀርናር ኦይትንተካ ማርከብንታ ደጭምና ላዉን ጋይድንግንዳ ይስሰኬ።

39 ፍጨና ሰጭድንካ ከታ ይ የልሳን ካርንም ኤሳከኬ፥ ኬዛር ማቼ ሻም ዶቅድንደትም ባሀርንታ ካንተን ሰደኬ፥ ከደር ማደስ ናና ማርከብን Ꮊንቅሰኮ ኦስ ካንተዘን ዉችካንታ ገቀርሰኬ። 40 ማርከብን ዎይዝድን ስብልንከስም ብልሰኮ ባሀርንታ ዋር ከትም ኦይቸኬ፥ ኮታይከረ ሎቀንም Ꮊንቅድንደታ ዛንንመረ ብልሰኬ፥ ኮር ጎካ ዶቅድን ሻረንም ዞገንዘን ጬክሳ ይይሰኮ ባሀርንታ ካንተዘን ዉትካንታ አይሰኬ። 41 ኬዛር ማቸ ማርከብና ሻምን ሳንሳንደትካ ክክን ባዉጭምሶ አፍ ጩላ ዋቼ፥ እርጎከረ ጩላ ቶስምሶ ሶግዳክንዳ ማቼ፥ ቡርጎክንዳ ማቼ ሎቀንዘን ዞገንታ Ꮊቅነዘንካ አምሳንዳ ቁንጭም የጄ።

42 ዞከርስባብከሳርንካ ዋልቃ ዎራ ሎቀንታ ዋር ልመካ ሱርድባብ ዶቅሴ ዳምንባብከስ ኬትም ደይሳካንታ ኤእሰኬ። 43 ፖልስንከስም ገችዝድባብ ማቼ ጳውሎስም አቅስካንታ ይ ዝግዛንጎካ ከታ ገቅርን ኤሰራክዬ፥ ስክስሰረ ልማ ኤዝድባብከስ እርምሶ ማርከብናርንካ ባሀርናር ጎብሶ ልመካ ፍጨንዘን ኬት ዉድንግንዳ ክትሴ።

44 ነገድባብከስ ጉጅሶ ፍልተን ፎእምሳንዘንኬ ማርከብንታ ቁንጭምንከዘን ማትሰኮ ከት ዉድንግንዳ ክትሴ፥ ኮግንደካ ሙደነረ ኡርመካ ፍጨዘን የልሰኬ።