1 ኮካንታ ዎ ኤሰርሳን ርይንዘንካ ዎ ዋችተራክንግዳ ዎ ኤሰርሳን ሪይንጎካ አንድር ዎ ካችካ ካርስም ዝግዝዴ። 2 ክታይንችንጎካ ኬዝምሳን ቃለና ዶፈን ማቴ፥ ኮትኮም ቃለንመረ ካርዝዳክባብኬ ኮትኮ ቃለንካንታ ክትምዳክባብ ዝግዝድን ዋጭን ተይቴ፥ 3 ይና፥ ዎታ ኮም አንድር አቅንተን በህ ዎ ጋይድንዳ ማቼ Ꮊስግንዶንት ሱርዳ? ኮም አቅንቴን እሪምሶ ኤስምስባብ ጮይስ ይንታ ማታርንኬ፥ ክታዘንካ ኤሰርሳን ኤድንከሰረ ኮትኮም መያ ዎካንታ ማስቴ። 4 ሳበረ ጉጅሶ ቃዉተንከስም፥ በርእዝድን ሪይንከስም፥ Ꮊክ Ꮊክ አተን ይይንተኬ ክታ ጋይተንግንዳ እምምሳን አያን ጭልንም ከትካንታ የልስንተካ ከታ ማርካትቼን ዳቅስቴ።

5 ሳብ ኦስ እሪ Ꮊድንደትም፥ ኮም ዎከዝምድን ኮፍጫ ሙደን ክታይንችንከስታ ጎያር ገችሳክዬ፥ 6 ኮትኮግንደረ ጭል ማጻፍንከሳር ዋልቃ ካርዘን ኩን ጋይምቴ፥

"የስ ክትም ገቀራባብ ኤድ Ꮊራ?

ክትካንታ የስ ካርስምተርንግንዳ ኤድ ይንች Ꮊራ?

7 ክታይንችንዘንካ ቶክም መርሳ ማስሳዬ፥

ቦንቼተኬ ጋለታ ዛዉደን ክታዘን ዎጀዬ፥

የስታ አን ፍክስንከዘን ክትም ዶርሰዬ"። *

8 "ሙዳ ሪን ክታ ገችንታ ኤረንታ ጎያር ክትካንታ ይስሳዬ"።✝

ሙዳ ሪን ክታ ገችንታ ኤረንታ ጎያር ይድንካ፥ ክታ ገችንታ ኤረንታ ጎያር ይያክሳ ነክሳንዳ Ꮊራርየነረ ካዬ። ኬዛር ማቼ ታ ዶቅድንደትግንዳ ሙዳ ሪና ክታ ገችታ ኤረንታ ጎያር ማቻንደትም አክ ሰዳኮቴ። 9 ታ ማቼ ክታይንችንዘንካ ቶክም ይርክን ጋይሶ Ꮊቅባብም፥ ደእታ ማጠንም ክት ተያንጎካ ቦንቼተኬ ጋለታ ዛዉደን ባልስባብ የሱሰም ሰዶቴ፥ ኖ ሳብታ ዉች እምንተንካ ዎሙደንካንታ ደእቴ። 10 ሙዳ ሪና ክትኬ ክትካንታ ፍዝምሳንዳ ሳብ በድ ይንችንከስም ቦንቼዘን ተይᎺድካንታ ከታ አቅንተንታ ጎርስንባብ ማችባብ የሱሰም ማጠንም ስክስካ ቦድማ ማድንግንዳ ይያባብ ክትም ዝክሴ።

11 ኤድንከስም ሳብካንታ ፋስምስባብ ማዝድባብ የሱሰኬ ክትካ ሳብካንታ ፋስምስባብ ማችባብ ኤድንከሰረ ዋልቃ ባቤንታ ይንችንከሰኬ፥ ኮጎካ ኖ ከትም "እስታ እስመንከሶ" ጋይሶ ኤልካንታ ኦስናዬ። 12 ኮካንተረ ጭል ማጻፍንከሳር

"የስታ ላምንም እስታ እስመንከስካንታ ኤስምዝድቴ፥

ጭልንከስ ሳንምሳንደታ ዎክያር የቺካ ጋለድቴ" ጋይዴ፥✝

13 ኮትኮግንደረ "እስታ አሜንን ክታዘን ማዝድቴ" ጋይዴ፥✝

ካርንከረ "ኮሰቼቴ እንከ ሳብ እካንታ እምሳን ይንችንከስ ካሮቴ" ጋይዴ።

14 ኮካንታ ክታ ይንችንከስ ዋሄኬ ማቀስካ ዶቅድባብ ኤድንከስ ከታ ማትንተንግንዳ የሱሰረ ከትግንዳ ኤድ ማቼ፥ ኮመረ ክት ይሳንዳ ይንታ ደእንጎካ ደእዘን ገችታ ኤራ ዶቅድባብ ዳብሎስም ካይስካንቴ። 15 ኮትኮግንደረ ደእንም ጳስጎካ ኬታ ይንታ ዶቅድን ስላ ሙደናር አይላትቻር ቆልምድ Ꮊቅባብም ቆት ተይካንቴ። 16 ገተረ የሱሰታ ዝግመትና ክታይንችን ማታክናና አብራሀመታ ሱሰንም አላካንቴ። 17 ኮካንታ ሙዳ ርይካ ይንታ እስመንከስግንዳ ማት ክትም ዝግዝድንካንታ ኖ ማቼ፥ ኮም ክት ይሳንዳ ኤድንከስታ ጎመንም ላላ ጋይስካንታ ጋይሶ ሳብታ ፍክስካንታ አሜንምስባብኬ አጨርድባብ ቀሰንከስታ ገችንባብ ማቼ። 18 ኖይንታ ማታርንካ ጰጭምሶ ማጠንም ክት ተያን ካንታ ጰጭምድባብከስም አሌንም አልዴ።