1 የሱሰረ ኮትኮ ጎግንካ ስገድንካ አፍይ ዝልይ ማትሶ አጥምስባብ ኤችም ሰጄ። 2 ክታ ካርንካ ጎርስምድባብከስ የሱሰም "ኤስስንባቦ፥ ኮና ኤችና ዝልይ ማትሶ ክት አጥምሳንዳ Ꮊይታ ጎመከረ? ይንታ ጎመኮ አና ክትም አጭባብከስጎኮ?" ጋየረኮ ኦይሰኬ።

3 የሱሰረ፥ "ኮና ኤችና ዝልይ ማትሶ ክት አጥምሳንዳ ክትጎካ አነረ አጥመንባብከስታ ጎመንጎካ ካዬ፥ ኬዛር ማቼ ሳብታ ፍክስና ክትካ መያ ማተርንግንዴ። 4 ሰጨና ዶቅድንካ እም ኦይችባብታ ፍክስንም ፍክስ እም ዝግዝዴ፥ Ꮊየነረ ኤድ ፍክስካንታ ማዳክንዳ ሶይትና Ꮊዴ። 5 ኮ ፍጫሙደንዘን ዶቅድቶ እታ ፍጫሙደንታ ዎርሰንካንታ ሳክምቴ" ኩን ጋይሶ ማስሴ።✝9፡5 ማቶ. 5፡14፤ ዮሀ. 8፡12።

6 ኮም ይ ኬዛንደታ ቡር ፍጨዘን ፈጭምሶ ይንታ ፈጭምንካ ፍጨንም ቶቀልስሶ ቶቅለንከረ ዝልንታ አፍን ሳይስንደትኬ፥ 7 "አይሳዮ ሳሎም ከርምሳን ሎቀናር ስኤርካ" ክትም ጋይሴ። (ሳሎም ጋይንት "ኦይትምስባብ" ጋይንትዬ) ኮካንታ ኤችና አይሶ ስእርንደትኬ ሰደሮ ማቼ።

8 የለንከስኬ ኤና እሪ ክት ምግዝድንካ ሰድᎺቅባብከስ "ኮና ኤችና ዶቅሶ ምክሰሮ Ꮊቅባብ ኖ ካዮ?" ጋይሰኬ። 9 ዋልቃ ዋልቀንከስ "ይዬ፥ ኖዬ!" ጋይሰኬ፥ አብንከስ ጉጅሶ "ክትም ካምዳ ዳት ኖ ካዬ!" ጋይሰኬ። ኖ ማቼ "እትቴ!" ጋይሴ። 10 ኤድንከሰረ "ኮናና የስታ አፍንከስ Ꮊስግንዶክ ፎችምሳሬ?" ክትም ጋይሰኬ። 11 ኖየረ "የሱስ ጋይምስባብ ኤች ቶቅላ ቶቀልስሶ እስታ አፍንከስም ሳይሶ ‘ኦስ ሳሎማር አይሳዮ ስኤርካ’ እም ጋይሴ። እተረ አይስቶ ስኤርስቶ ሰድንካንታ ማቻቴ" ጋየሮ ማስሴ። 12 ከተረ "ኖ ኤችና ታ Ꮊብረረ?" ጋይሰኬ። ኖየረ "Ꮊብር ክት ዶቅዳናንከረ እታ ኤሳይቴ" ከደር ጋይሴ።

13 ኮታ ቡር ኤድንከስ አፍይ ዝልን ማትሶ Ꮊቅባብ ኤችን ኦስ ፈረሳያዊንንከዝደር ተይ አይሰኬ። 14 የሱስ ቶቅለንካ ኤችንታ አፍን ከስ ሰድንግንዳ ክት ይሳንዳ አይሁድንታ Ꮊዉስ ሰጨንካ Ꮊቄ። 15 ፈረሳዊያንንከስ "Ꮊስግንደስ ሰድካንታ ማቻሬ?" ጋይሰኮ ኤችንም አናካርንካ ኦይሰኬ። ኖየረ "እስታ አፍንከዘን ቶቅላ ሳይስንካ ስኤርስቴ፥ ኮታ ቡር ሰድንካንታ ማችቴ" ጋይሴ።

16 ኮትᎺይካ ፈርሳውያንከሳርንካ ዋልቃ ዋልቀንከስ፥ "ኮና ኤችና አይሁድንታ Ꮊዉስ ሰጨንም ክት ቦንጅዳክን ኦል ሳብዘንካ ካዬ" ጋይሰኬ። አብንከስ ማቼረ "ኮናና ጎመካ ማችባብ ኤድ ከነም አታ ቃዉተን Ꮊስግንድክ ፍክስካንታ ማዳ?" ጋይሰኬ። ኮጎካ ከታ ዎክያር ፋስም ማቼ።

17 ኮካንታ አፍይ ዝልይ Ꮊቅባብ ኤችና፥ "የና የስታ አፍንከስም ሰችሴ የስ ጋይድን ኤችንጎካ የና Ꮊረስ ጋይዳ?" ጋየረኮ ጉጅሶ ክትም ኦይሰኬ። ኖየረ "ሳብዘንካ ኤሰርሶ ኬዝድባቤ!" ጋይሴ። 18 ኮና ኤችና አፍይ ዝልይ ማትሶ ክት Ꮊቃንደትምኬ ክታ አፍንከሰረ ቡር Ꮊስግንዳ ፎችምሳናነረ ክትም አጭባብከስም ኤልሶ ከታ ይ ኦይስተርን የለልታ አይሁድንታ ገችንታ ኤረንባብከስ አሜናከኬ። 19 ኮካንታ ክትም አጭባብከስም፥ "ዝልይ ማትሶ አጥምሴ የ ጋይድባብ የንታ ይንችና ኮና ኖ? ታ Ꮊስግንድክ ሰድንካንታ ማቻራ?" ጋየረኮ ኦይሰኬ።

20 ክትም አጭባብከሰረ፥ "ኮና ዎንታ ይንች ክት ማቻንደትምከ ዝልይ ማትሶ ክታ አጥርን ኤዝዶቴ፥ 21 ኬዛር ማቼ ታ Ꮊስግንዳ ክት ሰዳናነረ አፍንከስመረ Ꮊይ ክትካንታ ሰችሳናነረ ዎታ ኤሳዮቴ፥ ክትም ኦይስከቴ፥ ኖይንታ ማተን ኤስባብ ክት ማቻንካንታ ኖ ይጎካ ኬዛካንታ ማዴ" ኩንጋየሮ ማስሰኬ። 22 ክትም አጭባብከስ ኮም ከት ጋይሳንዳ የሱሰም "ሳይምስባቤ" ጋይድባብ ኤድ ዶቅሴ አይሁድንከስታ ገችንታ ኤረንባብከስ አይሁድንታ ምክስ ኤሄናርንካ ክትም ዉችካንታ ክክን ከት ኤእሶ Ꮊቅንካንታ ከትም ጳስኬ። 23 ኮካንታ ክትምአጭባብከስ፥ "ኖይንታ ማተን ኤስባብ ኤዴ፥ ክትም ኦይስከቴ" ኩን ጋየረኮ ማስሰኬ።

24 ኮጎካ ዝልይ ማትሶ Ꮊቅባብ ኤችን አነታ ኤልትዮ "የና ዶፈንን ኬዝካ ሳብም ቦንችካ፥ ኮና ኤችና ጎማባብ ማትንተን ዎተረ ኤዝዶቴ" ጋይሰኬ።

25 ዝልይ ኤችነረ፥ "ኖ ጎማባብ ክታ ማትንተንም እታ ኤሳይቴ፥ ዋልቃ ሪ ኤዝድቴ፥ ኮነረ እታ ዝልይ ማትስቶ እ Ꮊቃንደትምኬ ታ ሰድንካንታ እ ማቻንደትም ኮም Ꮊክ ኤዝድቴ" ጋየሮ ማስሴ። 26 ከተረ "Ꮊርክ የስካንታ ይሳሬ? የስታ አፍንከስም ክት ሰድንግንዳ ይስሳንዳ Ꮊስግንደረ?" ጋይሰኬ። 27 ኖየረ "እርምስቶ የም ከዛቴ፥ የታ ማቼ ኤስርካንታ ዝጋከቴ፥ ይና፥ Ꮊራካንተንት አናካርንካ ኤስርካንተንት ዝግዳ? የተረ ክታ ካርንካ ጎርስምድባብ ማትካንታ ዝግደቴ?" ከትም ጋይሴ። 28 ከተረ፥ "ክታ ካርንካ ጎርስምድባብ የነዬ፥ ዎታ ማቼ ሙሴታ ካርንካ ጎርስምድባቦቴ፥ 29 ሳብ ሙሴም ከስሳንደትም ኤዝዶቴ፥ ኮና ኤችና ማቼ Ꮊብርንካ ክት ናነረ ዎታ ክትም ኤሳዮቴ" ኩን ጋየረኮ ክትም የክሰኬ።

30 ኤችነረ፥ "ኮና ኤችና Ꮊብርንካ ክት ናነረ የንታ ኤስክሳ ነግና በርእስዝዴ! ኬዛር ማቼ እስታ አፍንከስም ሰችስባብ ኖዬ። 31 ሳብ ጎመንባብከስም ኤሰርዳክንዳ ኤስምሳንዴ፥ ኬዛር ማቼ ሳብም ጎይንድባብከ ክታ ጋይተንም ቦድባብ ኤድ ዶቅሴ ክትም ሳብ ኤሰርዴ። 32 ዝልይ ማትሶ አጠርምስባብ ኤታ አፍንከስም ሰችስባብ ዶቅዴ ጋይምድንካ ፍጫ ሙደና ፍዝምሳንደትዘንካ የድሶ ኤስርምሶ ኤስማዬ። 33 ኮና ኤችና ሳብዘንካ ይ ማታክናና Ꮊረሰነረ ይካንታ ማታይ ዶቆ" ኩን ጋይሶ ማስሴ።

34 ከተረ "የስታ ኤደትቼና ጎመካ ጮጭንካ አጥምስባብ! የና ዎም ኤስስካንቶ?" ጋይሰኮ አይሁድንታ ምክስ ኤሄናርንካ ክትም ዉችሰኬ።

35 ኤችንም አይሁድንታ ምክስ ኤሄናርንካ ዉችሳንደትም የሱስ ኤሰርሴ፥ ክትም Ꮊፍሳንደትከረ "ኤደት ይንችካ የና አመንዳ?" ክትም ጋይሴ። 36 ኖየረ "ጮይስዮ! ክትካ እ አሜንድንግንዳ ኖ Ꮊይራ?" ጋይሴ። 37 የሱስ "ኮታ እሪ የና ክትም ሰተዬ፥ ታየረ የስም ከስዝድባብ ኖዬ" ጋይሴ። 38 ኖየረ "ጮይስዮ! እታ አመንድቴ" ጋይሶ ክትካንታ ጎስትሴ። 39 የሱሰረ "ሰዳክባብ ሰድንግንዳ፥ ሰድባብከሰረ ከታ አፍና ዝልድንግንዳ እታ ኮ ፍጫሙደንዘን ፋረድካንታ Ꮊትቴ" ጋይሴ። 40 ኮታይካ የሱሰታ ላመር Ꮊቅባብከስ ፈረሳዊያንንከስ ኮም ኤሰርሰኮ "ኮናና ዎተረ ዓፊይ ዝል ማቾቶ?" ክደር ጋይሰኬ። 41 የሱሰረ "ዝልንከስ የ ማተስናና ጎማ የንታዘን ማዳክዶቆ፥ ታ ማቼ ሰዶቴ የ ጋይድንካንታ፥ ጎመንክንባብከስ ማትሰቶ ነገደቴ" ከደር ጋይሴ።