1 አናካርንከረ የሱስ ካምስካ ኤድንከስካንታ ኩንጋየሮ ኬዛ የጄ፥ 2 "ጭላ ባንችምና ይንታ ይንችንካንታ እሰታ እችምን ግክስባብ ባንችንም ካምዴ። 3 ባንችነረ ኤልምሳን ኤድንከስም እሰናር ከት Ꮊድንግንዳ ገቀርስካንታ ይንታ ፍክስንባብከስም ከደር ኦይቼ"፥ ኤድንከስ ማቼ እሰናር Ꮊድካንታ ዝጋከኬ።

4 ባንችና አብ ይንታ ፍክስንባብከስም አናካርንካ ኩንጋየሮ ኦይቼ፥ ኤልምስባብ ኤድንከዝደር አይሰቶ፥ ይና እሰታ እችምን ግክስትቴ፥ ገዝምንከስምኬ ሞረርስባብ መሔንከስ ማችምተ ሙዳ ሪየረ ግግምቴ ኮካንታ እስታ እችምንደር Ꮊድከቴ! ጋይሰቶ ከትካንታ ኬዝከቴ ጋይሴ። 5 ከታ ኤልምስባብከስ ማቼ ኬዘንም በህ ጋይሶ ዋልቃባብና ይንታ ዎንደር፥ አብነረ ይንታ ዛለንደር አይሴ፥ 6 ነገድባብከሰረ ፍክስንባብከስም የድሰኮ ጉጵት ደይሰኬ። 7 ኮካንታ ባንችና ዋጭሶ ይንታ ዳምንባብከስም ኦይትሶ ከትከ ደይስባብከስም ደይስሴ፥ ከታ ካተመንመረ ኖሄካ አችዝድንግንዳ ይስሴ፥ 8 ኮታ ቡር ይንታ ፍክስንባብከስመረ፥ ይና እሰንታ እችምና ግግምቴ፥ ኬዛርካ ማቼ ኤልምስባብከስ እሳ እችምንካንታ ዝግዝድባብ ማትሶ Ꮊፈራከኬ። 9 ኮካንታ ጎግን ባስንዘን አይሰቶ የ Ꮊፍስባብ ኤድንከስም ሙዳ ፈንክ እሰንታ እችምናር ኤልከቴ። ኩን ከትም ጋይሴ። 10 ክታ ፍክስንባብከሰረ ጎግንዘን ዉትሰኮ፥ ከታ ይ Ꮊፍስባብ ኤድንከስም ሙዳ ዳቅልንከስመረ፥ ኡርመንከስመረ ሳንሰኬ፥ ኮካንታ እሰንታ ጋይምሳን ኤሄን ዳልግናር ኤልምሳን ኤድንክስ ጮጨኬ።

11 "ኬዛርንካ ማቼ ባንችና ኤልምስባብከስም ሰድንካንታ ኤሄን ዳልግናር ክት አርደዳንደትካ፥ እሰንታ አፍለንም ቆበራክባብ ዋልቃ ኤችም ዋር ሰዴ። 12 ኩነረ ክትም ጋይሴ፥ ‘እስታ ገርነኖ፥ እሰንታ አፍለንም ቆበርክሳ Ꮊስግንደስ አርድካንተስ ማቻረ?’ ኤችና ማቼ ጫምንጋይሴ። 13 ባንችነረ ይንታ ፍክስንባብከስም፥ ‘ክታ አንንምኬ ዱትንም ዞክሰቶ ማል ዶቅድን ግልድድ ኡምናር ክትም ዉችት ኦይትከቴ፥ ኮታረረ ኤፍኬ አች ቅርጭካ ክትካንታ ማተረ’ ኖ ጋይሴ"።✝ 14 ኮታዘንከረ የሱስ "ኮካንታ ኤልምስባብ በድንከሰኬ፥ እድምስባብከስ ማቼ ቶክመንከሰኬ" ጋይሴ።

15 ኮታ ቡር ፈረሳውያንንከስ አይሰኮ Ꮊስ ይይሶ የሱሰም ክት ኬዝድን ኬዘንካ ከታ ይ የዳናንከረ ዞርምሰኬ፥ 16 ከታ ይንታ ካርንካ ጎርስምድባብከስም ሄሮድሰታ ኤድንከስካ ክክን የሱሰደር ኦይትሰኮ፥ "የ ኤስስንባቦ! የስ ዶፈን ማቻንደትምከ ሳብታ ጎግንም ዶፈንካ የስ ኤስዝድንደትም ዎታ ኤዝዶቴ፥ ኤታ ባላካንታ ኦስንዳከየ" ከታ ይ ጋይሳንደታ ቡር፥ ኩን ጋይሶ ክትም ኦይሰኬ። 17 "ይና ዎም የስ ኬዝኔ Ꮊሮክ የስም ካምዳ? ሮማ ባንችንካንታ ግራ ናክ ዝግዝዶ ዝክሳዮ?" ጋይሰኬ። 18 የሱስ ማቼ ከታ ዳቅል ገቅርንም ኤስሶ፥ "የታ ኦትረንባብከሶ! Ꮊረተንት እም ጰጭዳ? 19 ግረንካንታ ናከርድን ብረንም እካንታ የ ሰችነ!" ከትም ጋይሴ። ኮካንታ ከተረ ዋልቃ ብራ ጣገራ ተይᎺድሰኮ ክትም ሰችሰኬ። 20 ኖየረ፥ "ኮ ብረንዘን Ꮊፈርድንዳ ምስልንከ ጻፈርሳን ላምና Ꮊይተረ?" ጋየሮ ከትም ኦይሴ።

21 ከተረ፥ "ሮማ ባንችንቴ!" ክደር ጋይሰኬ፥ ኖየረ፥ "ኮናና ባንችንተን ባንችንካንታ ሳብትን ሳብካንታ እምከቴ" ከትም ጋይሴ። 22 ከተረ ክትም ይ ኤሰርሳንደታ ቡር ክታ ኬዘንካ በርእሰኮ ክትም ዛቅሶ አይሰኬ።

23 ኮታይካ፥ "ደእስባብከስታ አምንታ ካዬ" ጋይድባብ ሰዶቃዊያንንከስ የሱሰደር Ꮊድሰኮ ኩንጋየሮ ክትም ኦይሰኬ፥✝ 24 "የ ኤስስንባቦ! ሙሴ ‘ዋልቃ ኤድ ይንች አጣክዶቆ ይንታ ኬነንዘንካ ደእካ ክት ፋስምሴ ክታ እስመና ደእስባብታ ኬነንም ማስሶ ክትካንታ ይንች አጣ’ ጋይቴ።✝ 25 ኮትኮግንደረ ታብዛ እስመንከስ ዎንደር ዶቅደኬ፥ ከትሙደንተረ እስመነና ማና እንችሶ ይንች አጣክሳ ደእሴ፥ ኮካንታ ክታ ካንስና ደእስባብታ ኬነንም ማስሴ። 26 ኮትኮግንደረ፥ ቃስትምስነረ፥ ማክምስነረ ታብስን የለልታ ከታ ሙደነረ ኮትም እንችሰኮ ደእሰኬ። 27 ከትሙደንተረ በእንተዘን ኤተና ይንታ ማታ ደእሴ። 28 ይና፥ ከታ ታብዘነረ ኮትም እንቻንካንታ ደእናርንካ አምንተን ሰጨንካ Ꮊይቶክ ማና ማዳ?" ጋይሰኬ።

29 የሱስ ማቼ፥ "የታ ጭል ማጻፍንከስምኬ ሳብታ ዎልቀንም የንታ ኤስክሳ ነግንተንካ የታ ኮተርደቴ። 30 ደእስባብከስታ አምንተን Ꮊይካ ኤድንከስ ጭላር ዶቅድን ክታይንችንከስግንዳ ማደክ ዳት እንቻየኬ፥ ይአየኬ። 31 ጉጅሰረ ደእያርንካ አምንተንጎካ ሳብ የካንታ ኬዛንደትም ናበባከቴ? 32 ክተረ ጋይሳንዳ ኩኔ፥ ‘እታ አብራሀመታ ሳብ፥ ይሳቀታ ሳብ፥ ያይቆበታ ሳብቴ።’ ኮካንታ ሳብ ሰንፔንክንባብከስታ ሳብ ዳት ደእስባብከስታ ሳብ ካዬ" ኩን ጋይሶ ማስሴ።✝

33 ዎርሰነረ ኮም ይ ኤሰርሳንደትካ ክታ ኤስስንካ በርእሰኬ።

34 የሱስ ሰዶቃዊያንንከስም ጫምሳ ይስሳንደትም ከታ ይ ኤሰርሳንደትካ ፈረሰዊያንንከስ ዋልቃትቸካ ሳንምሰኬ። 35 ከታርንከረ ዋልቃ ሙሴታ ህግንም ኤስዝድባብ፥ የሱሰም ጰጫካንታ ዝግሶ ኩን ጋይሶ ኦይሴ፥✝ 36 "ኤስስንባቦ! ሙሴታ ህግን ሙደናርንካ ስገድንዳ ክታ Ꮊምነረ?" ጋይሰኬ። 37 የሱሰረ፥ "የስታ ጮይስ ሳብን የስታ ቦድማ ቡዳርንካ፥ ቦድማ የስታ ሰንፔንካ፥ ቦድማ የስታ ገቅርንካ ሶልምካ፥✝ 38 ሙደንዘንካ ስገድንደትከ እርንደና ክተና ኮኔ። 39 ኮትኮመረ ካምድንዳ ቃስትምስ ክተና፥ ‘የስታ የለንም የስታ ማታግንዳ ማስሳዮ ሶልምካ’ ጋይድንደኔ።✝ 40 ሙሴታ ህግንከ ሳብዘንካ ኤሰርሶ ኬዛቅባብከስታ ኤስስን ሙደንታ የድና ከትኬ ቃስተን ክቴን ኬዘንኬ" ኩንጋየሮ ከትካንታ ማስሴ።

41 ፈረሳውያንንከስ ሳንምሰኮ ዶቅድንካ የሱስ ኩን ጋይሶ ከትም ኦይሴ፥ 42 "ክርስቶስጎካ Ꮊረንት ገቀርዳ? Ꮊይታ ይንችምክ የንደር ካምዳ?" ከተረ "ዳውተታ ይንቼ" ጋይሰኮ ክትካንታ ማስሰኬ።

43 የሱሰረ፥ "ኮናና፥ ዳውት ሳብታ አያንካ ጎርስምሶ ክት ኬዛንደትካ Ꮊስግንድክ ‘ጮይስዮ’ ጋይሶ ኤልሳረ?

44 "ጮይስ እስታ ጮይስንካንታ፥

የስታ ይምኤንባብከስም የስታ ዱትንታ ጎይናር እ ሙክስተርን የለልታ፥

እስታ ምዝንዘን ዶእካ! ክትም ጋይሴ።✝

45 ይና ዳውት ይንታ ማታርንካ ‘ጮይስ’ ጋይሶ ክትም ኤልሳንካ ይና ክርስቶስ Ꮊስግንድክ ክታ ይንች ማዳ?" ኩን ከትም ጋይሴ። 46 ኮትኮ ኬዘንታ ዋልቃ ዎራ ኬዝት ማስስባብ Ꮊየነረ ኤድ ካዬ፥ ኮትኮ ሰጨንዘንካ የድሶ ክትም ኦይስካንታ ማችባብ Ꮊየነረ ካዬ።