1 ኮታዘከረ የሱስ፥ "የዘን ፋረድምተራክንግንዳ፥ Ꮊየንታ ዘነረ Ꮊይ ፋረደቴ። 2 አብንከዘን የ ፍርድን ፍርደና፥ የንታዘን ፋርድምዴ፥ ኮትኮግንደረ የ ማግድንደትካ ማስትዮ የካንታ ማክምዴ"።✝ 3 የስታ አፋር ዶቅድንደተም ቱስን ሰዳከይ ዶቆ Ꮊረተስ የስታ እስመንታ አፍናር ዶቅድን ዳቅልን ሰዳ? 4 ጉጅሶ የስታ አፍናር ቱስ ከከና ዶቅድንካ የስታ እስመንም "ይና ‘የስታ አፍናር ዶቅድን ዳቅልን ዉችትቴ’ Ꮊስግንደስ ጋይዳ? 5 የና ኦተረንባቦ! እርምሶ የስታ አፍናር ዶቅድን ቱስን ዉችካ፥ ኮታ ቡር፥ የስታ እስመንታ አፍናር ዶቅድን ዳቅልን ዉችካንታ ኡርስት ሰዳዬ"። 6 ሳብካንታ ፋስምሳን ርን ከታ ይንታ ዱትንከረ ሙግዳክንግንዳ ማተረ የም ከት ጋእዳክንግንዳ አክስንከስካንታ Ꮊይ እመቴ፥ የንታ ቦንችምሳን ርን ጉድምንከስታ እር Ꮊይ ኦይተቴ፥ ጉድምንከስ የንታ ቦንችምሳን ርን ከታ ይንታ ዱትንካ ሙግደኬ።

7 "ምክስከቴ የካንታ እምምተሬ፥ ዝከቴ የታ Ꮊፍተረቴ፥ ፍልተን ቆንከቴ የካንታ ፎችምተሬ። 8 ምግዝድባብ ሙደና ተይተሬ፥ ዝግድባብ Ꮊፍተሬ፥ ፍልተንመረ ቆንግድባብካንታ ፎችምተሬ። 9 የንታ ዎክያርንካ ክታ ይንችና እችም ኦይሴ ሰይን እምድባብ Ꮊይራ? 10 ሞለንም ምክሳን ማቼ ጉንን እምዶ? 11 ይና የታ ዳቅል ማትሶ ዶቅድ፥ የንታ ይንችንካንታ ኡርማ ሪም እምንተን የ ኤሳንካ ይና፥ ጭላር ዶቅድባብ የንታ ባበና ምግዝድባብከስካንታ Ꮊስግንዳ ስክስሶ ኡርማ ርን እማይንዳ?" 12 ይና ኤድንከስ የካንታ ይድንግንዳ የ ዝግድንደትም ሙዳ፥ የተረ ከትካንታ ኮትግንዳ ይከቴ፥ ሙሴታ ህግኬ ሳብዘንካ ኤስርሶ ከዘቅባብከስታ ኤስስነረ ኮትኮመተ።✝

13 ጩንጭማ ፍልተንካ አርድከቴ፥ ካይንተናር አርጅድንዳ ፍልተና ዳልጌ፥ ጎግነረ ኮታ ሳክምዬ። ኮትካ አይድባብ ኤድና በድንከሰኬ። 14 ኦስ ዶቅንተናር አርጅድን ፍልተና ማቼ ጩንጭሜ፥ ጎግነረ ሉጋ ጎግንግንዴ፥ ኮትም Ꮊብድባብከሰረ ቶክም ኤድንከሰኬ።

15 "ቆልታ ጉፍተም ቆበርሶ የንደር Ꮊድባብከዘንካ፥ ኬታ ዋርጎክንዳ ማቼ ቆልንም የድን ጋርመንከስግንዳ ማችባብከስ ካርከካ ሳብዘንካ ኤሰራከክዶቆ ከዝድባብከዘንካ ካርስምከቴ።✝ 16 ከትመረ የ ኤዝድንዳ ከታ ፍክስንታ አፍንኬ። ኡክምታ እክመዘንካ ዎይንታ አፍ፥ ኦንደዘንካ በለስታ አፍን ካምምዶ? 17 ኮግንደረ ኡርማ Ꮊቃ ሙደና ኡርማ አፍ ኡዝዴ፥ ዳቅል Ꮊቃ ማቼ ዳቅል አፍ ኡዝዴ። 18 ኡርማ Ꮊቀና ዳቅል አፍ ኡስካንታ ማታዬ ዳቅል Ꮊቀነረ ኡርማ አፍ ኡስካንታ ማታዬ። 19 ኡርማ አፍ ኡዝዳክን Ꮊቃ ሙደና፥ ፋክምሶ ኖሀር ኦይትምዴ። 20 ኮካንታ፥ ካርከካ ሳብዘንካ ኤሰራከክዶቆ ከዛዶቅድባብከስም ከታ ፍክስንካ ኤዝደቴ።

21 "ጭላር ዶቅድባብ እስታ ባበንታ ጋይተንም ቦድባብ ዳት ‘ጮይስዮ! ጮይስዮ!’ እም ጋይድባብ ሙደና ጭላ ባንችምናር አርድባብ ካዬ። 22 ፍርደን ሰጨንካ በድንከስ፥ ‘ጮይስዮ! ጮይስዮ! የስታ ላምንካ ቤርካ ኬዛክቶ? የስታ ላምንካ ግምዘንከስም ዉቻኮቶ? የስታ ላምንካ በድ አተንም ፍክሳኮቶ?’ እዝደር ጋይተረኬ። 23 እተረ ኮት ሰጨንᎺይካ፥ ‘ቦድሶ የም ኤዝዳክቴ! የታ ዳቅልንም ፍግዝድባብከስ እዘንካ ኦስ ጎተርከቴ!’ ከትም ጋይትቴ።✝

24 "ኮም እስታ ቃለንም ኤሰርሶ ፍክስዘን Ꮊቅዝድባብ ሙደና፥ ይንታ ኤሄንም ሰይን ላዝንዘን ዎጅባብ ኤችንም ካምዴ። 25 ዶብነረ ቃንሴ፥ ሳፍነረ ሙርግዜ፥ ዞገነረ ዞግሶ፥ ኮትኮ ኤሄንም Ꮊቅሴ፥ ማታጋካ ዳት፥ ኤሄና ሰይን ላዝንዘን ዎድምሳንካንታ ዋቻክዬ። 26 ኮም እስታ ቃለንም ኤሰርሶ ፍክስዘን Ꮊቅዝዳክባብ ማቼ፥ ኤሄንም ሸምዘን ዎጅባብ ዳቻ ኤችንም ካምዴ። 27 ዶብነረ ቃንሶ ሳፍነረ ሙርግሶ ኮትኮ ኤሄንም Ꮊቅሴ ኤሄነረ ዋቼ፥ ዋችንተነረ ኮታ ገቅዝድንዳ ማቼ"።

28 የሱሰረ ከትኬና ሪንከስም ኬዝሶ ክት በይሳንደትካ ዎርሰና ክታ ኤስስንካ በርእሰኬ። 29 ከት በርእሳንደረ ኖ ሙሴታ ህግንም ኤስዝድባብከስግንዳ ማታክዶቆ፥ ገችታ ኤራ ዶቅድባብግንዳ ከትም ኤስዝድ Ꮊቃንጎኬ።