Romanos 9

ሳብ እስራኤል ዎርሰንም እድና

1 ክርስቶሰካ ዶፍንን ኬዝድቴ፥ ማልዳክቴ፥ አያን ጭልንካ ጎርስምድንደና እስታ ገቀርንረ እ ማልዳክንድትም ማርከርዴ። 2 አንድር ሞርእኬ ነገዳክንዳ ማጣ እስታ ቡዳር ዶቅዴ፥ 3 ዋሄካ እስታ ሱሳ ማችባብ እስታ ገርነንከስካንታ ጋየርቶ እታ ክርስቶዘንካ ፋስምስቶ ሳብታ ባድና እዘን የልደረ ሶልምድት ዶቆ። 4 ከታ እስራኤልን ከሰኬ፥ ሳበረ ከትም ይንታ ይንች ማስሴ፥ ይንታ ቦንቼንም ከትካንታ መያ ማስሴ፥ ጫቀረ ኬትካንታ አርደዴ፥ ሳብ ህገረ ኬትካንታ እምቴ፥ ሳብታ ጭል ኤሄንታ ጎይንንታ ዎገን ከትካንታ ሰችሴ፥ ጉርም ቃለን ከትካንታ እምሴ።✝9፡4 ዉት. 9፡4። 5 ኬታ ይንታ አጥርንካ ኤና እሪ ባቤንከዘንካ Ꮊድባብ ከሰኬ፥ ክርስቶሰረ ዋሄካ ክት Ꮊዳንዳ ከታ ሱሰናርንኬ፥ ኖ ኬት ሙደንዘንካ ስግዬ፥ ስለንክንደተረ አንጅምስባብ ጮይስዬ፥ አምንኤ!

6 ማታጋካ ዳት ሳብታ ቃለና ኦክምቴ ጋይንት ካዬ፥ እስረልንከስታ ሱሳ ሙደና ዶፈን እስራልንከስ ካየኬ። 7 ኮት ኮግንደረ አብራሀመታ ሱሳ ሙደና አብራሀመታ ይንቸኬ ጋይንት ካዬ። ሳብ አብራሀመም "ሱሳ የስካንታ አጥምድንዳ ይሳቀኬ" ክትካንታ ጋይሳንካንቴ፥✝9፡7 ፍዝ. 21፡12። 8 ኮካንታ ዋሄካ አጠርምስባብከስ ሳብታ ይንቺ ካየኬ ኬዛርካ ማቼ ሱሳ ማትሶ ፋይድምድባብከስ Ꮊድን ጉርም ቃለንታ ይንችንከስ Ꮊከኬ። 9 ኮነረ ሳብ እምሳን ጉርም ቃለና "ታይን ለእ ስላ ኮዘን Ꮊድቴ፥ ሳረረ አⷝና ይንችና አእተሬ" ጋይድንዳ Ꮊቄ።✝9፡9 ፍዝ. 18፡10።

10 ኮነረ Ꮊክ ማታክናና ሪብቃ ኤና እሪ አጥርምስባብ ዎንታ ባቤን ማችባብ ይሳቀዝንካ መንቲ ይንችንከስም ኮት ስርሳንደትካ፥ 11 ሳብታ እድና ፍክስካ ማታክናና ኤልንተካ ማትን መያ ማስካንታ ቃስተን ይንችንከስ አጠርተርንደትኬ ዳቅልነረ ማታ ኡርመን ኬት ይተርንደታ እርምሶ 12 ሳብ ሪብቀም "ባይረና ይንታ ካንስንካንታ ቆልምድባብ ማተረ" ኮትካንታ ጋይሴ።✝9፡12 ፍዝ. 25፡23። 13 ኮነረ "ያይቆበም ሶልምሳቴ ኤሳውም ማቼ ይዝንሳተ" ጋይምሶ ጻፍምሳን ግንዴ።✝9፡13 ሚል. 1፡2-3።

14 ይና Ꮊሮንት ጋይቴ? ሳብ ኤታ ባለንካንታ ኦስንደ ጋይንትዮ? ሳብ ኤታ ባላካንታ ቦድሶ ኦስናዬ! 15 ሳብ ሙሴም "እታ አጭርካንታ እ ዝግድባብም አጨርድቴ፥ እ ሶልማካንታ ዝግድባብም ሶልምድቴ" ጋይቴ።✝9፡15 ዉት. 33፡19። 16 ኮካንታ ሳብታ እድና Ꮊፈርድንዳ ኤታ ጋይተኬ ኤታ ፍክስካ ማታክናና ሳብታ አጭርንኬ። 17 ኮት ጎካ ጭል ማጻፍናር ግብጽ ፍጨንታ ባንችንካንታ "የስካ እስታ ዎልቀን ሰችካንተኬ እስታ ላምነረ ኮ ፍጫሙደንዘን ኤስምድንግንዳ ይካንታ የስም ባንችምስትቴ" ጋይድንዳ ቃላ ጻፍምቴ።✝9፡17 ዉት. 9፡16። 18 ኮካንታ ሳብ ይዝግድባብም አጨርዴ ይዝግዳክባብመረ ጉልማባብ ክትም ማዝዴ።

ሳብታ ዋጭንኬ ክታ አጭርንካ

19 ኮካንታ "ሳብታ ጋይተን ግርካንታ Ꮊየሰነረ ማታዬ፥ ይና ኖ ኤድንከስም ከታ ዳቅል ፍክስንካ Ꮊረትክ ይንኤርዳ" ጋይሳዮ እም ኦይዝዳይ ማተራዬ። 20 የና ኤችኖ! ሳብካ ክክን በርምካንታ Ꮊራ የስታ ሽኒ ዶቅዳ? ድግድ ሪይና ኡርዝድባብም "Ꮊረተስ ኩን ይይሶ እም ኡርሳሬ?" ጋይካንታ ማዶ?✝9፡20 ኢሳ. 29፡16፤ 45፡9። 21 ድግድ ር ኡርዝድባብ ዋልቃ ካምድን ፍጨዘንካ ዋልቀን ቦንቻካንታ፥ አብን መይዳክን ፍክስካንታ ማስሶ ፍክስካንታ ክታ እብላ ካዮ?

22 ሳብ ይንታ ዋጭንም ሰችካንተኬ ይንታ ዎልቀንም መይምስካንታ ዝግሶ ካይካንታ ግግምስባብከስም በድᎺይካ ኬትም ዳንዳእታናንከረ Ꮊረስ የና ኤዝዳ? 23 ኮመረ ክት ይሳንደና እርምሶ ቦንቻካንታ ይ ግክሳን ይ አጨርስባብከስካንታ ይንታ ቦንቼንታ በድምን ሰችካንቴ። 24 ክታ አጭርና አይሁድንከስም Ꮊክ ማታክናና አይሁድ ማታክባብከሳርከረ ዎም ኤልቴ። 25 ኮነረ ሳብዘንካ ኤሰርሶ ኬዝድባብ ሆሳዕካ፥

"እስታ ዎርሳ ማታክባብከስም ‘እስታ ዎርሳ!’

ሶልምማክንባብከስም ዎርሰን ‘ሶልምምስባብ!’ ጋይስቶ ኤልድቴ፥

✝ 9፡25 ሆሴ. 2፡23። 26 ኬታ ‘እስታ ዎርሳ ካየቴ’ ጋይምሳን ካርያር፥

‘ስለንካ ዶቅድባብ ሳብንታ ይንች ጋይምሰኮ ኤልምደኬ’✝9፡26 ሆሴ. 1፡10። ኩን ጋይምሳንግንዴ"።

27 ኢሳሰረ እስራኤልንከስ ጎካ ኬዝድዮ፥ "እስራኤል ይንችንታ ፋይደነረ ባሀርናር ሻም ግንዳ በጀረ ዎራ ከታርንካ አቅድባብከስ ቶክመንከስ Ꮊከኬ፥ 28 ጮይስ ጋምአክ ዶቅሶ ሳነካ ኮ ፍጫሙደንዘን ፍርደን ፋረዴ"። ✝9፡28 ኢሳ. 10፡22-23። ኩንጋየሮ ይንታ ኡፍስንም ጬክሳ ይይሶ ኬዜ። 29 ኮትኮግንደረ ኢስያስ "ሙደንም ቆልድባብ ጮይስና ሱሳ ክት ዎካንታ ነግሳክናና ሶዶመኬ ገሞራ ካተመንከስ ካይዳንግንዳ ዎተረ ካይዶት ዶቆ" ጋየሮ እርምሶ ኬዝቴ።✝9፡29 ኢሳ. 1፡9።

እስራኤልንከስታ አሜንክሳነግና

30 ይና Ꮊሮንት ጋይዳ ጭለትችን ጎርስማክባብ አይሁድማታክባብከስ ጭለትችን Ꮊፍሰኬ፥ ኮነረ ጭለትችና አመንዘንካ Ꮊፈርድንዴ። 31 ኬዛርካ ማቼ ጭልትችን Ꮊብዝድን ሙሴታ ህግን ጎርስምድ Ꮊቅባብ እስራኤልን ከስ ህግንም ቦድክሳ ከታ ነግንተንካ ጭለትችንደር የላከኬ። 32 "Ꮊራ ጎከረ ከት ጭላትችንደር ከት የላክንደና?" ጋይምሴ ከታ ጭለትችን Ꮊፍካንታ ከት ዝግዛንደና አሜንካ ማታክናና ፍክስካ ማቻንካንቴ፥ ኮካንታ ኮተርዝድን ሰይንካ ኮተርሰከ፥ 33 ኮነረ፥

"ኮሰቸቴ ይና ኤድንከስም ኮተርዝድን ሰይንና ጽዮናር ዎድቴ፥

ኮነረ ሰይንና ኤድንከስም ኮተርስካ ዋችዝድንዳ ላዝዬ፥

ክትካ አሜንድባብ ማቼ ኦስናዬ"

ጋይምሶ ጻፍምሳን ግንዴ።