Mateus 20

Cinga̱lti ga̱ɓa na̱ ma̱n kolti zhin ka̱ zhin inabi

1 <<Guu ga̱ Nya wo na̱k ma̱n zhin gon gwe yil na̱ gasi ta̱s ngo ma̱jwe a kolit zhin ka̱ zhin inabi gwas wu ka̱n. 2 Ta̱ pa̱l ga̱m suksi ten ɗe ta ɓatlsi na̱ wulpi dinari ɗe na̱m ɗe na̱m ten ndat cin gwasa̱n, yek ta̱ laksi ka̱ zhin inabi gwasi.

3 <<Yek ta̱ yili ka̱ sa’i ga̱lla ɗe topsi, yek ta̱ yen mbala̱mi jon ten da̱mti ten koo lu ka̱ lu wulti wul ka. 4 Yek ta̱ wulsi ɗe, <Kii mago sak kola̱n zhin ka̱ zhin inabi gini, ba ɓatlkii kangwe mbun ɗe ta ɓatl wu.> 5 Yek sa̱ li ka̱ zhimi.

<<Yek ta̱ yil ɗa ka̱ dlo cin suk ka̱ sa’i ga̱lla ɗe mekan ka̱ sukti yek ta̱ po pa̱li na̱k gwisi ɗa. 6 Ta̱ po yil ɗa sa’i ga̱lla ɗe namtan ka̱ sukti yek ta̱ po yen ma̱jon ɗa a nya ba̱sa̱ na̱ma pa̱lti ilgon so, yek ta̱ wulsi ɗe, <Yek laki yek ka̱a̱ nda cin ten koo lu nu ye?> >>

7 <<Yek sa̱ ballit ɗe, <Ilgwe laki go, na̱kka̱n ma̱lgwe ilgwe ma pa̱li wu so.>

<<Yek ta̱ wulsi ɗe, <Kii mago sak kola̱n zhin ka̱ zhin ɗaaka.>

8 <<Cin nda bii wugo yek ma̱n zhimi wul ma̱lgwe ata̱ zit ang ten yenti zhimi wu ɗe, <Mbe ma̱n kolti zhin ju ta̱k ɓatlsi. Nda zhila ɓatlisi na̱ ma̱jwe pak kaal ten la̱t ka̱ zhimi wu, aka̱ paki na̱ ma̱jwe nda cina ten la̱t wu.>

9 <<Yek ma̱jwe sa̱ mbesi ka̱ sa’i ga̱lla ɗe namtan wu tulli, yek sa̱ ba̱lsi ko wokko wulpi ndat cin. 10 Yek ma̱jwe li tet ka̱ zhimi cina wu da̱m gwa we sa ba̱lsi wulpi ta̱ man ko wokko. Ama yek sa̱ ba̱l ko wokko wulpi ndat cin pak. 11 Ɗe sa̱ kan wulpi wugo, yek sa̱ njet nala̱nti ten ma̱n zhimi. 12 Asa̱ na̱ma wulti ɗe, <Ma̱jin ɗe sa̱ ya tul ka̱ kaali go sa’i ɗena̱m ka̱n sa̱ pa̱li ka̱ zhimi, ama yek ka̱ ɓatlsi ndakce sukmi ɗe ma nda cin ten kolti zhin wu.>

13 <<Ama yek ta̱ balli gon gwasa̱n ɗe, <Yela̱n gini, a tek ga̱zi so. Ale ga̱m ka̱n ma̱ pa̱li sukkii ten ɗe ta ɓatlkii wulpi dinari ɗe na̱m ɗe na̱m na̱? 14 Kan wulpi gwa ta̱k zigaa. A mik lami ɗe ta ba̱l ma̱jwe sa̱ ya tul ka̱ kaali wu ndakce sukkii. 15 Ko ba mana̱n pa̱lti ilgwe a lami wu na̱ wul gi so? Ko daka̱lti ga̱ alheri gwe a pa̱li wu ka̱n ka̱ na̱ma pa̱lti.>

16 <<Na̱k gwisi ka̱n, ma̱ji tukaali pal ɗe ji cina, a ji cina pal ɗe ma̱ji tukaali.>>