1 ✝ईदा रीति देल हे हिंग्सुरा, नीव भी तान गांड्ड उन हात्‍ती ईरी, ताकी याव परमेश्वर उन वचन मा विश्वास माळालुर रा तान चाल चलन देल अच नीव आऊक विश्वास देल जीत सकतीर. इदुरसाटी नीमी आऊन से मातचीत माळोद भी जरवत हैलेच. 2 यतिकी आंदुर नोळ्यार नीम्द चाल चलन ह्यांग पवित्र अदिक भक्तिपुर्ण आद. 3 ✝तान तान इक सुंदर माळोर साटी व्हार्या अन साझ श्रृंगार इन इस्तेमाल माळबाळी, जसा कि चुट्टी गुथसोर साटी, या बाक व्हान्ना अन बांगळागोळ, या वळ्लेव-वळ्लेव कपळा हाक्‍कोर साटी, 4 बल्‍की नीमी सुंदर नीम्द भितरी व्यक्तित्व माळतद, मुलायम मन अदिक शांत आत्मा अन्द अविनाशी सुंदरता देल युक्त आगी, परमेश्वर उन नजर दा जो किमती आईर. 5 पूर्वकाल दा भक्ति माळावाळेर आर्तेर भी, जो परमेश्वर मा पवित्र आशा ईटतोगोर, तान तान इक ईदा रीति देल सवार्सतोगोर अदिक तान तान गांड्ड उन हात्‍ती ईरतोगोर. 6 जसा सारा तान गांड्ड अब्राहम उन आग्या मान्सोर अदिक आऊक तान स्वामी अनतोगोर. ईदा प्रकार नीव भी अगर भलाई माळीर अदिक यातोदारा प्रकार इन अंज्क देल अंजतीदील, रा प्रभु पोरगोळ ठहरूसीर.

7 ✝हांग अच हे गांड्ड उरा, नीव तान हिंग्सुर सांगुळ समझदारी देल ईरी, अदिक आंदरी कमजोर आर्त जान्सकु आंदुर्द आदर माळी, परमेश्वर उन जीवन इन वरदान दा आंदरी तान सह उत्‍तराधिकारी मान्सी, ताकी नीम्द प्रार्थनागोळ दा बाधा बिळबाळुल.

8 अन्त दा नीव सप्पा मुंदरी समान विचार, सहानुभुती, तान वार्टुरगोळ से प्यार माळावाळा, दयालु अदिक नम्र आगली पायजे. 9 बुराई इन बदला बुराई माळबाळी अदिक श्राप इन बदला श्राप कोळबाळी; बल्‍की प्रत्युत्‍तर दा आशीष अच कोळी, यतिकी आशीष अच आद जो परमेश्वर नीमी कोळोद वचन कोटीदुन याग नीमी कार्सीदुन. 10 जसा शास्त्र दा लिख्सकु आद,

"अगर आव जीवन इन प्यार ताकोमोद चाहासतान,

अदिक वळ्लेव दिन नोळोद चाहासतान,

आव तान ल्यालग्या अक बुरा मातगोळ देल, अदिक तान टुट्टीगोळ इक ख्वाटा माताळदुर देल

रोक्सकु ईटी इदुर्दा अच भलाई आद.

11 आव बुराई इन सांगुळ बिळुल, अदिक भलाई इच माळुल;

आव पुरा मन देल शांती इन साटी प्रयास माळुल.

12 यतिकी प्रभु उन कण्णगोळ न्याय मा हतकु ईरताव,

अदिक आऊन किव आंदुर्द विनती दा हतकु ईरताव;

लेकीन प्रभु बुराई माळावाळेर्द विंमुख ईरतान."

13 अगर नीव भलाई माळोर साटी तयार ईत्‍तीर रा नीम्द बुराई माळावाळा बाक याव आन? 14 ✝अगर नीव सच्चाई इन कारण दुख भी नेगदीर, रा धन्य आईर; लेकीन लॉकुर्द अंजुसदुर देल अंजबाळी, अदिक घबरूसबाळी, 15 लेकीन तान मन दा मसीह अन साटी सम्मान ईटी, आऊक प्रभु जान्सकु आदर कोळी. अदिक अगर यावारा नीम इक नीम्द शुद्ध आशा अन बारा दा जो नीम दा आद समझुस्ली अनुल; रा आऊक उत्‍तर कोळोर साटी हमेशा तयार ईरी. 16 लेकीन ईद विनम्रता अदिक भलाई इन सांगुळ अच माळी. अदिक तान विवेक इक भी शुद्ध ईटी, ताकी यीशु मसीह दा नीम्द वळ्लीद चाल चलन देल नीम सम्मान आगुल अदिक निंदा माळावाळेर लॉकुर नीम्द अपमान माळाहोती लज्जित आगुल. 17 यतिकी अगर परमेश्वर उन ईदा इच्छा आद कि नीव भलाई माळोद कारण दुख नेगी, रा बुराई माळोद बदला दुख नेगोद वळ्लीद आद. 18 इदुरसाटी मसीह भी पुरा पापगोळ न्याय माळोर साटी ऊंद अच घन सोत्‍तुन, मतलब आव जो निर्दोष ईरोन नाव पापीगोळ साटी सोतोदुन कि नामी परमेश्वर उन हाती ओयुल. मय इन भाव देल रा आव कोंदकु आदुन, लेकीन आत्मा अन भाव देल जित्‍ता माळकु आदुन. 19 अदिक आऊन आत्मा अन्द स्थिती दा अच आव होगकु आ कैदी आत्मागोळ इक प्रचार माळदुन, 20 ईव अव आत्मागोळ हुव जो आ समय परमेश्वर उन आग्यागोळ मा विश्वास ईला माळतोगोर याग नूह अन्द ड्वांगा माळकु आगोद अदिक परमेश्वर धीरज इन सांगुळ हादी कायोन आग आ ड्वांगा दा थ्वाळासा मतलब सिर्फ येठ्ठ मंळसागोळ अच नीर दा टु ऊळदीदुर. 21 ईद नीर आ बपतिस्मा अन्द घाई आद यदुर देल नीम्द भलाई आगतद इदुर दा मय इन मईल तोळोद ईला बल्‍की ऊंद शुद्ध विवेक इन साटी परमेश्वर से विनती आद ईग रा बपतिस्मा नीमी यीशु मसीह अन्द पुनरूत्थान इन द्वारा ऊळस्तद. 22 आव स्वर्ग मा होगकु परमेश्वर उन ऊमा कय दी कुरतोदुन; अदिक स्वर्गदूत अदिक स्वर्गीय अधिकारी अदिक सामर्थ्य आऊन हात्‍ती माळकु आदुर.