2 Coríntios 11

पौलुस अदिक ख्वाटा प्रेरित

1 अगर नीव नान थ्वाळासा मूर्खता सहन माळ कोमायदीर रा येन ईद भला आगाईत; हव, नान सहन भी माळी. 2 ना नीम बारा दा ईर्ष्या ईटतीन ह्यांग परमेश्वर ईटतान, नीव ऊंद पवित्र कुवारा पोर इन घाई आईर, यारी ना सिर्फ ऊंद मंळसा अक, खुद मसीह अन्द सांगुळ मदा माळोद वादा माळीदिन. 3 लेकीन ना अंजतीन कि ह्यांग हाव तान चतुराई देल हवा अक बयकुस्त, हांग अच नीम सीधा साधा मन अदिक पवित्रता देल जो मसीह अन्द सांगुळ ईर पायजे, येल्यारा भ्रष्ट माळकु आगबाळुल. 4 अगर यावारा नीम हात्‍ती बंदकु यावारा दुसरा यीशु उन प्रचार माळुल, यार्द प्रचार नाव माळीदील; या यातारा दुसरा आत्मा नीमी सिकुल, जो पयले ईला सिकीदाद; या मात्‍त यावारा खुशखबरी केळसुल यदरी नीव पयले मान्सीदील, रा नीव अदरी स्वीकार माळ कोमतीर.

5 ना रा सम्सतीन कि ना यातारा मात दा धोळ से धोळ प्रेरितगोळ से गोर्त हैलेच. 6 अगर ना माताळदुर दा अनाळी आईन, तरी भी ग्यान दा गोर्त हैलेच. नाव इदरी हर मात दा सप्पा प्रकार देल नीम साटी प्रगट माळेव.

7 येन ईदुर दा ना येनारा पाप माळीन कि ना नीमी परमेश्वर उन खुशखबरी ह्यांगारा-मुंगारा केळ्सदीन; अदिक तान तान इक नम्र माळदीन कि नीव म्याकुच आगेगी? 8 ना दुसरा मंडलीगोळी लुट्सदिन, मतलब ना आंदुर से मजदूरी ताकोंडीन ताकी नीम स्यावा माळाईन. 9 ✝११:९ फिलिप्पिगोळ ४:१५-१८अदिक याग ना नीम सांगुळ ईरीन अदिक नानी गोर्त आत, रा ना यारदु मा बोझ हाक्‍कीदिल, यतिकी वार्टुर मकिदुनिया नगर टु बंदकु नान जो गोर्त ईरोद अदरी पुरा माळदुर; अदिक ना हर मात दा तान तान इक नीम मा बोझ आगदुर देल रोक्सदिन, अदिक रोक्सकु ईटाईन. 10 अगर मसीह अन्द सच्चाई नान दा आद रा अखाया द्याश दा याऊ नानी ई घमण्ड देल रोक्सतिदिल. 11 येती? येन इदुरसाटी कि ना नीम से प्यार ईटालीन? परमेश्वर ईद अरूतान कि ना प्यार ईटतीन.

12 लेकीन जो ना माळतीन, अदा माळ्त ईराइन कि जो धोळ प्रेरित मवका ढुंढ्सतार ना आ धोळ सीक गोळालीन, ताकी याता मात दा आंदुर घमण्ड माळतार, अदुर्दा आंदुर नाम्द अच घाई ठहरूसुल. 13 यतिकी ईत्‍ता लॉकुर ख्वाटा प्रेरित, अदिक छल कपट देल क्याल्सा माळावाळेर, अदिक मसीह अन्द प्रेरितगोळ्द रूप ताकोमावाळेर उर. 14 ईद येनु अचम्भा अन्द मात आल्लच यतिकी शैतान खुद भी ज्योतिर्मय स्वर्गदूत उन रूप धारण माळतान. 15 इदुरसाटी अगर आऊन सेवक भी न्याय इन सेवकगोळ्द घाई रूप ताकोमुल, रा येनु धोळ्द मात हैलेच, लेकीन आंदुर न्याय आंदुर कर्मगोळ्द अनुसार आदीत.

प्रेरित उन रूप दा पौलुस उन दुख भोगसोद

16 ना मात्‍त अनतीन, याऊ नानी मूर्ख सम्सबाळुल; ईलारा मूर्ख अच सम्सकु नान सहन माळी, ताकी थ्वाळासा ना भी घमण्ड माळ सकाईन. 17 ई आत्मविश्वास इन घमण्ड दा जो येनारा ना अनतीन, अद प्रभु उन आग्या अन्द अनुसार ईला पर मान्सी मूर्खता देल अच अनतीन. 18 याग कि हापाळ सा लॉकुर मय इन अनुसार घमण्ड माळतार, रा ना भी घमण्ड माळाईन. 19 नीव रा समझदार ईतकु खुशी देल मूर्ख लॉकुर्द सहन माळ कोमतीर. 20 यतिकी याग यावारा नीमी दास माळ कोमतान, या फायदा नेगुतान, या फसुस कोमतान, या तान तान इक धोड्डेव माळतान, या नीम बाय मा क्याबरा बडुतान, रा नीव सहन माळ कोमतीर. 21 नान अनोद अनादर इन अच बारा दा आद, मान्सी नाव इदुरसाटी निर्बल घाई ईरेव.

लेकीन याग यावारा यातोदारा मात दा हिम्मत माळतान-ना मूर्खता देल अनतीन-रा ना भी हिम्मत माळतीन. 22 येन आंदुर अच इब्रानी उर? ना भी हुईन. येन आंदुर अच इस्त्राएली उर? ना भी हुईन. येन आंदुर अच अब्राहम उन वंश उर? ना भी हुईन. 23 ✝११:२३ प्रेरितगोळ १६:२३येन आंदुर अच मसीह अन्द सेवक उर ना यर्र इन घाई अनतीन ना आंदुर से यक्कुल आईन. यक्कुल मयनत माळदुर दा; घळी घळी कैद आगदुर दा; क्वाळागोळ तिंदुर दा; घळी घळी मृत्यु उन जोखीमगोळ दा. 24 अईद घन ना यहूदीगोळ्द कय देल उंच्यालीस क्वाळागोळ तिनदिन. 25 ✝११:२५ प्रेरितगोळ १६:२२; प्रेरितगोळ १४:१९मुर घन ना बळ्सकोंड्डीन; ऊंद घन नान मा कल्लगोळ देल पथराव माळकु आत; मुर घन जहाज, यऊर मा ना येरीदिन, मुरदोदव; ऊंद ईळ्लक ऊंद हागुल ना समुद्र दा कळदिन. 26 ✝११:२६ प्रेरितगोळ ९:२३; प्रेरितगोळ १४:५ना घळी घळी यात्रागोळ दा; गांगागोळ जोखीमगोळ दा; डाकूगोळ जोखीमगोळ दा; तान जातीवाळेर देल जोखीमगोळ दा; गैरयहूदीगोळ देल जोखीमगोळ दा; नगरगोळ जोखीमगोळ दा; आळी इन जोखीमगोळ दा; समुद्र अन्द जोखीमगोळ दा; ख्वाटा वार्टुर्द न्याड्या जोखीमगोळ दा ईत्‍तीन. 27 मयनत अदिक कष्ट दा; घळी घळी च्याता ईरदुर दा; हसु-नीरअळ्क दा; घळी घळी उपास माळदुर दा; सोळ इन दिन दा; बिन फळक्या अन्द ईरदुर दा; 28 अदिक दुसरा मातगोळी बिटकु यऊर वर्णन ना माळालीन; सप्पा मंडलीगोळ्द चिन्ता हर दिन नानी वत्‍त बुळतद. 29 यार निर्बलता देल ना निर्बल आगालीन? यार्द ठोकर तिंदुर देल नान जीव नोयाल?

30 अगर घमण्ड माळोद जरूरी आद, रा ना तान निर्बलता अन्द मातगोळ मा घमण्ड माळाईन. 31 प्रभु यीशु उन परमेश्वर अदिक आप्प जो हमेशा धन्य आन, अरूतान कि ना ख्वाटा माताळालीन. 32 ✝११:३२ प्रेरितगोळ ९:२३-२५दमिश्क नगर दा अरितास राजा दी टु जो शासक ईरोन, आव नानी हुळसुसोर साटी दमिश्किगोळ्द नगर मा पयरा कुर्सकु ईटीदुन. 33 लेकीन नानी जाळी इन माळ्द फुट्टी दा कुर्सकु ऊंद दिवार इन खिळकी टु ईळ्सकु आत, ईत्‍ता प्रकार देल ना आऊन कय दा टु ऊळ्दकु होटोदिन.