1 ना तान मन दा ईदा ठान्स कोंडीदिन कि बाक मात्‍त नीम हात्‍ती नीमी उदास माळली बरतीदील. 2 यतिकी ना अगर नीमी उदास माळाईन, रा नानी खुशी कोळावाळा याव ईत्‍तान, सिर्फ आवा यारी ना उदास माळदीन? 3 अदिक ना ईदा मात नीमी इदुरसाटी लिख्सदीन कि यागल्यारा हिंग आगबाळुल कि नान बंदुर मा, यार देल नानी खुशी सीक पायजे नानी आंदुर से उदासी सिकुल; यतिकी नानी नीम सप्पा मुंदुर मा ई मात इन भरोसा आद कि जो नान खुशी आद, अदा खुशी नीम सप्पा मुंदुर्द भी आद. 4 धोळ क्लेश अदिक मन इन दुख देल ना हापाळ सा नीर कण्णगोळ दा टु वाहुसकु नीमी लिख्सीदीन, अद इदुरसाटी ईला कि नीव उदास आगी लेकीन इदुरसाटी कि नीव नान आ धोळ प्यार इक अर्त कोमी, जो नानी नीम से आद.

5 अगर यावारा नीमी दुख कोटान, रा नानी का ईला बल्‍की ना आऊन सांगुळ यक्कुल दुख इन व्यवहार माळालीन थ्वाळा-थ्वाळा नीम सप्पा मुंदरी भी उदास माळ्यान. 6 ईत्‍ता मंळसा अन्द साटी ईद दण्ड जो वार्टुर दा टु हापाळ मुंदुर कोटार, हापाळ आद. 7 इदुरसाटी ईदुर से वळ्लीद ईद आद कि आऊन अपराध माफ माळी अदिक आऊक दिलासा कोळी, ईदारा हिंग आगबाळुल आ मंळसा हापाळ उदासी दा मुळकेगुल. 8 ई कारण ना नीम से विनती माळतीन कि आऊक तान प्यार इन एहसास तोरसी. 9 यतिकी ना इदुरसाटी भी लिख्सीदीन कि नीमी वळ्लीद देल परकुस कोमाईन कि नीव नान सप्पा मातगोळ मानसोर साटी तयार आईर का ईला. 10 अगर नीव यारीकारा माफ माळतीर रा आऊक ना भी माफ माळतीन, यतिकी ना भी जो येनारा माफ माळीन, अगर हिंग माळीन, रा नीम कारण मसीह अन्द जागा दा ईतकु माफ माळीन 11 कि नाम मा शैतान उन दावपेच नळु बाळुल, यतिकी नाव आऊन युक्तिगोळ देल अनजान हैलेच.

12 ✝याग ना मसीह अन्द खुशखबरी केळ्सली त्रोआस नगर दा बंदीन, अदिक प्रभु नान क्याल्सा अक पुरा माळोर साटी ऊंद दरवाजा तेर्द बुट्टुन, 13 रा नान मन इक चैन सक्कीदील, यतिकी ना तान वार्ट तीतुस उक अल नोळीदील; इदुरसाटी आंदुर से विदा ताकोमकु ना मकिदुनिया नगर इक होटोदिन.

14 लेकीन परमेश्वर उन धन्यवाद आगुल जो मसीह दा हमेशा नामी जय इन हाब्ब दा हुळकु वयाळतान, अदिक मसीह अन्द ग्यान इन वास नाम द्वारा सप्पा जागा दा फैलुसतान. 15 यतिकी नाव परमेश्वर उन हात्‍ती उद्धार ताकोमावाळेर अदिक नाश आगावाळेर येढ्ढु मुंदुर साटी मसीह अन्द वास हुयेव. 16 थ्वाळासा लॉकुर साटी रा सोत्‍तुर घाई मृत्यु उन वास, अदिक हापाळ सा लॉकुर साटी जीवन इन घाई जीवन इन वास. ई मातगोळ्द लायक याव आन? 17 यतिकी नाव आ हापाळ मुंदुर घाई हैलेच जो तान फायदा साटी परमेश्वर उन वचन इस्तेमाल माळतार; परमेश्वर नामी कळ्यान. मन इन सच्चाई देल अदिक परमेश्वर उन सेवक आगोद नाता देल नाव परमेश्वर उक उपस्थित जान्सकु मसीह दा माताळतेव.