1 हे इस्त्राएल इन घराना, ई विलाप इन हाळ इन वचन केळ जो नीम बारा दा अनतीन:

2 "इस्त्राएल राज्य जो कुवारा पोर हुळ जो बिदोदुर,

अदिक बाक येळ सकतीदील;

आक तांद अच जमीन मा पटकुसकु आग्यार,

अदिक आक इक नेगावाळा याऊ हैलेच."

3 यतिकी परमेश्वर यहोवा ईद अनतान: "याता नगर टु हजार सैनिक होळतोगोर, अदुर दा इस्त्राएल इन घराना नोर सौ अच ऊळ्दकु ईत्तार, अदिक यदुर दा टु सौ होळतोगोर, अदुर दा हत्त मिक्कु ईत्तार."

4 यहोवा, इस्त्राएल इन घराना से ईद अनतान: नान खोज दा हती, आग जीत्ता ईत्तीर. 5 बेतेल इन खोज दा हतबाळी, गिलगाल दा प्रवेश माळबाळी, अदिक न बेर्शेबा अक होगी; यतिकी गिलगाल सहीदा गुलामी दा होदीत, अदिक बेतेल सुनसान बिद्दीत.

6 यहोवा अन खोज माळी, आग जीत्ता ईत्तीर, ईलारा आव यूसुफ उन घराना मा बेक्की घाई भळकुस्यान, अदिक अद अदरी भस्म माळीत, अदिक बेतेल दा याऊ अदुर नुनाकावाळा ईरतीदील. 7 हे न्याय इक केयपन दा बदलुसावाळेरा अदिक न्यायीपन इक मुण्ण दा मीसळुसा वाळेर लॉकुरा!

8 जो कचपचिया अदिक मृगशिरा अन बनुसावाळा हुन,

जो धोळ अंधार इक हुंजकुका अन ऊजुळ माळतान,

जो दिन इक अंधार माळकु ईळ्लक माळ कोमतान,

अदिक समुद्र अन नीर जमीन इन म्याकुच वाहुस बुळतान,

आऊन हेसुर यहोवा आद.

9 आव राटनेरी इच बलवान उन विनाश माळ कोमतान, अदिक गढ़ इन भी सत्यानाश माळतान.

10 जो कचेरी दा सच्चाई देल न्याय माळतान आऊन से आंदुर दुश्मनी ईटतार, अदिक खरा मात माताळावाळा से नफरत माळतार. 11 नीव जो कंगालगोळ्द इस्तेमाल माळतीर, अदिक आंदुर अनाज मा कर इन भार हाकतीर, ईदुरसाटी जो मान्ना नीव गळुस्द कल्लगोळ देल बनुसीर, अऊर दा ईर सकतीदील; अदिक जो मनभावनी अंगुर इन बेलीगोळ नीव हचीर, अऊर्द सार्रा कुडु सकतीदील. 12 यतिकी ना जान्सतीन कि नीम पाप भारी आव. नीव सरका मंळसा अक सतुसतीर अदिक रिस्वत ताकोमतीर, अदिक कचेरी दा गरीबगोळ्द न्याय बिगळुसतीर. 13 ई कारण जो ग्यानी ईतीदान, आव ईत्ता समय सुंगा ईरूल, यतिकी समय बुरा आद.

14 हे लॉकुरा, बुराई इक ईला, भलाई इक ढुंढ्सी. ताकी नीव जीत्ता ईत्तीर; अदिक सेनागोळव प्रभु यहोवा खराखुरा नीम सांगुळ ईत्तान ह्यांग नीव अनतीर. 15 बुराई देल दुश्मनी अदिक भलाई देल प्यार ईटी, अदिक कचेरी दा न्याय इक स्थिर ईटी; येन पता सेनागोळव प्रभु यहोवा यूसुफ उन मिग्द मंळसागोळ मा अनुग्रह माळुल.

16 ई कारण सेनागोळव प्रभु, यहोवा ईद अनतान: "सप्पा चौकगोळ दा वर्लोद याद्दा बडोद आदीत; अदिक सप्पा सळकगोळ दा लॉकुर हाय, हाय माळ्यार! आंदुर केईवाळेरी शोक माळोर साटी, अदिक जो लॉकुर विलाप माळदुर दा निपुन आर, आंदरी वर्लली याद्दा बडुली कारदार; 17 अदिक सप्पा अंगुर इन बेलीगोळ दा वर्लोद याद्दा बडोद आदीत," यतिकी यहोवा ईद अनतान, "ना नीम न्याड्या दा टु आगकु होगाईन."

18 हाय नीम मा, जो यहोवा अन दिन इन अभिलाषा माळतीर! यहोवा अन दिन देल नीम येन फायदा आदीत? अद रा ऊजुळ इन ईला, अंधार इन दिन ईत्तीत. 19 ह्यांग यावारा हुल्ली नोळकु ओळुल अदिक आऊक भालू सिकुल; या मान्या बंदकु भीती मा कय टेकसुल अदिक आऊक हाव कचुल. 20 येन ईद खरा हैलेच कि यहोवा अन दिन ऊजुळ इन ईला, उलटा अंधार इन अच ईत्तीत? हव हींग धोळ अंधार इन यदुर दा येनु उच चमक ईरतीदील.

21 "ना नीम हाब्बगोळ से दुश्मनी ईटतीन, अदिक अऊर्द इनकार माळतीन, अदिक नीम महासभागोळ से ना खुश हैलेच. 22 चाहे नीव नान साटी होमबली अदिक अन्नबलि येर्सी, तरी भी ना खुश आगतीदील, अदिक नीम पाल्स्द जनावरगोळ्द मेलबलीगोळ दी ताक्सतीदील✝5:22 यशायाह 1:11-14. 23 तान भजन इन हाळगोळ नान से दुर माळी; नीम्द सारंगीगोळ्द सूर ना केळतीदील. 24 लेकीन न्याय इक गांगा अन घाई, अदिक सच्चाई इक धारा घाई वाहुस गोळी."

25 हे इस्राएल इन घरानागोळा, नीव आळी दा च्यालीस साल ताका पशुबलि अदिक अन्नबलि येन नानी का येर्सतेला ईतीर✝5:25 प्रेरितगोळ 7:42? 26 नीव रा तान राजा अन तम्बु, अदिक तान मूर्तीगोळ्द पांळसी अदिक तान द्याव उन तारा हुडुकु वयाळतेला ईतीर. 27 ई कारण ना नीमी दमिश्क इन आप्पाटी गुलामी दा माळ बुळाईन, सेनागोळव परमेश्वर प्रभु यहोवा अन ईदा वचन आद.