1 बाक नानी आळोर साटी ऊंद सरकंडा कोटकु आत, अदिक यारारा अंदुर, "येळ, परमेश्वर उन मंदिर अदिक वेदी, अदिक अदुर दा उपासना माळावाळेर इक आळ्द कोम. 2 ✝११:२ लूका २१:२४लेकीन मंदिर इन व्हार्या अन्द आंगुळ बिट बुळ; अदरी आळुबाळ यतिकी अद गैरयहूदी इक कोटकु आग्याद, अदिक आंदुर पवित्र नगर इक ब्यालीस दिन ताका काल दिशी मेट्ट्यार. 3 ना तान येढ्ढ गवाहगोळी ईद अधिकार कोळाईन कि टाट होदुकु ऊंद हजार येढ्ढ सौ साठ दिन ताका भविष्यवाणी माळुल.

4 "ईव अवा जैतुन इन येढ्ढ मार्र अदिक येढ्ढ दिंग्या ईटव जागा हुव, जो पृथ्वी इन प्रभु उन मुंद निदुरकु ईतार. 5 अगर यावारा आंदरी नुकसान पोहचुसोद चाहासतान, रा आंदुर बाय दा टु बेक्‍की होटकु आंदुर दुश्मनगोळी भसम माळतद; अदिक अगर यावारा आंदरी नुकसान पोहचुसोद चाहास्यान, रा जरूर ईत्‍ता रीति देल कोन्सुसकु आदान. 6 आंदरी अधिकार आद कि आकाश इक बंद माळुल, कि आंदुर्द भविष्यवाणी इन दिनगोळ दा सयद बरसुसबाळुल; अदिक आंदरी सप्पा नीरनळी मा अधिकार आद कि अदरी रक्ता माळुल, अदिक याग याग चाहास्यार आग आग पृथ्वी मा हर प्रकार इंद विपत्‍ती तरूल."

7 ✝ ११:७ प्रकाशितवाक्य १३:५-७; १७:८ याग आंदुर्द गवाही कोटकु आगेदीत, रा अद पशु जो अथाह अधोलोक दा टु होट्टीत, आंदुर से लळाई माळकु अवरी जीतुसित अदिक आंदरी कोंद बुट्टीत. 8 आंदुर लाश आ धोळ्द नगर इन चौक दा बिदकु ईत्‍ताव, यदरी आत्मिक रूप देल सदोम अदिक मिस्त्र अंदकु आगतद, यल आंदुर प्रभु भी क्रूस मा येर्सकु आगिदुन. 9 सप्पा लॉकुर अदिक कुलगोळ अदिक भाषागोळ अदिक जातीगोळ्द लॉकुर आंदुर मुर्दागोळी इक साढ़े मुर दिन ताका नोळतेला ईत्‍तार, अदिक आंदुर मुर्दागोळ इक कब्र दा ईट कोळतीदील. 10 धरती मा ईरावाळेर आंदुर सोत्‍तुर देल खुश अदिक मग्न आदार, अदिक आबुर दाबुर हात्‍ती भेंट कळ्यार, यतिकी ई दिनगोळ दा भविष्यवक्तागोळ धरती मा ईरावाळेर इक सतुस्यार. 11 लेकीन साढ़े मुर दिन इन बाद्दा परमेश्वर उन दी टु जीवन इन श्वास आंदुर दा होक्त, अदिक आंदुर तान कालगोळ ताकत देल निदरेदुर, अदिक आंदुर नोळावाळेर मा धोळ्द अंज्क तुम्मेत. 12 आग आंदरी स्वर्ग टु ऊंद धोळ्द शब्द केळ बत्‍त, "ईल म्याकुच बरी!" ईद केळकु आंदुर बादल मा सवार आगकु तान दुश्मनगोळ नोळतेला अच स्वर्ग मा येरेदुर. 13 ✝११:१३ प्रकाशितवाक्य ६:१२; १६:१८बाक आ घळी ऊंद धोळ्द भूकम्प आत, अदिक नगर इन दहावा भाग बिदोत; अदिक आ भूकम्प देल येळ हजार मंळसागोळ सोतोदुर, अदिक बाकी नोर जो ऊळ्दकु ईरोर आंदुर अंजेदुर अदिक स्वर्ग इन परमेश्वर उन महिमा माळली कुरतुर.

14 दुसरा परेशानी बितसेत; नोळी, तिसरा परेशानी जल्दी बरावाळा आद.

15 याग सातवा स्वर्गदूत तुरही ऊरदुन, रा स्वर्ग दा ई बारा दा धोड्डेव-धोड्डेव शब्द आगली कुरतव: "दुनिया अन राज्य नामव प्रभु उन अदिक आऊन मसीह अन्द आगेत, अदिक आव हमेशा हमेशा राज्य माळ्यान." 16 आग चौबीसा स्याणा लॉकुर जो परमेश्वर उन मुंद तान तान सिंहासन मा कुर्तकु ईरोर, बाय इन भार देल बिदकु परमेश्वर उक प्रणाम माळकु 17 ईद अनली कुरतुर,

"हे सर्वशक्तिमान प्रभु परमेश्वर, जो आन अदिक जो ईरोन,

नाव नीन धन्यवाद माळतेव कि नी तान धोळ्द सामर्थ्य

इक क्याल्सा दा तनकु राज्य माळ्या.

18 अन्य जातीगोळ सिट्ट दा तुमकु ईरोर,

लेकीन नींद प्रकोप बंदकु बित्‍त,

अदिक अद समय बंदाद कि जो सोत्‍तुर आंदुर्द न्याय माळकु आगुल,

अदिक नीनोर दास परमेश्वर उन बातणी केळसावाळेर

अदिक पवित्र लॉकुरी अदिक आ स्याण धोड्डेर इक जो नींद हेसुर देल अंजतार

बदलुस्कु आगुल,

अदिक पृथ्वी इक बिगळुसा वाळेर इक नष्ट माळकु आगुल."

19 ✝ ११:१९ प्रकाशितवाक्य ८:५; १६:१८; प्रकाशितवाक्य १६:२१ आग परमेश्वर उन जो मंदिर स्वर्ग दा आद अद तेरकु आत, अदिक आऊन मंदिर दा आऊंदा वाचा अन्द संदुक कांळ्सत; अदिक बिजलीगोळ अदिक शब्द अदिक गर्जन अदिक भूकम्प आदव अदिक धोड्डेव ओला बिद्दव.