1 बाक स्वर्ग दा ऊंद धोळ्द चिन्ह कांळ्सत, मतलब ऊंद आर्त जो सुर्य होदुकु ईरोर, अदिक बेळदिंग आकिन काल दिशी ईरोद, अदिक आकिन ताल्ला मा हन्नेळ तारागोळ्द मुकुट ईरोद. 2 आक व्हाट्या दी आदुर, अदिक किटरोर, यतिकी आक प्रसव इन दुख दा ईरोर.

3 ऊंद अदिक चिन्ह स्वर्ग दा कांळ्सत; अदिक नोळी, ऊंद धोळ्द क्याचांद अजगर ईरोद, अदरी येळ ताल्ला अदिक हत्‍त गॉट्टा ईरव, अदिक अदुर्द ताल्ला मा येळ राजमुकुट ईरव. 4 अदुर पुसटी आकाश इन तारा अन्द ऊंद तिहाई इक जेडुकु पृथ्वी मा हाक कोम्त. अद अजगर येनारा ईरोर आ आर्त इन मुंद ईरोद, निदुर्त कि याग आक चिग्द हाळदार रा आ चिग्द उक नुंग कोमुल. 5 आक पार हाळदुर जो लोवा अन्द छळी इक ताकोमकु सप्पा जातीगोळ मा राज्य अन्द साटी बंदीदुन, अदिक आव पार एकाएक परमेश्वर उन हात्‍ती अदिक आऊन सिंहासन इन हात्‍ती नेगुकु पोहचुस्कु आदुन; 6 अदिक आ आर्त आ आळी दा ओळतेला होदुर यल परमेश्वर उन दी टु आकिन साटी ऊंद जागा तयार माळकु आगीत कि अल आक ऊंद हजार येढ्ढ सौ साठ दिन ताका सालकु आगुल.

7 ✝बाक स्वर्ग दा लळाई आत, मीकाईल अदिक आऊन स्वर्गदूत अजगर इन सांगुळ लळाई माळली होट्टुर; अदिक अजगर अदिक अदुर दूत आऊन सांगुळ लळुसदव. 8 लेकीन प्रबल आगीदील, अदिक स्वर्ग दा आंदुर साटी बाक जागा ईतीदील. 9 ✝आग अद धोळ्द अजगर, मतलब अदा हाळोद हाव जो इब्लीस अदिक शैतान कहलुसतद अदिक पुरा दुनिया अक भरमुसावाळा हुन, पृथ्वी मा केळसुस्कु आत, अदिक अदुर दूत अदुर सांगुळ केळसुस्कु आदव. 10 बाक ना स्वर्ग टु ईद धोळ्द शब्द बरतेला केळदीन,

"ईग नाम परमेश्वर उन उद्धार अदिक सामर्थ्य

अदिक राज्य

अदिक आऊन मसीह अन्द अधिकार प्रगट आग्याद,

यतिकी नाम वार्टुर मा दोष हचावाळा,

जो ईळ्लक हागुल नाम परमेश्वर उन मुंद

आंदुर मा दोष हचतोगोन केळसुस्कु आदुन."

11 "आंदुर म्यांडा अन्द पाड्डा अन कारण

अदिक तान गवाही इन वचन इन कारण

आऊन मा जयवन्त आदुर,

अदिक आंदुर तान जीव इक प्रिय जानसीदिल,

ईल ताका कि मृत्यु भी सहन माळ कोंडुर."

12 "ई कारण हे स्वर्गगोळा अदिक अदुर्दा ईरावाळेरा,

मग्न ईरी; हे पृथ्वी, अदिक समुद्र, नीम मा हाय!

यतिकी शैतान बळा सिट्ट इन सांगुळ नीम हात्‍ती ईळुकु बंदुन,

यतिकी जान्सत्या कि थ्वाळासा अच समय अदिक बाकी आद."

13 याग अजगर नोळ्त कि ना पृथ्वी मा केडुकु आगेदीन, रा आ आर्त इक जो पार हाळीदुर, सतुस्त. 14 लेकीन आ आर्त इक धोळ गीधाळ इन येढ्ढ पिक्‍का कोटकु आगीदव कि हाव उन मुंद टु ऊळुसकु आळी दा आ जागा दा होटोगुल, यल अद ऊंद समय अदिक समयगोळ, अदिक आर्धा समय ताका पालस्कु आगुल. 15 अदिक हाव आ आर्त इन हिंद तान बाय देल गांगा अन्द घाई नीर वाहुस्त कि आकी ई गांगा देल वाहुस बुळुल. 16 लेकीन पृथ्वी आ आर्त इन सहायता माळ्त, अदिक तान बाय खोल्सकु आ गांगा अक जो अजगर तान बाय देल वाहुसीदुन कळुत. 17 आग अजगर आर्त मा गुस्सा आत्त, अदिक आकिन बाकी नव चिकोर देल, जो परमेश्वर उन आग्यागोळ इक मानसोर अदिक यीशु उन गवाही कोळदुर मा स्थिर आर, लळाई माळली होत्त. 18 अदिक अद समुद्र अन्द धुळा मा होगकु नीदुरकु ईत्त.