मोहरबन्द किताब अदिक म्यांडा अन्द पाड्डा
1 जो सिंहासन मा कुर्तकु ईरोन, ना आऊन ऊम्मा कय दा ऊंद किताब नोळदीन जो बुळ्क अदिक व्हार्या टु लिख्सकु ईरोद, अदिक अद येळ मोहर हचकु बंद माळकु आगीत. 2 बाक ना ऊंद ताकतवर स्वर्गदूत उक नोळदीन जो धोळ शब्द देल ईद प्रचार माळतोगोन, "ई किताब इक तेरोद अदिक अदुर्द मोहर मुरोद लायक याव आन?" 3 लेकीन ना स्वर्ग दा, ना पृथ्वी मा, ना पृथ्वी इन ल्यालमा यावारा आ किताब इक तेरोद या अदुर मा दृष्टी हाक्कोद लायक होट्टुन. 4 आग ना हुदक्या कोट कोटकु वर्ली हतदीन, यतिकी आ किताब इक तेरोद या अदुर मा दृष्टी हाक्कोद लायक याऊ सिकिदील. 5 ईदुर मा आ स्याणागोळ दा टु ऊंद नान से अंदुन, "वर्लबाळ; नोळ, यहूदा अन्द गोत्र नव अद हुल्ल जो दाऊद उन मुल आद, आ किताब इक तेरोद अदिक अदुर्द येळु मोहरगोळ मुरोद साटी जयवन्त आग्याद."
6 आग ना आ सिंहासन अदिक नाकु प्राणीगोळ अदिक आ स्याणागोळ्द न्याड्या दा, मतलब ऊंद बली कोळ्द म्यांडा अन्द पाड्डा नीदुरकु नोळदीन. अदुर येळ गॉट्टा अदिक येळ कण्णगोळ ईरव; ईव परमेश्वर उन येळु आत्मागोळ हुव, जो सप्पा धरती मा कळुकु आग्याव. 7 आव बंदकु आऊन ऊम्मा कय देल जो सिंहासन मा कुर्तकु ईरोन, आ किताब हुळ्द कोंडुन. 8 याग आव किताब हुळ्द कोंडुन, रा अव नाकु प्राणी अदिक ईप्पतनाक इन ईप्पतनाक स्याणा लॉकुर आ म्यांडा अन्द पाड्डा अन्द मुंद बिदोदुर. आंदुर दा टु हर ऊंद जन उन कय दा वीणा अदिक ऊदबत्ती, जो पवित्र लॉकुर्द प्रार्थनागोळ हुव, देल तुमकु व्हान्ना नव कटोरा ईरव. 9 आंदुर ईद व्हाशोद हाळ हाळली कुरतुर,
"नी ई किताब इक हुडोद, अदिक ईदुर्द मोहरगोळ
तेरोद लायक आय;
यतिकी नी बली आगकु तान रक्ता देल
हर ऊंद कुल अदिक भाषा अदिक लॉकुर अदिक
जाती दा टु
परमेश्वर उन साटी लॉकुरी कोंड्या, 10 ५:१० प्रकाशितवाक्य १:६अदिक आंदरी नाम परमेश्वर उन साटी ऊंद
राज्य अदिक याजक माळ्द;
अदिक आंदुर धरती मा राज्य माळतार."
11 याग ना नोळदीन, रा आ सिंहासन अदिक आ प्राणीगोळ अदिक आ स्याणागोळ नाकु दी हापाळ सा स्वर्गदूतगोळ्द शब्द केळदीन, यार गिनती लाखों अदिक करोळो अन्द ईरोद, 12 अदिक आंदुर धोळ शब्द देल अनतोगोर,
"बली कोळ्द म्यांडा अन्द पाड्डा अच
सामर्थ्य अदिक धन अदिक ग्यान अदिक ताकत अदिक आदर
अदिक महिमा अदिक धन्यवाद इन लायक आद!"
13 बाक ना स्वर्ग दा अदिक धरती मा अदिक धरती इन ल्यालमा अदिक समुद्र अन्द सप्पा माळ्द वस्तुगोळी,
अदिक सप्पा येनारा जो अऊर दा आव, ईद अनतेला केळदीन,
"जो सिंहासन मा कुर्तकु आन आऊन अदिक म्यांडा अन्द पाड्डा अन्द धन्यवाद
अदिक आदर अदिक महिमा अदिक राज्य हमेशा ईरूल!"
14 अदिक नाकु प्राणीगोळ आमीन अंदव, अदिक स्याणागोळ बांगकु दण्डवत माळदुर.