1 याग नीव मसीह अन्द सांगुळ जित्ता माळकु आगीर, इदुरसाटी तान दिल इक स्वर्गीय मातगोळ मा हची, यल मसीह तान ऊम्मा कय दी विराजमान आन अदिक परमेश्वर उन ऊम्मा कय दी कुर्तकु आन. 2 पृथ्वी माकळव वस्तुगोळ ईला लेकीन स्वर्गीय वस्तुगोळ मा ध्यान हची, 3 यतिकी नीव रा सोतोगीर अदिक नीम्द जीवन मसीह अन्द सांगुळ परमेश्वर दा होचकु आद. 4 नीम खरा जीवन मसीह हुन याग मसीह प्रगट आदान, आग नीव भी आऊन सांगुळ महिमा सहित प्रगट माळकु आदीर.
हाळोद अदिक व्हाशोद जीवन
5 इदुरसाटी पृथ्वी माकळव तान आ संसारिक इच्छागोळी कोंद बुळी जो नीम दा कार्य माळतद, मतलब व्यभिचार, अशुध्दता, दुष्कामना, बेकार लालसा अदिक लोभ इक जो मूर्तिपूजा अन्द बराबर आद. 6 यतिकी ईवा मातगोळ कारण जो आऊन आग्या मान्सालुर आंदुर मा परमेश्वर उन सिट्ट प्रगट आगली होगेत्याद. 7 अदिक ऊंद समय ईरोद याग नीव भी ईत्तव इच्छागोळ अनुसार तान जीवन जीऊसतोगीर, अदिक नीम जीवन आऊंदा प्रभुत्व दा का ईरोद.
8 लेकीन ईग नीव भी ईव सप्पा मातगोळी, मतलब सिट्ट, उत्तेजना, बैरभाव, अपमान अदिक बाय देल बोयोद ईव सप्पा मातगोळ बिट बुळी. 9 ३:९ इफिसिगोळ ४:२२आबुर दाबुर से ख्वाटा माताळबाळी, यतिकी नीव हाळोद स्वभाव इक आऊन आदतगोळ सांगुळ ईळ्स कोंडीर. 10 ३:१० इफिसिगोळ ४:२४अदिक व्हाशोद व्यक्तित्व अक धारण माळ कोंडीर, जो तान सृजनहार इन स्वरूप दा पुरा ग्यान प्राप्त माळोर साटी लगातार व्हाशोद बन्सतेला ईरतद. 11 अदिक ईदुर परिणाम ईद आद कि अल यहूदी अदिक गैरयहूदी दा येनु फरक ईराल, अदिक ना रा यातोदारा खतना माळ्द अदिक खतनारहित दा, अदिक ना यातोदारा सभ्य अदिक ना असभ्य दा, ना दास अदिक ना स्वतंत्र मंळसा दा, लेकीन मसीह अच सब येनारा हुन अदिक सप्पा विश्वासीगोळ दा मसीह अन्द वास आद.
12 ३:१२ इफिसिगोळ ४:२ अदिक नीव परमेश्वर उन लॉकुर हुईर आव नीम से प्यार माळतान अदिक आव तान पवित्र आगोर साटी नीम चुनाव माळ्यान. रा बाक सहानुभुती, दया, नम्रता, कोमलता अदिक धीरज इक धारण माळी. 13 ३:१३ इफिसिगोळ ४:३२अदिक अगर यारीकारा यारदारा मा दोष हचोद यातारा कारण ईरूल, रा आबुर दाबुर सहन माळी अदिक आबुर दाबुर्द अपराध माफ माळी; ह्यांग प्रभु नीम्द अपराध माफ माळदुन, हांग अच नीव भी माळी. 14 अदिक ई सप्पा मातगोळ अलावा प्यार इक धारण माळी, प्यार अच सप्पा मुंदुरी आपस दा कटकु ईटतद अदिक परिपुर्ण माळतद. 15 नीम साटी होगावाळा निर्णयगोळ मा अद शांती इन जो मसीह देल प्राप्त आगतद मार्गदर्शन ईरूल, इदुरसाटी परमेश्वर नीमी ऊंदा सांगुळ आ शांती दा ऊंद मय आगोर साटी कारस्यान. अदिक हमेशा धन्यवाद माळ्त ईरी. 16 ३:१६ इफिसिगोळ ५:१९,२०तान सप्पा संपन्नता अन्द सांगुळ मसीह अन्द बातणी नीम दिलगोळ दा वास माळुल. अदिक तान सप्पा बुद्धी देल आबुर दाबुर इक शिक्षा अदिक निर्देश कोळ्त ईरी. भजनगोळ स्तुति अदिक आत्मिक हाळगोळी हाळतेला तान दिलगोळ दा परमेश्वर उक धन्यवाद कोळ्त ईरी. 17 जो येनारा भी नीव माळी या अनी अद सप्पा प्रभु यीशु उन हेसुर मा आग पायजे, अदिक आऊन द्वारा परमेश्वर आप्प उन धन्यवाद माळी.
व्हाशोद जीवन इन पारिवारिक नियम
18 ३:१८ इफिसिगोळ ५:२२; १ पतरस ३:१ हे हिंग्सुरा, तान तान गांड्डुर्द हात्ती ईरी, ह्यांग मसीह अन्द अनुयायीगोळी शोभा कोळतद.
19 ३:१९ इफिसिगोळ ५:२५; १ पतरस ३:७ हे गांड्डुरा, तान तान हिंग्सुर से प्यार ईटी, अदिक आंदुर से कठोर व्यवहार माळबाळी.
20 ३:२० इफिसिगोळ ६:१ हे चिकोरा, सप्पा मातगोळ दा तान तान मोय-आप्प उन आग्या अन्द पालन माळी, यतिकी मसीह अनुयायी इन ईत्ता व्यवहार देल परमेश्वर प्रसन्न आगतान.
21 ३:२१ इफिसिगोळ ६:४ हे मोय आप्पुरा, तान चिकोर इक तंग माळबाळी, हिंग आगबाळुल कि आंदुर्द साहस मुरदोगुल.
22 ३:२२ इफिसिगोळ ६:५-८ हे सेवकगोळा, जो मय इन अनुसार नीम्द स्वामी आन, सप्पा मातगोळ दा आंदुर्द आग्या अन्द पालन माळी, सिर्फ लॉकुरी खुश माळोर साटी अदा समय ईला याग आंदुर नोळतेला आर, बल्की खरा मन देल आंदुर्द मान्सी यतिकी नीव प्रभु उन आदर माळतीर. 23 जो येनारा क्याल्सा नीव माळतीर, तान पुरा मन देल माळी, ईद सम्सकु कि मंळसागोळ्द साटी ईला लेकीन प्रभु उन साटी माळतेव; 24 याद ईटी कि प्रभु ईदुर प्रतिफल नीमी कोट्टान जो आव तान लॉकुर साटी ईट्यान, यतिकी मसीह खरा स्वामी हुन यार्द नीव स्यावा माळतीर. 25 ३:२५ इफिसिगोळ ६:९जो अपराध माळतान आव तान अपराध इंद फल ताकोंडान, यतिकी परमेश्वर यारदारा सांगुळ पक्षपात माळालुन.