1 इदुरसाटी हे नान प्रिय वार्टुरा, यदुर दा नान जीव हतकु ईरतद, जो नान खुशी अदिक मुकुट हुईर, हे प्रिय वार्टुरा, प्रभु दा हिंगा हादी कायतेला स्थिर ईरी.

2 ना यूओदिया अक भी विनती माळतीन अदिक सुन्तुखे अक भी, कि आंदुर प्रभु दा ऊंद विचार आगकु ईरूल. 3 हे खरा सहकर्मी, ना नीन से भी विनती माळतीन कि नी आ आर्तेर मदत माळ, यतिकी आंदुर नान सांगुळ खुशखबरी प्रचार माळदुर दा, क्लेमेंस अदिक नान दुसरा सहकर्मीगोळ सांगुळ मयनत माळदुर, यार्द हेसुर जीवन इन किताब दा लिख्सकु आव. 4 प्रभु दा हमेशा खुश ईरी; ना मात्‍त अनतीन, खुश ईरी. 5 नीम कोमलता सप्पा मंळसागोळ मा प्रगट आगुल. प्रभु हात्‍ती आन. 6 यातोदु मात इन चिन्ता माळबाळी; लेकीन हर ऊंद मात दा नीम निवेदन, प्रार्थना अदिक विनती इन द्वारा धन्यवाद इन सांगुळ परमेश्वर उन मुंद उपस्थित माळकु आगुल. 7 आग परमेश्वर उन शांती, जो सप्पा मुंदुर समझ इन व्हार्या आद, नीम मन अदिक नीम विचारगोळी मसीह यीशु दा सुरक्षित ईट्टीत. 8 इदुरसाटी हे वार्टुरा, जो जो मातगोळ सच्चाई आव, अदिक जो जो मातगोळ आदरणीय आव, अदिक जो जो मातगोळ उचित आव, अदिक जो जो मातगोळ पवित्र आव, अदिक जो जो मातगोळ सुहावनी आव, अदिक जो जो मातगोळ मनभावनी आव, मतलब जो भी सदगुण अदिक प्रशंसा अन्द मातगोळ आव अऊर मा ध्यान हचतोगी. 9 जो मातगोळ नीव नान हात्‍ती टु कलतीर, अदिक ग्रहण माळदीर, अदिक केळदीर, अदिक नांदुर्दा नोळदीर, अऊर्दा पालन माळतोगी, आग परमेश्वर जो शांती नव सोता आन नीम सांगुळ ईत्‍तान.

10 ना प्रभु दा हापाळ खुश आईन कि ईग ईस दिनगोळ बाद्दा नीम चिन्ता नान बारा दा मात्‍त जागृत आग्याद; निश्चय नीमी सुरूवात दा भी इदुर्द विचार ईरोद, लेकीन नीमी मवका सिकिदील. 11 ईद ईला कि ना तान कमी इन कारण ईद अनतीन यतिकी ना ईद कलतीन कि याता दशा दा आईन; अदा दशा दा संतुष्ट ईराइन. 12 ना दीन आगोद भी जान्सतीन अदिक वाळुसोद भी जान्सतीन; हर ऊंद मात अदिक सप्पा दशागोळ दा ना संतुष्ट आगोद, उपास ईरोद, अदिक वाळुसोद-घटुसोद कलतीन. 13 जो नानी सामर्थ्य कोळतद अदुर दा ना सप्पा येनारा माळ सकतीन.

14 तरी भी नीव वळ्लीद माळदीर कि नान क्लेश दा नान सहभागी आदीर. 15 हे फिलिप्पिगोळा, नीव खुद भी जान्सतीर कि खुशखबरी प्रचार इन सुरूवात दा, याग ना मकिदुनिया टु विदा आदीन, आग नीमी बिटकु मात्‍त यातोदु मंडली लेन देन इन बारा दा नान सहायता माळीदिल. 16 ✝✝ईदा प्रकार याग ना थिस्सलुनीके दा ईरीन, आग भी नीव नान कमी पुरा माळोर साटी ऊंद घन येन उलटा येढ्ढ घन येनारा कळीदिर. 17 ईद ईला कि ना दान बेळोद चाहासतीन लेकीन ना हिंग काय चाहासतीन जो नीम फायदा साटी वाळुस्त होगुल. 18 नान हात्‍ती सप्पा येनारा आद, उलटा हापाळ पुरा भी आद; जो वस्तुगोळ नीव इपफ्रुदीतुस उन कय देल कळीदिर अवरी प्राप्त माळकु ना संतुष्ट आगेगिन, अद रा सुखदायक सुगन्ध, ग्रहण माळा लायक बलिदान आद, जो परमेश्वर उक वळ्लीद हततद. 19 नान परमेश्वर भी तान आ धन इन अनुसार जो महिमा सांगुळ मसीह यीशु दा आद, नीम हर ऊंद कमी इक पुरा माळीत. 20 नाम परमेश्वर अदिक आप्प उन महिमा हमेशा हमेशा आगतेला ईरूल. आमीन.

21 हर ऊंद पवित्र जन उक, जो यीशु मसीह दा आन नमस्कार अनी. जो वार्ट नान सांगुळ आन, नीमी नमस्कार अनतार. 22 सप्पा पवित्र लॉकुर, विशेष माळकु जो कैसर उन घराना नोर उर, नीमी नमस्कार अनतार.

23 नाम प्रभु यीशु मसीह अन्द अनुग्रह नीम आत्मा अन्द सांगुळ ईरूल.