1 इदुर मा पिलातुस यीशु उक क्वाळा बळसुसदुन. 2 सिपाहीगोळ मुळ्लगोळ मुकुट माळकु आऊन ताल्ला मा ईटदुर, अदिक जांभळा कलर इन कपळा हाकसुसदुर. 3 अदिक आऊन हात्‍ती खुशी देल बंद बंदकु अनली कुरतुर, "हे यहूदीगोळ राजा, प्रणाम!" अदिक आऊक क्याबरा भी बळदुर. 4 आग पिलातुस मात्‍त व्हार्या होटकु लॉकुर से अंदुन, "नोळी, ना आऊक नीम हात्‍ती मात्‍त व्हार्या तरतीन; ताकी नीव जान्सी कि आऊन दा नानी येनु भी दोष सिक्‍कीदील." 5 आग यीशु मुळ्लगोळ मुकुट अदिक जांभळा कलर इन कपळा हाक्‍कु व्हार्या होट्टुन; अदिक पिलातुस आंदुर से अंदुन, "नोळी, ईव मंळसा!" 6 "याग प्रधान याजकगोळ अदिक चौकीदारगोळ आऊक नोळदुर, रा चिल्ळासकु अंदुर, आऊक क्रूस मा येर्स, क्रूस मा!" पिलातुस आंदुर से अंदुन, "नीव अच आऊक हुळकु क्रूस मा येरसी, यतिकी नानी आऊन दा येनु दोष सिक्‍कीदील." 7 यहूदीगोळ आऊक उत्‍तर कोट्टुर, "नाम्द भी व्यवस्था आद अदिक आ व्यवस्था अन अनुसार आव कोंद बुळोद योग्य आन, यतिकी आव तान तान इक परमेश्वर उन पार माळदुन." 8 याग पिलातुस ईद मात केळदुन रा अदिक भी अंजेदुन, 9 अदिक मात्‍त किला अन बुळ्क होदुन अदिक यीशु से अंदुन, "नी येलेव हुय?" लेकीन यीशु आऊक येनु भी उत्‍तर कोटीदील. 10 इदुर मा पिलातुस आऊन से अंदुन, "नान से येती माताळाल? येन नी जान्साल कि नीनी बिट बुळोद अधिकार नानी आद, अदिक नीनी क्रूस मा येरसोद भी अधिकार नानी आद." 11 यीशु उत्‍तर कोट्टुन, "अगर नीनी म्याकुच टु कोटकु ईला आगाईत, रा नीन नान मा येनु अधिकार ईला ईराईत; इदुरसाटी याव नानी नीन कय दा हुळसुस्यान आऊन पाप यक्कुल आव." 12 इदुर मा पिलातुस आऊक बिट बुळोद चाहासदुन, लेकीन यहूदीगोळ चिल्ळास चिल्ळासकु अंदुर, "अगर नी ईऊक बिटबुट्या, रा नीन भक्ति कैसर सरकार उन दी हैलेच. जो यावारा तान तान इक राजा माळतान आव कैसर सरकार इन सामना माळतान." 13 ई मातगोळी केळकु पिलातुस यीशु उक व्हार्या तंदुन अदिक आ जागा कल्ल इन ऊंद चबूतरा ईरोद जो इब्रानी भाषा दा "गब्बता" कहलुसतद, अदिक अल न्याय आसन मा कुरतुन. 14 ईद फसह अन तयारी इन दिन ईरोद, अदिक सहावा घंटा अन लगभग ईरोद. आग आव यहूदीगोळ से अंदुन, "नोळी नीम राजा!" 15 लेकीन आंदुर चिल्ळासदुर, "ओय! ओय! आऊक क्रूस मा येर्स!" पिलातुस आंदुर से अंदुन, "येन ना नीम राजा अक क्रूस मा येरसाईन?" प्रधान याजकगोळ उत्‍तर कोट्टुर, "कैसर सरकार उक बिटकु नाम याऊ राजा हैलेच." 16 आग पिलातुस यीशु उक आंदुर कय दा कोट बुटुन ताकी आव क्रूस मा येर्सकु आगुल.

इदुरसाटी आंदुर आऊक तान कबजा दा माळदुर. 17 आग आंदुर यीशु उक ओतुर, अदिक आव तान क्रूस नेगुकु आ जागा ताका व्हार्या होदुन, जो "खोपळी इन जागा" अनकु आगतद अदिक इब्रानी भाषा दा "गुलगुता." 18 अल आंदुर आऊक अदिक आऊन सांगुळ अदिक येढ्ढ मंळसागोळी क्रूस मा येर्सदुर, ऊंद इक इत्‍त अदिक ऊंद इक आत्‍त, अदिक न्याड्या दा यीशु उक. 19 पिलातुस ऊंद दोष चिट्ठी लिख्सकु क्रूस मा हच बुटुन, अदिक अदुर दा ईद लिख्सकु ईरोद, "यीशु नासरी, यहूदीगोळ राजा." 20 ईद दोष चिट्ठी हापाळ सा यहूदीगोळ वाचुसदुर, "यतिकी अद जागा यल यीशु क्रूस मा येर्सकु आगीदुन नगर इन हाती ईरोद; अदिक चिट्ठी इब्रानी अदिक लतीनी अदिक ग्रीक भाषा दा लिख्सकु ईरोद. 21 आग यहूदीगोळ प्रधान याजकगोळ पिलातुस से अंदुर, ‘यहूदीगोळ राजा’ लिख्सबाळ लेकीन ईद कि ‘आव अंदुन’ ना यहूदीगोळ राजा हुईन." 22 पिलातुस उत्‍तर कोट्टुन, "ना जो लिख्स बुटीन, अद लिख्स बुटीन." 23 याग सैनिक यीशु उक क्रूस मा येर्स बुटुर, रा आऊन कपळा हुळकु नाक भाग माळदुर, हर सैनिक उन साटी ऊंद भाग, अदिक कुळता. भी ताकोंडुर, लेकीन कुळता. बिना होल्दकु म्याकुच टु ल्यालमा ताका बन्सकु ईरोद. 24 इदुरसाटी आंदुर आपस दा अंदुर, "नाव इदरी हरालेव, लेकीन इदुर मा चिट्ठी हाक्‍केव कि ईद यार्द आदीत." ईद इदुरसाटी आत कि पवित्रशास्त्र दा जो लिख्सकु आद पुरा आगुल

"आंदुर नान कपळा आपस दा वाट्स बुटुर अदिक नान कपळा मा चिट्ठी हाकदुर." 25 इदुरसाटी सैनिकगोळ हिंग अच माळदुर. यीशु उन क्रूस इन हाती आऊन मोय, अदिक आऊन मोय इन आकतींग, क्लोपास उन हिंग्स मरियम, अदिक मरियम मगदलीनी निदुरकु ईरोर. 26 याग यीशु तान मोय, अदिक आ चेला अक यार से आव प्यार ईटतोगोन हात्‍ती निदुरकु नोळदुन रा तान मोय से अंदुन, "हे मोयी, नोळ, ईव नीन पार हुन." 27 आग आव चेला से अंदुन, "ईक नीन मोय उर." अदिक अदा समय टु आव चेला आकी तान मान्या ओतुन.

28 इदुर बाद्दा यीशु ईद जान्सकु कि ईग सप्पा येनारा पुरा आगेग्याद, इदुरसाटी कि पवित्रशास्त्र दा जो अंदकु आगीत अद पुरा आगुल, अंदुन, "ना प्यासा आईन." 29 अल हुळ्लग अंगुर इन रास्सा देल तुमकु ऊंद बरतन ईटकु ईरोद, इदुरसाटी आंदुर अंगुर इन रास्सा दा नेनाक्द ऊंद स्पंज इक हिस्सप इन डगालगोळ मा ईटदुर अदिक म्याकुच नेगुकु, आऊन बाय इक हचदुर. 30 याग यीशु अद सिरका हुळदुन अदिक अंदुन, "पुरा आत." अदिक ताल्ला ल्यालमा माळकु जीव बिट बुटुन.

31 इदुरसाटी कि अद तयारी अन दिन ईरोद यहूदीगोळ पिलातुस से विनती माळदुर कि आंदुर कालगोळी मुर्दकु आगुल अदिक आंदुर ईळ्सकु आगुल, ताकी आराम इन दिशी आंदुर क्रूस मा ईरबाळुल, यतिकी अद आराम इन दिन धोळ्द दिन ईरोद. 32 इदुरसाटी सैनिकगोळ बंदकु आ मंळसागोळ दा टु पयला मंळसा अन कालगोळी मुरदुर आग दुसरा अन भी, जो यीशु उन सांगुळ क्रूस मा येर्सकु आगीदुर; 33 लेकीन यीशु उन हात्‍ती बंदकु नोळदुर कि आव सोतोग्यान, रा आऊन कालगोळी मुरदीदील. 34 लेकीन सैनिकगोळ दा टु ऊंद सैनिक बरची देल आऊंद हतोरी दा छेद माळदुन, अदिक अदुर दा टु तुरन्त खुन अदिक नीर होळ्त. 35 याव ईद नोळदुन, आव गवाही कोटान, अदिक आऊन गवाही खरा आद; अदिक आव जान्सतान कि आव सही अनतान कि नीव भी विश्वास माळी. 36 ई मातगोळ इदुरसाटी आदव कि पवित्रशास्त्र दा जो अनकु आगीत अद पुरा आगुल, "आऊंद यातोदु येलु मुरूकु आगतीदील." 37 ✝१९:३७ प्रकाशितवाक्य १:७मात्‍त ऊंद अदिक शास्त्र दा ईद लिख्सकु आद, "यारी आंदुर छेद माळ्यार, अदुर मा आंदुर नजर हाक्यार."

38 ई मातगोळ बाद्दा अरिमतिया अन यूसुफ जो यीशु उन चेला ईरोन, लेकीन यहूदीगोळ अंज्क देल ई मात इक होचकु ईटतोगोन, पिलातुस से विनती माळदुन कि येन आव यीशु उन लाश ओय सकतान. पिलातुस आऊन विनती केळदुन, अदिक आव बंदकु आऊन लाश ओतुन. 39 ✝१९:३९ यूहन्ना ३:१,२नीकुदेमुस भी, जो यीशु उन हात्‍ती ईळ्लकी होगीदुन, पचास सेर इन लगभग मिलुस्द अत्‍तर अदिक एलवा तंदुन. 40 आग आंदुर यीशु उन लाश ताकोंडुर, अदिक यहूदीगोळ नळसोद रीति अन अनुसार आऊक सुगन्ध द्रव इन सांगुळ मलमल इन चद्दर दा गुंळ्सदुन. 41 आ जागा मा यल यीशु क्रूस मा येर्सकु आगीदुन, ऊंद बेली ईरोद, अदिक आ बेली दा ऊंद व्हाशोद कब्र ईरोद यल यागलु यारदु लाश ईटकु ईला आगीत. 42 इदुरसाटी यहूदीगोळ तयारी अन दिन इन कारण आंदुर यीशु उक अदुर दा ईटदुर, यतिकी अद कब्र हाती ईरोद.