Lucas 5

यीशु उन द्वारा पयला चेलागोळी कारोद आत

1 ✝ ५:१ मत्ती १३:१,२; मरकुस ३:९,१०; ४:१ याग भीळ परमेश्वर उन वचन केळोर साटी आऊन मा बिळली आगतोगोद, अदिक यीशु गन्नेसरत इन झील इन किनारा मा नीदुरकु ईरोन, रा हिंग आत 2 कि आव झील इन किनारा दा येढ्ढ ड्वांगागोळी हतकु ईरव अवरी नोळदुन, अदिक मेन हुडावाळेर अऊर मा टु ईळुकु जार तोळोर. 3 आ ड्वांगागोळ दा टु ऊंद मा, जो शमौन उन ईरोद, येरकु यीशु आऊन से विनती माळदुन कि किनारा टु थ्वाळासा सरकुसकु नळु. आग आव कुर्तकु लॉकुरी ड्वांगा मा टु उपदेश कोळली कुरतुन.

4 याग यीशु उन मातगोळ हेळकु आदव रा आव शमौन उक अंदुन, "खोल नीर दा होग, अदिक मेन हुडोर साटी तान जार हाक्‍क."

5 ✝ ५:५ यूहन्ना २१:३ शमौन यीशु उक उत्‍तर कोट्टुन, "हे स्वामी, नाव पुरा ईळ्लक तीम मेहनत माळदेव अदिक येनु सिक्‍कीदील; तरी नीन कयना देल ना जार हाकतीन." 6 ✝५:६ यूहन्ना २१:६याग आंदुर हिंग माळदुर, रा हापाळ मेनगोळ जार दा बंदव, अदिक आंदुर्द जार हरूली कुर्त. 7 इदुर मा आंदुर तान संगीगोळी जो दुसरा ड्वांगा मा ईरोर, आंदरी कारदुर कि बंदकु नाम मदत माळी, अदिक आंदुर बंदकु येढ्ढु ड्वांगागोळी इल ताका तुमदुर कि आ ड्वांगागोळ मुळ्कली कुरतव. 8 ईद चमत्कार नोळकु शमौन पतरस यीशु उन काल मा बिद्दुन अदिक अंदुन, "हे प्रभु, नान हात्‍ती टु होटोग, यतिकी ना पापी मंळसा आईन!"

9 यतिकी ईस मेनगोळ हुळदुर देल आऊक अदिक आऊन संगीगोळी हापाळ अचम्भा आत, 10 अदिक हांग अच जब्दी इन पार याकूब अदिक यूहन्ना अक भी, जो शमौन उन भागीदार ईरोर, अचम्भा आत. आग यीशु शमौन से अंदुन, "अंजबाळ; ईगी टु नी मंळसागोळी परमेश्वर उन राज्य दा तंद्या."

11 अदिक आंदुर ड्वांगागोळी किनारा मा तंदुर अदिक सप्पा येनारा बिटकु आऊन हिंद होटोदुर.