Marcos 11

यरूशलेम दा विजय-प्रवेश

1 बाक याग आंदुर यरूशलेम इन हात्‍ती, जैतून पहाळी मा बैतफगे अदिक बैतनिय्याह अन्द हात्‍ती बंदुर रा यीशु तान चेलागोळ दा टु येढ्ढ मुंदरी ईद सुझाव कोटकु कळुदुन, 2 "कि मुंदळोद ऊर दा होगी, अदिक अदुर दा पोहचुसतेला अच ऊंद गधा अन पाड्डा, अदुर मा यागलु यारू कुरतीदील, अद नीमी कटकु सिक्‍कीत. अदरी बिटकु तरी. 3 अगर नीम से यारारा केळ्यार, ‘ईद येती माळतीर?’ रा अनेतीर, प्रभु उक इदुर्द जरवत आद, अदिक आव तुरन्त अदरी बाक ईल वापस कळु बुटान."

4 आंदुर होगकु आ गधा अन पाड्डा अक व्हार्या द्वारा इन हात्‍ती चौक दा कटकु नोळदुर, अदिक अदरी बिळली कुरतुर. 5 थ्वाळासा लॉकुर जो अल नीदुरकु ईरोर, यारारा यारारा अनली कुरतुर, ईद येन माळेतीर, गधा अन पाड्डा अक येतरी बिळतीर?

6 अदिक यीशु ह्यांग हेळीदुन आंदुर हांग अच आंदुर से अंद बुटुर; आग लॉकुर आंदरी आ पाड्डा अक वोयगोटुर. 7 आंदुर पाड्डा अक यीशु उन हात्‍ती तनकु अदुर मा तान कपळा हाकदुर अदिक यीशु अदुर मा कुरतुन. 8 आग हापाळ सा लॉकुर तान कपळा हादी मा हासदुर अदिक हापाळ मुंदुर केईगोळ दा टु खजुर इन डगाली कळ-कळकु हादी मा हासदुर. 9 जो आऊन मुंद-मुंद होगोर अदिक जो हिंद-हिंद नळुतेला बरोर, कारू-कारूकु अनतेला होगतोगोर, "परमेश्वर उन स्तुती आगुल! जो प्रभु उन हेसुर देल बरतान! 10 नाम आप्प दाऊद उन बरावाळा राज्य इक परमेश्वर आशीष कोळुल अदिक परमेश्वर उन स्तुति आगुल!"

11 यीशु यरूशलेम पोहचुस्कु मंदिर दा बंदुन; अदिक नाकु दी सप्पा वस्तुगोळी नोळकु हन्नेळ चेलागोळ सांगुळ बैतनिय्याह होदुन, यतिकी द्याव मुळकेगीत.