1 इदुरसाटी नाव येन अंदेव नाम शारीरिक आप्प अब्राहम उक येन हासिल आत? 2 यतिकी अगर अब्राहम क्याल्सागोळ देल न्यायी ठहरूस्कु आगायदुन, रा आऊक घमण्ड माळोद जागा ईराईत, लेकीन परमेश्वर उन नजर दा ईला. 3 ✝४:३ गलातिगोळ ३:६पवित्रशास्त्र येन अनतद? ईद कि "अब्राहम परमेश्वर मा विश्वास माळदुन, अदिक आऊन विश्वास इन कारण परमेश्वर आऊक न्यायी ठहरूसदुन." 4 क्याल्सा माळावाळा अन्द मजदूरी कोळोद दान आलच, लेकीन हक्‍क सम्सकु आगतद. 5 लेकीन जो विश्वास मा निर्भर ईरतान ना कि क्याल्सागोळ मा, अदिक परमेश्वर मा विश्वास माळतान जो परमेश्वर अभक्तिहिन उक भक्तिहीन माळतान, आऊन ईदा विश्वास देल परमेश्वर आऊक न्यायी ठहरूसतान. 6 यारी परमेश्वर बिना कर्मगोळ्द न्यायी ठहरूस्तान, आऊक दाऊद भी धन्य अनतान:

7 धन्य आर आंदुर यारव अन्याय माफ आदव, अदिक यारव पाप होतुर्सकु आदव.

8 धन्य आन आ मंळसा यारी परमेश्वर पापी ठहरूसतीदील.

9 "जो धन्य आगोद मात दाऊद अनेत्यान, येन खतना माळ्द यहूदीगोळ्द साटी अच हुन या बिना खतना माळ्द गैरयहूदीगोळ्द साटी भी हुन. अब्राहम परमेश्वर मा विश्वास माळदुन अदिक आऊन विश्वास इन कारण अच परमेश्वर आऊक न्यायी स्वीकार माळदुन." 10 रा ईद याग आत? येन याग आऊन खतना आगेगीत या आव बिना खतना अन्द ईरोन. ईला, खतना अन बाद्दा ईला उलटा खतना आगा पयले हिंग आत. 11 अदिक आऊन खतना आगोद अद ऊंद चिन्ह बन्सत कि तोर्स सकुल कि परमेश्वर आऊक खतना आगा पयले अच आऊन विश्वास इन द्वारा न्यायी स्वीकार माळदुन. अदिक अब्राहम सप्पा विश्वासीगोळ्द आत्मिक आप्प बन्सदुन यतिकी आंदुर बिना खतना नोर आर लेकीन विश्वासी आर, इदुरसाटी आंदुर भी न्यायी ठहरूसकु आदार. 12 अदिक आव आंदुर भी आप्प हुन यार्द खतना आग्याद, आ लॉकुर सिर्फ खतना माळकु ना ईला ईरोर उलटा नाम आप्प अब्राहम उन विश्वास इन पद चिन्हगोळ मा नळावाळेर ईरोर आव अब्राहम जो खतना आगोर से पयले नळदुन.

13 ✝ ४:१३ गलातिगोळ ३:२९ याग परमेश्वर अब्राहम अदिक आऊन वंशजगोळ से प्रतिग्या माळदुन कि आंदुर दुनिया अन्द वारीस आदार, ईद प्रतिग्या अब्राहम उक व्यवस्था अन पालन माळदुर देल अच सकिदील लेकीन आव विश्वास माळदुन अदिक आव परमेश्वर उन द्वारा न्यायी स्वीकार माळकु आदुन ई कारण अच सिक्त. 14 ✝४:१४ गलातिगोळ ३:१८अदिक इदुरसाटी अगर नीव मान्सतीर कि परमेश्वर उन कोळ्द प्रतिग्या ईद व्यवस्था अन पालन माळावाळेर कारण सिक्त रा नीम्‍द विश्वास बेकार अदिक परमेश्वर उन कोळ्द प्रतिग्या भी बेकार आद. 15 यतिकी व्यवस्था देल परमेश्वर उन सिट्ट पैदा आगतद, लेकीन यल व्यवस्था हैलेच, अल अदुर्द उल्लंघन भी हैलेच. 16 ✝४:१६ गलातिगोळ ३:७ईदा कारण प्रतिग्या विश्वास मा आधारित आद अदिक ईद प्रतिग्या ई सप्पा अब्राहम उन वंशजगोळ साटी परमेश्वर उन मुफ्त उपहार हुन, ईद सिर्फ व्यवस्था अन पालन माळावाळेर साटी इच ईला लेकीन आंदुर साटी भी आद जो विश्वास माळतार ह्यांग विश्वास अब्राहम माळदुन यतिकी अब्राहम नाम सप्पा मुंदुरव आत्मिक आप्प हुन. 17 ह्यांग शास्त्र दा लिख्सकु आद, "ना नीनी हापाळ सा द्याशगोळ्द आप्प ठहरूसीन" अदिक ईद प्रतिग्या परमेश्वर उन नजर दा वळ्लीद आद. ईव आव परमेश्वर हुन यार मा अब्राहम विश्वास माळदुन अदिक जो सोत्‍तुरी जित्‍ता माळतान, अदिक ईव आव परमेश्वर हुन जो मातगोळ अस्तित्व दा हैलेच आ मातगोळी अस्तित्व दा तरतान. 18 ह्यांग शास्त्र दा लिख्सकु आद, "नी हापाळ सा द्याशगोळ्द आत्मिक आप्प आद्या. अदिक नीन वंशजगोळ तारागोळ घाई आदार ई मात मा आशा ईटोद येनु कारण ईला ईरोद तरी भी अब्राहम विश्वास अदिक आशा ईटदुन," 19 यतिकी आव लगभग सौ साल इनव आगेगिदुन लेकीन आऊन विश्वास आऊन शरीर इन घाई कमजोर ईला आगीत ह्यांग कि आऊन शरीर लगभग सायापरी आगेगीत अदिक सच्चाई रा ईद भी आद कि सारा अन क्वाता भी चिग्द उक हाळु ईला सकोद. 20 तरी भी आव तान विश्वास इक बिटीदिल अदिक ना आव परमेश्वर उन प्रतिग्या मा सक माळदुन आऊन विश्वास आऊक सामर्थ्य देल तुम्त अदिक आव परमेश्वर उन महिमा माळदुन; 21 अदिक आऊक पुरा भरोसा ईरोद कि परमेश्वर आऊक जो प्रतिग्या कोटीदुन, आव अदरी पुरा माळदुर दा भी समर्थ आन. 22 ई कारण परमेश्वर अब्राहम उक आऊन विश्वास इन द्वारा न्यायी स्वीकार माळदुन. 23 अदिक ईद वचन, "विश्वास इन द्वारा न्यायी स्वीकार माळोद" सिर्फ आऊन आबना अन साटी लिख्सकु ईला आगित. 24 ऊलटा ईद नाम साटी भी लिख्सकु आत जो नाव न्यायी ठहरूसकु आगेव अदिक जो यीशु नाम प्रभु जो सोत्‍तुर दा टु जित्‍ता आदुन आऊन मा विश्वास माळतार. 25 यतिकी आव नाम पापगोळ कारण मृत्यु उन साटी सौप्सकु आदुन अदिक नामी परमेश्वर उन सांगुळ न्यायी ठहरूसोर साटी सोत्‍तुर दा टु जित्‍ता आदुन.