पवित्र आत्मा अन द्वारा जीवन
1 इदुरसाटी ईग जो मसीह यीशु दा जीवन व्यतीत माळतार, आंदुर मा दण्ड इन आग्या हैलेच. 2 यतिकी जीवन इन आत्मा अन व्यवस्था मसीह यीशु दा नानी पाप इन अदिक मृत्यु अन व्यवस्था देल स्वतंत्र माळबुटाद. 3 यतिकी जो क्याल्सा व्यवस्था शरीर इन कारण दुर्बल आगकु माळ सकिदील, अदरी परमेश्वर माळदुन, मतलब तांद अच पार उक पापमय शरीर इन समानता दा अदिक पाप बली आगोर साटी कळुकु, शरीर दा पाप मा दण्ड इन आग्या कोट्टुन. 4 इदुरसाटी कि व्यवस्था अन आवश्यकतागोळ नाम दा शरीर इन अनुसार ईला उलटा आत्मा अन अनुसार नळुतार, पुरा माळकु आगुल. 5 यतिकी शारीरिक मंळसागोळ शरीर इन मातगोळ मा मन हचतार; लेकीन जो आत्मा अन मातगोळ मा मन हचतार. 6 शरीर मा मन हचोद रा मृत्यु हुन, लेकीन आत्मा मा मन हचोद जीवन अदिक शांती हुन; 7 यतिकी शरीर मा मन हचोद रा परमेश्वर उन से दुश्मनी ईटोद हुन, यतिकी ना रा परमेश्वर उन व्यवस्था अन हात्ती आद अदिक ना आग सकतद; 8 अदिक जो शरीर इन हात्ती आर, आंदुर परमेश्वर उक खुश माळ सकालुर.
9 लेकीन याग कि परमेश्वर उन आत्मा नीम दा वास माळतद, रा नीव शारीरिक दशा दा ईला लेकीन आत्मिक दशा दा आईर. अगर यारदारा दा मसीह अन आत्मा हैलेच रा आंदुर आऊन लॉकुर आल्लच. 10 अगर मसीह नीम दा आन, रा शरीर पाप इन कारण सोतकु आद; लेकीन आत्मा न्यायीपन इन कारण जित्ता आद. 11 ८:११ १ कुरिन्थि ३:१६अगर आऊंदा आत्मा याव यीशु उक सोत्तुर दा टु जित्ता माळदुन, नीम दा वास माळेत्याद; रा याव मसीह अक सोत्तुर दा टु जित्ता माळदुन आव नीम सोतकु शरीरगोळी भी तान आत्मा अन द्वारा जो नीम दा वास माळेत्याद, जित्ता माळ्यान.
12 इदुरसाटी हे वार्टुरा अदिक आकतींगेरा, नाम मा भौतिक शरीर इन कर्जा रा आद लेकीन ईदुर्द ईद मतलब हैलेच कि नाव ईदुर अनुसार जीत्ता ईत्तेव, 13 यतिकी नीव मय इन अनुसार दिन कळदीर रा सोत्तीर, अगर आत्मा देल मय इन क्याल्सागोळी कोंदीर रा जित्ता ईत्तीर. 14 इदुरसाटी कि यास लॉकुर परमेश्वर उन आत्मा अन अनुसार नळुतार, आंदुर अच परमेश्वर उन चिकोर उर. 15 ८:१५ गलातिगोळ ४:५-७८:१५ मरकुस १४:३६; गलातिगोळ ४:६यतिकी नीमी दासगोळ्द आत्मा सकिदील कि मात्त अंजबाळुल, लेकीन परमेश्वर उन सन्तान इन आत्मा सिक्याद, यदुर देल नाव हे अब्बा, हे आप्पा अनकु कारूतेव. 16 परमेश्वर उन आत्मा खुद अच नाम आत्मा अन सांगुळ गवाही कोळतद, कि नाव परमेश्वर उन सन्तान हुयेव; 17 अदिक अगर सन्तान आर रा वारीस भी आर, उलटा परमेश्वर उन वारीस अदिक मसीह अन सांगुळ वारीस आयेव, कि याग नाव आऊन सांगुळ दुख नेगदेव रा आऊन सांगुळ महिमा भी सिकुल.
भविष्य दा प्रगट आगावाळा महिमा
18 यतिकी ना समझुसतीन कि ई समय इन दुख अदिक क्लेश आ महिमा अन मुंद, जो नाम मा प्रगट आगावाळा आद, येनु अच हैलेच. 19 यतिकी दुनिया हापाळ आशा तुम्द नजर देल परमेश्वर उन पारगोळ प्रगट आगोद हादी कायेत्याद. 20 यतिकी दुनिया तान इच्छा देल ईला लेकीन हात्ती माळावाळा अन दी टु, व्यर्थया अन हात्ती ई आशा देल माळकु आग्याद 21 कि दुनिया भी खुद अच विनाश इन दासत्व देल छुटकारा ताकोमकु, परमेश्वर उन चिकोर्द महिमा अन स्वतंत्रता प्राप्त माळीत. 22 यतिकी नाव जान्सतेव कि सप्पा दुनिया ईगासताका मिलुसकु कन्नासतेला अदिक दुखगोळ दा बिदकु तळपुसतद; ह्यांग कि चिग्द पैदा आगा समय मा तळपुसतान. 23 ८:२३ २ कुरिन्थि ५:२-४अदिक सिर्फ आवा ईला लेकीन नाव भी यार हाती आत्मा अन पयला काय आद, खुद अच तांदुर दा कन्नासतेव; अदिक लेपालक आगोद, मतलब तान मय इन छुटकारा अन हादी कायतेव. 24 ई आशा अन द्वारा नाम उद्धार आग्याद; लेकीन याता वस्तु अन आशा माळकु आगतद, याग अद नोळदुर दा बंदीत रा बाक आशा येल ईत्त? यतिकी याता वस्तु अक यावारा नोळत्यान अदुर आशा येन माळ्या? 25 लेकीन याता वस्तु अक नाव नोळ सकालेव, अगर अदुर्द आशा ईटतेव, रा धीरज देल अदुर्द हादी भी कायतेव.
26 ईदा रीति देल आत्मा भी नाम कमजोरी दा सहायता माळतद: यतिकी नाव जानसालेव कि प्रार्थना याता रीति देल माळ पायजे, लेकीन आत्मा खुद अच हिंग आहट तुम तुमकु, जो बयान देल व्हार्या आद, नाम साटी विनती माळतद; 27 अदिक परमेश्वर जान्सतान कि नाम मनगोळ दा येन आद, कि परमेश्वर आत्मा अन मनसा येन आद? यतिकी आव पवित्र लॉकुर साटी परमेश्वर उन इच्छा अन अनुसार विनती माळतान.
28 नाव जान्सतेव कि जो लॉकुर परमेश्वर से प्यार ईटतार, आंदुर साटी सप्पा मातगोळ मिलुसकु वळ्लीद इका पैदा माळतान; मतलब आंदुर्दा साटी जो आऊन इच्छा अन अनुसार कार्सकु आग्यार. 29 यतिकी यारी आव पयले टु जान्स कोंडान आंदरी पयले टु अच ठहरूस्यान कि आऊन पार उन स्वरूप दा आगुल, ताकी आव हापाळ वार्टुर दा पयला ठहरूसुल. 30 बाक यारी आव पयले टु ठहरूसदुन, आंदरी कार्सदुन भी; अदिक यारी कार्सदुन, आंदरी न्यायी भी ठहरूसदुन अदिक आंदरी महिमा भी कोट्टुन.
परमेश्वर उन प्यार
31 इदुरसाटी नाव ई मातगोळ बारा दा येन अंदेव? अगर परमेश्वर नाम दी आन, रा नाम खिलाप याव आग सकतान? 32 याव तान निज पार उक भी ईटीदील, लेकीन आऊक नाम सप्पा मुंदुर साटी कोट्ट बुटुन, आव आऊन सांगुळ नामी अदिक सप्पा येनारा मुफ्त दा येती कोळतीदील? 33 परमेश्वर उन निवळुस्द लॉकुर मा दोष याव हच्यान? परमेश्वर अच आन जो आंदरी न्यायी ठहरूसावाळा आन. 34 बाक याव आन जो दण्ड इन आग्या कोट्टान? यीशु मसीह अच आन जो सोतोदुन लेकीन मुर्दागोळ दा टु जित्ता भी आदुन, अदिक परमेश्वर उन ऊमा कय इन दी आन, अदिक नाम साटी समझौता भी माळतान. 35 याव नामी मसीह अन प्यार देल अलग माळ्यान? येन क्लेश, या कठिन समय, या सताव, या अकाल, या गरीबी, या जोखिम, या मृत्यु? 36 ह्यांग शास्त्र दा लिख्सकु आद,
नीन साटी नाव हागुल तीम घात माळकु आगतेव;
नाव वध आगावाळा म्यांडागोळ घाई आळुकु आगेव.
37 लेकीन ई सप्पा मातगोळ दा नाव आऊन द्वारा याव नाम से प्यार माळ्यान, पुरा तरीका देल विजय प्राप्त माळेतेव. 38 यतिकी ना निश्चय जान्सतीन कि याऊ नामी आऊन प्यार देल अलग माळ सकालुन ना मृत्यु, ना जीवन, ना स्वर्गदूत, ना दुष्ट शासन, ना वर्तमान, ना भविष्य, ना सामर्थ्य, ना ऊँचाई, 39 ना धरती इन गहराई, अदिक ना धरती इन ऊंचाई अदिक ना संसार इन यातोदु निर्मित वस्तु नामी परमेश्वर उन प्यार देल जो नाम प्रभु मसीह यीशु दा आद, अलग माळ सक्कीत.