1 हे नान वार्टुरा अदिक आकतींगेरा, नीम दा टु हापाळ सा लॉकुर शिक्षा कोळावाळेर बन्सबाळुल, यतिकी जान्सतीर कि नाव शिक्षा कोळावार्ळेद यक्कुल गंभीरता देल न्याय माळकु आदीत. 2 इदुरसाटी कि नाव सप्पा मुंदुर हापाळ घन चुकसेगतेव; लेकीन अगर यावारा माताळदुर दा यातोदारा भी गलती माळतीदील रा आव ऊंद सिद्ध मंळसा आन अदिक सप्पा मय मा भी नियंत्रण ईट सकतान. 3 याग नाव तान आग्या मानसुसोर साटी घ्वाळा अन्द बाय दा लगाम हचतेव, रा नाव अदरी बाक यल चाहे अल तिर्गुस सकतेव. 4 जहाज भी, हिंग धोड्डेव ईरताव अदिक प्रचंड हवा देल नळ्सकु आगताव, तरी भी ऊंद स्यांळ्दतुसा सा पतवार इन द्वारा माँझी इन इच्छा अन्द अनुसार तिर्गुसकु आगताव. 5 हांग अच ल्यालग्या भी ऊंद स्यांळ्दतुसा सा हिस्सा आद अदिक अद धोळ्द-धोळ्द डींग होडुतद. जरासा सोची, थ्वाळासा बेक्‍की देल याट धोळ्द आळी दा बेक्‍की हत्‍तेगतद. 6 ल्यालग्या भी ऊंद बेक्‍की हुन; ल्यालग्या नाम मय इन हिस्सा दा अन्याय इन दुनिया हुन, अदिक सप्पा मय मा कलंक हचतद, अदिक जीवन-गति मा बेक्‍की हच बुळतद, अदिक नरक कुण्ड इन बेक्‍की देल होत्‍त ईरतद. 7 यतिकी सप्पा प्रकार इन आळी, पशु, पक्षी, अदिक रेंगसावाळा जन्तु, अदिक नीर इन जीव जन्तु रा मंळसा जाती इन वश दा आग सकताव अदिक आगेग्याव भी, 8 लेकीन ल्यालग्या अक मंळसागोळ दा टु याऊ वश दा माळ सकालुन; अद ऊंद हिंग बला आद जो यागलु अच रूकसाल, अद जीव नाशक जयर देल तुमकु आद. 9 इदुर देल अच नाव प्रभु अदिक आप्प उन स्तुती माळतेव, अदिक इदुर देल अच मंळसागोळी जो परमेश्वर उन स्वरूप दा पैदा आग्यार शराप कोळतेव. 10 ऊंद अच बाय देल धन्यवाद अदिक शराप येढ्ढु होळताव. हे नान वार्टुरा अदिक आकतींगेरा, हिंग ईला आग पायजे. 11 येन नीर इन सोता अन्द ऊंद अच बाय देल सय अदिक डवला नीर येढ्ढु होळताव? 12 हे नान वार्टुरा, येन अंजीर इन मार्र मा जैतून, या अंगुर इन केई मा अंजीर हत सकताव? हांग अच डवला नीर इन सोता टु सय नीर होळ सकाल. घ्वाळा मा सवार

13 नीम दा बुद्धिमान अदिक समझदार याव आन? जो हिंग आन आव तान क्याल्सागोळी वळ्लीद चाल चलन देल आ नम्रता सहित प्रगट माळुल जो ग्यान देल पैदा आगतद. 14 लेकीन नीव तान-तान मन दा जलन, कळवाहट अदिक स्वार्थीपन ईटतीर, रा बुद्धी मा घमण्ड माळकु सच्चाई इन विरोध दा पाप माळबाळी. 15 ईद ग्यान अद आल्लच जो स्वर्ग टु ईळुतद, उलटा सांसारिक, अदिक शारीरिक, अदिक शैतानी आद. 16 यतिकी यल जलन अदिक स्वार्थीपन ईरतद, अल अव्यवस्थापन अदिक सप्पा प्रकार इन बेकार मातगोळ आगताव. 17 लेकीन जो ग्यान स्वर्ग टु बरतद अद पयले रा पवित्र ईरतद बाक मिलनसार, मुलायम अदिक शांतीमय अदिक दया अदिक वळ्लीद काय देल लटालोम अदिक पक्षपात अदिक कपट रहित ईरतद. 18 शांती प्रस्थापित माळावाळेर लॉकुरी अच न्यायी जीवन इन काय प्राप्त आदीत अगर अदरी शांतीपूर्ण वातावरण दा बोऊस्कु आग्याद.