Lucas 5

Abigirizwa barhanzi

1 Lusiku luguma, Yeesu aliyimangire aha burhambi bw’enyanja eyirikwa Genezareeti*5.1 Genezareeti eri nyanja eshuba kuyirikwa nyanja y’eGalilaaya.. Abantu banene balwisa kuja aha burhambi bwage kuyunviriza eChinwa cha Nnamahanga. 2 Abona maarho mabiri mali emushengo. Abashaana eyi barhengere mo bakola bali gushuka emilaga yaabo. 3 Yeesu ashonera omu bwarho buguma. Bwaliiri bwa Simooni. Yeesu amuhema okw’abushunike hale bugeeke n’emushengo. Yeesu ayikala m’obo bwarho n’ogurhondera guhaana enyigirizo zaage oku bantu.

4 Abeere amala kuderha, abwira Simooni ntya: «Shegera hale, ah’amenji maleehere. Wooyo n’abenyu, muhire emilaga yenyu omu menji, murhege.» 5 Simooni amushubiza ntya: «Mwigiriza, rhwalibukire obudufu booshi, rhwamanahina. Aliko obo wamambwira oku njire ntyo, nahira emilaga omu menji.» 6 Babeere baajira ntyo, bayirha efi zinene bweneene, oku bulyo emilaga yaabo yarhondera guchiibera. 7 Basimira abaabo baliiri omu bwindi bwarho mpu bayinje babagwase. Aboola bayinja. Booshi haguma bayunjuza amo maarho mabiri, oku bulyo maalema mayika omu menji. 8 Simooni Petero abeere abona ebyoola, afukama embere za Yeesu n’okuderha ntya: «Orhanyegeeraga, Nnaweerhu, kwenge nyoono ndi muntu w’ebyaaha!» 9 Simooni n’abaliiri naye, booshi baalisomeerwe ntya elugulu w’efi zinene bayirhaga. 10 Yakobo na Yohaana, bagala ba Zebedayo, baliiri gurhega haguma na Simooni, nabo basoomerwa. Aliko Yeesu abwira Simooni ntya: «Orhayuubahaga: gurhengera zeene waaja waloba abantu.» 11 Baava basiika amaarho maabo emushengo. Baaleka byooshi, bakulikira Yeesu.