Lucas 7

Yeesu afumya omuja w’omukulu w’abasoda

1 Yeesu abeere amamala kubwira olubaga lwaliiri kumuyunviriza ebi binwa byooshi, aja eGaperinaumu.

2 Eyoola, omukulu w’abasoda w’ekirooma aligwerhe omuja waage w’akamaro. Oyo muja alilwere bweneene ey’ali bufa. 3 Oyo mukulu w’abasoda abeere ayunva yi baderha ebiyerekeere Yeesu, amurhumira abashamuka baguma b'aBayaahudi kumuhema ayinje amufumize oyo omuja waage. 4 Babeere baagera emwa Yeesu, barhondera kumuyinginga bweneene n’okuderha ntya: «Oyu mukulu w’abasoda akwaneene gurhabaalwa naawe. 5 Kwenge anasiima olubaga lwerhu, yeewe ye wayumbakisaga esinagoogi yeerhu.» 6 Nnaweerhu ava agenda nabo. Abeere akola ali hoofu n’enju, oyo mukulu w’abasoda arhuma abeera baage kubwira Yeesu ntya: «Mwigiriza, orhashiibaga wachilibuza. Nyoono ntakwaneene mp’ohike omu mwani. 7 Chegirhumire ntayinja nyenyine emunda oli. Aliko oderhe chinwa chiguma chonyine y’omuja waani afuma. 8 Kwenge naani ndi eshiishi w’abanrhegekere na kandi ngwerhe abasoda nyimangiire. Nkabwira muguma ntya: ‹Genda!›, anagenda, na nkabwira owindi ntya: ‹Yinja!›, anayinja; na nkabwira omuja waani ntya: ‹Kola echiila!›, anagikola.» 9 Yeesu abeere ayunva ebyo binwa, asomererwa oyo mukulu w’abasoda. Ahindamuka abwira ntya echigusho ch’abantu bali bamukulikiire: «Mbabwirire oku ntashubiraga kubona obwemeezi buli ntya, nangwa! Chiro n’omu Israheeli.» 10 Bala beera omukulu w’abasoda arhumaga, babeere bagaluka bashimaana omuja afumire.