15 Ащеԓ пӑрәм йўпийән Иосиф йайԓаԓ йастәсәт: «Мосәӈ, Иосиф мўӈев ԉикән этԓәԓы пӑ ԓўвеԓ атәм вермев нўр йŏхԓы катәԓԓәԓы?»
16 Пӑ ԓыв Иосифа айкеԓ китсәт: «Ащен пӑртаԓ йэԓпийән щиты йастәс:
17 ‘Иосифа тӑмиты йастаты: йайԓан нўрәт пӑ кӑрэкәт йŏрэмаԓән нӑӈена атәм вермеԓ урәӈән’. Пӑ ин ащен Турәм митйохԓаԓ нўрԓаԓ эсԓаԓән». Щит ԓўвеԓа пŏтәртәмән, Иосиф хоԓԓәс.
18 Щӑԓта йайԓаԓ ищи йŏхәтсәт, пӑ ԓўв йэԓпеԓән мўв унты, ŏх пŏнман, иԓ ԋўрсәт, пӑ йастәсәт: «Мўӈ нӑӈена рупитты йохԓан».
19 Иосиф йастәс: «Аԓ пӑԓаты, ма мўй Турәм хун?
20 Йӑна щи, нын ма пеԓайэм атәм версәты; туп Турәм щит йӑма керәтсәԓы, ин тыйәԓтәм верәԓ урәӈән: ар хŏйат ԓыԓ шавиты урәӈән;
21 щишән, аԓ пӑԓаты: ма нынан, имиԓән пӑ нын ԋаврэмԓән ԓапәтԓыԓам». Пӑ ԓывиԓаԓ роммәԓтсәԓы, пӑ сӑмԓаԓ рӑхты щирән ԓыв пиԓԓаԓән пŏтәртәс.