Gênesis 6

Мўв пӑратты нŏмәс

1 Мўвән хŏйатәт ара йисәт пӑ ԓыв хŏщайэԓ эвет сэма питсәт,

2 пӑ Турәм пŏхәтән хŏйат рут эвет кащаԓәсайәт, мўй хŏрпи ԓыв хŏрасәӈәт, пӑ хŏй ԓывиԓаԓа рӑхәс, нэӈа ўты питсәԓаԓ.

3 Щӑԓта Турәм Куща йастәс: «Ма ԓыԓэм век хун хŏйатәт хŏща уԓ, хŏйатәт пӑрԓәт*6:3 Ма ԓыԓэм век хун хŏйатәт хŏща уԓ, хŏйатәт пӑрԓәт– тӑмиты па йастәты рӑхәԓ: «Ма Ԓыԓэм иса хун хŏйатәтән эртман тӑйты питԓа, хŏйат кӑрэкәӈ»;, нупәтԓаԓ сот хус тӑԓ ат уԓ».

4 Щи пŏрайән мўвән пӑԓатәӈ-ԓŏватәӈ хŏйат шикет усәт, метшопәӈ щи пŏра эԓты, хŏты Турәм пŏхәт хŏйат эвет хŏща ԓŏӈтыты питсәт, пӑ ԋаврэмәт ԓыв эԓтыԓаԓ тӑйты питсәт: щит йис тэԓән щащәм йурәӈ уртәт.

5 Щӑԓта Турәм Куща шийаԓәсԓы, мўвән уԓты хŏйатәт ԓыв кўтԓаԓән шек уԉԋайа уԓԓәт, нŏмәсԓаԓ пӑ сӑмԓаԓ иса ԉикәӈәт;

6 хŏйат тыйәԓтмаԓ урәӈән, Турәм Куща нŏпсәԓ шӑкәс пӑ Ԓўв сӑмәԓ кӑшийән тэкәтса.

7 Турәм Куща йастәс: «Мўвән уԓты Ма тыйәԓтәм хŏйат рутэм, хŏйатәт эԓты ўйман, йош войәт, ваӈкәтԓыты, ущиԓыты, хухәтԓыты войәт, пӑ тŏхԓәӈ войәт унты хŏԓ хŏԓтԓыԓам, ԓывиԓаԓ тыйәԓтмем урәӈән Ма нŏпсэм шӑкәс, щишән».

Ковчег верәм щир, Ной ԓыԓӈа хӑйты урәӈән

8 Туп Ной пеԓа Турәм Куща йӑм сэмән вантәс.

9 Тӑта щи Ной уԓәпса: щи ишән уԓәм хŏйатәт кўтән туп Ной тўӈа-щира ус, атәм ӑт верыԓыйәс; Турәм пиԓән Ной ус.