Lucas 19

Иисус Иерусалим воша ԓŏӈәԓ

28 Щит йастәмаԓ йўпийән, Иисус йэԓԓы Иерусалим воша нŏх мӑнәс.

29 Хун Ԓўв Виффагия пӑ Вифания кўртӈән ԉэпа, Элеон нэмпи кев пай ԉэпа ванамәс, кӑт утәԓтәты хуйӈәԓаԓ тŏхи китсәԓы,

30 йастәман: "Нын йэԓпанән уԓты кўрта мӑнатән; щи йŏхәттанән, иԓ йӑрәм айкам осёл уйәтԓәтән, ԓўв шӑншәԓа нэмәԓты пŏрайән нэмәԓты хŏйат ӑт опсыԓыйәс; хŏԓт эӈхаԓән пӑ тый ватәԓтаԓән;

31 мӑтты хŏйатән ищмиԓайтән ки: "Мўйа нŏх эхԓәԓән?", ԓўвеԓа щиты йастатән: "Ԓўв Турәм Кущайа мосәԓ".

32 Китәм кӑтӈән мӑтсәӈән пӑ хŏты Ԓўв ԓынана йастәс, щиты уйәтсәԓән.

33 Хун пӑ ԓын айкам осёл хŏԓт эӈхәссәԓән, войәӈ хŏйатԓаԓән ԓын иԋщәссайӈән: "Мўйа осёл пŏшәх нŏх эхсәԓән?"

34 Ԓын йŏхԓы йастәсӈән: "Ԓўв Турәм Кущайа мосәԓ".

35 Щӑԓта ԓўвеԓ Иисус хŏща тусԓән, пӑ, ԓумәтты сŏхԓаԓ вой шӑнша пŏнман, Иисус нŏх ԓэԓтсэԓ.

36 Щӑԓта, хун Ԓўв вой шӑшән мӑнмаԓән, хŏйатәт ԓумтәмԓаԓ йуша ԓэрәпсәԓаԓ.

37 Хун Ԓўв Элеон кев пай эԓты иԓ ŏхәԓты тӑхайа ванамәс, хŏԓ аратәԓ утәԓтәты йохԓаԓ, ԓыв вантәм ар йӑм йурәӈ верԓаԓ урәӈән, амәтман, сыйәӈ тўрән Турәм ишәкты питсэԓ,

38 пŏтәртман: "Йӑмән мийәм Хон, Турәм Куща нэм урәӈән йиты Ŏт! Турәмән пайԓы уԓәпса, пӑ нумән ишәк йасәӈ!"

39 Тухәԓ фарисейәт мир кўт эԓты Ԓўвеԓа йастәсәт: "Утәԓтәты ху! Утәԓтәты йохԓан аԓ эсԓаԓән пŏтәртты!"

40 Туп Ԓўв ԓывиԓаԓа йŏхԓы йастәс: "Нынана пŏтәртԓәм, ԓыв ки нŏх вŏԓыԓәт, кев шупәт ўвты питԓәт".