Lucas 2

22 Хун Моисей Закон хўват сыстамтыты хӑтәԓ йŏхтәс, ԓын Ԋаврэмән Иерусалим воша тусԓән, Турәм Кущайа ватәԓтәты урәӈән,

23 Турәм Куща законән хӑшман уԓԓа: "Кашәӈ оԓәӈ сэма питәм ху ԋаврэм Турәм Кущайа аԉты мосәԓ".

24 Пӑ ищи пўԉаӈ Турәм Куща закон хўват йир туты мосәԓ: кӑт горлица нэмпи тŏхԓәӈ войӈән, мўй пӑ голубь нэмпи тŏхԓәӈ кӑт пŏшәхӈән.

Симеон Иисус эԓты пŏтәртәԓ

25 Щи пŏрайән Иерусалим вошән Симеон нэмпи хŏйат ус, ԓўв вещкат па тўӈа–щира xŏйат ус, Израиль мир нŏх пойәкты щир ԓавԓәс; Йэмәӈ Ԓыԓ ԓўв пиԓәԓән ус.

26 Йэмәӈ Ԓыԓән ԓўв аԉса, Турәм Куща китәм Христос шийаԓәтаԓ унты, ԓўв ӑт пӑрәԓ.

27 Йэмәӈ Ԓыԓән тўвман, Симеон Турәм Хота йŏхтәс, хун Иисус Ԋаврэмийэ аԋԏеԓән-ащеԓән, закон хўват мосты верәт верты урәӈән, тŏхи туса,

28 Симеон Ԓўвеԓ йоша ўсԓы, Турәм ишәксәԓы пӑ пŏтәртты питәс:

29 "Вос Xу! Нӑӈ йасӈен хўватән, ин Нӑӈ митхуйэн йӑм нŏмәсән эсәԓԓэн,

30 Нӑӈ мойԓәм ԓыԓ этәԓтәты верэн сэмԓамән шийаԓәсэм,

31 щит Нӑӈ иса уԓты омәсты мир кеша,

32 пўншантәм нŏви Турәм ӑт уйәтты па рут мира*2:32 Турәм ӑт уйәтты па рут мир – Турәм ӑт уйәт хŏйатәт, еврейәт пӑ па рут мирәт щиты айәԓтԓәт. пӑ ишәк йасәӈ Израиль мирэна ԓэщатсэн!"

33 Иосиф пӑ Иисус аԋԏеԓ Ԓўв эԓтэԓ йасәӈ хуԓтанән туп ӑԓ пакнысыстән.

34 Симеон ԓыв урәӈԓаԓа йӑм воxәс, щӑԓта Мария, Иисус аԋԏи пеԓа, йастәс: "Тӑм ŏԓәԓ, Щит, Хŏй тӑxрэпа китса: Израильән хŏйтат иԓ питԓәт, хŏйтат пӑ нŏх ԓойԓәт, Турәм эԓты китәм поса уԓ, йасәӈԓаԓ урәӈән хŏйатәтән нўрыԓа, –

35 Нӑӈ па щитән, аԓтты кеши иты, сӑмен мŏхты мӑнԓайән, – ар хŏйат сӑм хŏща уԓты хӑԋа нŏмәсԓаԓ эԓпа ат этәԓтәԓайәт".

Анна вантәм верәт

36 Хŏԓна щита Турәм йасәӈ туты ими, Анна, ус. Ԓўв Фануил эви, пирща йўвәм ими, Асир рут эԓты ус, икеԓ пиԓән ԓапәт тӑԓ уԓмаԓ,

37 икиԓы хӑщәс, пӑ нийәԉйаӈ ԋӑԓ тӑԓа йис. Анна Турәм Хот эԓты пўӈԓа ӑт йӑӈхиԓыйәԓ, Турма ата-хӑтԓа пойәкщәман пӑ вўщԓәман ус.

38 Щи пўԉаӈ ԓыв хŏщайэԓа ԓўв, вана шушман, Турәм Куща ишәкԓәԓы пӑ кашәӈ хŏйата щи Ԋаврэмийэ эԓты пŏтәртыйәс, хŏй Иерусалимән xŏԓт пайтәсты щир ԓавԓәс.