Lucas 2

Иисус - ԋаврэм Турәм Хотән

41 Кашәӈ тӑԓ Иисус аԋԏеԓ-ащеԓ Пасха йэмәӈ хӑтԓәт урәӈән Иерусалим воша йӑӈхиԓыстән.

42 Хун Ԓўв кӑтхŏщйаӈ тӑԓа йис, ищиты, xŏты уԓԓытыйән, ԓыв Иерусалима йэмәӈ хӑтԓа мӑтсәт.

43 Хун йэмәӈ хӑтԓәт мӑнәм йўпийән йŏхи мӑтсәӈән, Иисус Пŏхийэ Иерусалим вошән хӑщәс; щит Иосиф пӑ Иисус аԋԏеԓ, ӑт мŏштәсԓән,

44 ԓын нумәссәӈән, Ԓўв па мŏхет пиԓән йиԓ. Оԓәӈ хӑтәԓ йуш xўват шушманән, хӑтәԓ xўват рутԓаԓ пӑ уйәтты йŏхԓаԓ кўтән Ԓўвеԓ кӑшсәԓән.

45 Иисус ӑт уйәтсәԓән, Ԓўвеԓ кӑшман, Иерусалима йŏхԓы йŏхәтсәӈән.

46 Хуԓәм хӑтәԓ xӑщәм йўпийән Ԓўвеԓ Турәм Хотән уйәтсәԓән, утәԓтәты йохәт кўтән ԓывиԓаԓ хуԓәтман пӑ ԓыв эԓтыԓаԓ иԋщәсман опсәс;

47 хŏԓыйэ Ԓўвеԓ хуԓәнтәм хŏйатәт йасәӈ ӑт шитԓәт, Ԓўв пеԓайәԓ ӑԓ ватԓәт пӑ хуԓәтԓәт, xŏты Ԓўв йŏxԓы ŏшәӈа–нŏпсәӈа йастәԓ.

48 Аԋԏеԓ-ащеԓ Ԓўвеԓ шийаԓәман кемән, йасәӈ йастәты ӑт верәтсәӈән, туп аԋԏеԓ Ԓўвеԓа йастәс: "Пŏхийэ, минэмән хŏты Нӑӈ версэн? Тӑм мўй, ащен пӑ ма, сӑм мӑнман, Нӑӈен кӑшԓэмән."

49 Иисус йастәс: "Мўйа нын Мӑнэм кӑшԓәԓән? Нын мўй ӑт уйәтсәԓән, Мӑнэм щита уԓты мосәԓ, хŏта Ма Ащэм Xот уԓ?"

50 Туп Ԓўв йастәм йасәӈԓаԓ ԓын ӑт мŏштәсԓән.

Иисус энәмты пŏра

51 Щиты Ԓўв аԋԏеԓ-ащеԓ пиԓән Назарет воша йŏхԓы йŏхтәс; пӑ ԓынана хуԓәтман ус. Щи йастәм йасәӈԓаԓ xŏԓыйэ аԋтеԓән сӑмән шависайәт.

52 Иисус пӑ нуптәԓ хўвашәк йис, ŏшәӈа-щащәӈа йис. Ԓўв Турәмән пӑ хŏйатәтән сӑма мосман тӑйса.