Lucas 9

Кӑтхŏщйаӈ хŏйатәт утәԓтәты китсайәт

1 Кӑтхŏщйаӈәԓ вохмаԓ йўпийән, ԓывиԓаԓа кўԉәт воштәты, мушәт йӑмәԓты йур пӑ партатты щир мӑс,

2 пӑ ԓывиԓаԓ Турәм Хон Уԓәпса эԓты сыйәӈа пŏтәртты, мушәӈ хŏйатәт тўмтака верты китсәԓы.

3 Щӑԓта ԓывиԓаԓа йастәс: "Пӑтән нэмәԓты аԓ ўйаты, - ӑнта шушты сўв, ӑнта хир, ӑнта ԋаԋ, ӑнта ŏх, ӑнта кимет ԓумәтты сŏх;

4 мўйсыр хота ԓŏӈԓәты, щита хӑщаты, щиԓта йэԓԓы мӑнаты.

5 Хŏта вана ӑт ки ўԓайты, щи вош эԓты эттанән, кўрԓән эԓты хиш иԓ пӑркатаԓән. Щит ԓывиԓаԓа нўра ат питәԓ".

6 Ԓыв мӑтсәт, пӑ куртәт сӑхат кашәӈ тӑхайән Йӑм айкеԓ тутԓыман пӑ мушәӈ хŏйатәт йӑмәԓтман йӑхсәт.