1 Jisu Jeriko ge jimyolye jimkoi sese. 2 Süge Jakkai cheñe nüna duvo, i patso-law go mukyew sünda nügo je nügo. 3 I Jisu í hoĝoñ vyew i djuma cheñe? Seŝo upungda sese mahofi. Hado cheme i üchesada. 4 Sese i í hojoñe vye uvro ge gyo djeñe lufuje shoñ udru a ye lyilyig, hado cheme Jisu i se ĝabo kajoda. 5 Sese Jisu se a jikuñe, udru ge hotrolyiñe í che, "He Jakkai, kutcho lyiga; hado cheme yow no bá ñe ge ĝyojo dume". 6 I kutcho yo lyigalye lüshüldzulalye í ichi ñe ge la kake. 7 He í hohulyebi nüna na zeĝi, "I bó se lalo nüna ichi ñe ge jijeba." 8 Jakkai i gudzuñe Tawgyew í che, "He Tawgyewwa, No nó bo-luko üchea ye ñiw ná djüjome, seyo üchea ye sena djüjome djuchi go no laĝamüñeda ma se na no psüĝingua fow djüpyojome." 9 Sese Jisu i í che, "Yow he ñe a muchoahuw jikudame, sündada he i je Abraham ichi sawbamme. 10 Hado cheme nüna üsaw ye moadaw ná tchüw seyo ná basüaijo kakuwme."

11 Sese i he ñu ná dzümkoi sese, i zeĝaw a ze, sündada chedawa i Yarusalem ütrüañ a duda, seyo i vyesüw je vyesüw, se Tawgyew ichi ĝadzübraw ye hesahe kakudalaibiñe. 12 Sünda: I che, "Nüna nugo a ye ge ñetrü üĝa ge ka sügo nugo pafiñe kakutchofijo. 13 Seyo i í kulo naĝi yo ĝü ye balalye ná bosün uvyu ĝü djü, seyo ná che, ‘No kakuw kuw bumdzu davojo dawe.’ 14 Seŝo í ñetrü ge ĝyodaw na í mahoĝoñ daw, seyo ífum ge muko kiñe ñu che ki, se i ye no matsüme, se i ñidru ge ñubyu dañjo." 15 "I ñubyu lyibiñe kakutchow sese, i ana a da, ichi se kulo ĝü ye dju í bosün uvyu ĝü djülyedama, se na itrü a balaku sünda danghujoñe vyeñe se na se i yo küña ha ha dashaladama. 16 Sese uvromashü yo a ye jiku che, He übrawwa bachi djüdaw bosüñ uvyu ĝü yo dañe ĝü müñew damñeladame. 17 I í che, ‘He kulo ülüksüfowwa, bá ŝüvzüw me, ba ŝüpyo mesame sese ba umsowda kakülyeda, ayo ba ñetrü ĝü yo übraw dabei.’ 18 Sefum yo a ye jikuñe che, ‘He übrawwa, hoŝoa, bachi bosün yo uvyu pom dashamüñewme.’ 19 I í chetcho, ‘Ba je ñetrü pom yo übraw dabei.’ 20 Sefum ye a ye jikuñe chetcho, ‘He übrawwa, hoŝoa, bá bosün ye he duw ye, he í no nó gye güpaw üdza toi pyogoñe vyedaw he. 21 Hado chemeje no bá ĝedabi.’ 22 I í che, ‘Mauw kuloa, no bamdzu yo bá no trudañe chei he me.’ Ba nó danghuwbi nüna mügzütchüwñe, ha ye no ma vyema se í dzula, seyo se no ma zuw, se í djoahuwme; 23 Ba nochi bo ye bo dashabraw ná hado madjüña, se í no kakuñe sashadaw ye lakeĝijobi? 24 Seyo dju nüna na üñisa gudzudama, se na í che, ‘Se bosün ye ichigo latchojodawe, seyo djuchi ge bosün ĝü duma se í djüpyojo dawe.’ 25 Na í che, ‘He übrawwa, ichi bosün ĝü bó duŝo.’ 26 ‘No bá chemkoime, se djuchi ge duma, í seyo djüpyojoluwe; seyo djuchi ñima ichi go se í je lajodawe se ichi ha dusama. 27 Seŝo nochi se fugulu ná se vyeñidaw na se no nadru ge ñubyu dame, se na age lakuñe noñisa a shiwe.’"

28 Jisu i he ñu na chelye i Yarusalem ge navro-navro ka.

29 Seyo se i Jetun üñiñi yo pu sa a Betfage ñe Betniyah üñisa ge jikuwñe, sese i í shürhaw naĝi yo ksü ye ana cheñe ki, 30 "Üñisa yo ñetrü ge jijo dawe, seyo süge jikubyo jikuĝyoñe giĝe ichi üsa a udru ge djusa je magyoluw, pyogo vyedaw bá pajome, se í tashalye lakuwe. 31 Seyo djudamje bá dzülaimeje, hado tashamkoiya chemeje, se a ana chejodase, se Tawgyew i he í tsüdame" 32 Se kidaw ná, na jikuñe i ná ha chesedama, süna pabadabi. 33 Se na giĝe üsa ye tashamkoi se, ichi übraw ye ná dzü, "He üsasa ye hado tashamkoiya?" 34 Na che, "Tawgyew í he í tsüdame." 35 Na í Jisu ichi ge la kaku seyo nudzoĝ gye ye tapualye se udru a ñeilye Jisu í giĝe udru ge gyodügye. 36 Sünda na kamkoi sese, na nudzoĝ polu ye ĝabo toi ñevoñe ji.

37 Seyo üñisa kakulye se i Jetun pu i ĝo ge kaku, sese shürhaw na vyew upua na vyemoñe chiĝa dadaw ibó i hohuda na, lüshüldzuañe gow yo ñu zeñe Tawgyew ibo trokülye:

38 Ŝüvzüwme se ñubyu ye, dju Tawgyew iñiñi yo jikuma!

Sorgo ge ĝüdzüw seyo ñedzü ge lüshüwme!

39 Sese upu na yo süña Farisi na í chengkoibi, "He Danghubrawwa, bá shürhaw ná zea." 40 I ná chetcho, "No djomko a chemkoime, he i maziw ĝyome, kunu na ŝogzukülyejome".

41 Se Jisu üñisa kakuñe se ñetrü í holye ubo kse. 42 Sündalye che, "Ha ye ujowa, he ba; am, ba bába, he ñeto ai lüshüjo ñu danghudama, séŝo se i yabó bañisa yo muŝuadabi. 43 Hado cheme se ñeto ye badru ge kakujo se bá vyeñiw na sülyeñtchü pyogoñe bá djetuĝujome, seyo djetuĝulye bá ñujome. 44 Seyo bá seyo badra ayo a ná bachi angasa ná, nogüdzü nadra gülyiajome, seyo badru ge kunu yo je kunu matrüjome; hado cheme ba süna dajo ye kye badru ge nülvow vyeñe hojema sei madanghuje".

45 Sese Jisu i ñegru ge drüñe ĝyodaw ná nopsü ge lahuatsü. 46 Seyo ná che, "Ĝidame; ‘Nochi ñe ye küĝüw ñejome,’ séŝo djo he í tsaĝa-laĝaw nachi ñe da joadamme." 47 Seyo i muhu-muhu ñegru ge shi-ñu truñgudru: seyo se müga sawlyiw na seyo shizew-ñu zew na vyew djekeĝiñe í shijoñe tumuñgudru. 48 Séŝo haje ĝabo matchüla; he í küna dañe dajojema, hado chemeje vyew na dru-lu djübyo djüĝoñe ichi ñu dzüñgudru.