1 ክልቀቲች ብርተ ዮ ሄእ ላገተኔ ሞጮጭኖሚሃ፥ እሌንተኔ ለዕኖሚሃ፥ አጥራመንት ለዕኖሚሃለከ አንጋንከኔ አንፎሚሃ ኩልናንክዕኔ።✝1፥1 ያህ. 1፥1። 2 ኩ ሄኡ ለልዮኡ፤ ነኡን ለዕኖም፤ መሰከርናም፤ ከኒች ብርተ አናከኔ መገን ቤቾን ዮኢሃለከ ኔሳሃ ለሌኢሃ ዘላለሚሃ ሄአኖ ሄእተኔሃ ኩልናንክዕኔ።✝1፥2 ያህ. 1፥14። 3 ኒን ሜጡበ ሜጦመት ሄኦህዕኔተ ለዕኖሚሃለከ ሞጮጭኖሚሃ ክዕኔንከ ኩልናንክዕኔ፤ ኒ ሜጦመት አነ መገኒንትለከ ቤትንከስ መሲህ ኢስን ሜጡባት። 4 ሙንዲኑኔ ዊመ እኮተ ካን ከተንባንክዕኔ።*ሙንዲኑኔ፦ መት-መቱ ሉህ ክታበት «ሙንዲኑክዕኔ» ይታአ።

5 ኢሲች ሞጮጭኖሚሁለከ ክዕኔሃ ኩልናም ሶህኑት ተኒት «መገኑ ኑር እኮቤቺሃ እስቤቾን ቱንስቹ ሆሮን ዮበአ» ይታእተ። 6 ህካን እኮቤቺሃ «መገኒን ሜጦመት ዮኔ» ይነን ቱንስች ኣዜን ሄዕኖም ጎሬ ክዝምባሚት ቤሉ ሀንቅን ሄዕኖምበአ ዩሃን። 7 ጠዉ እኮጎሬ እስ ኑሬን ሄዕዮገን ነኡ ኑሬን ሄዕኖም ጎሬ ገገዉንኩኔ ሜጦመት ሄኣኔ፤ ህትን ቤትስ ኢስ ቄጉ ጩብች ጉዕሚችን ነጠ አአኖኔ።✝2፥7 ያህ. 13፥34።

8 ህካን እኮቤቺሃ ነኡ «ጩቡ ዮኔበአ» ይኖምጎሬ ገዉኔ ሉስንሳሚት ቤሉ ሀንቁ ኒ ኣዜን ዮበአ። 9 ህትን ጩብኔ መገኒሃ ኩልኖሚች መገኑ አመዕነሞሃለከ ፈየ እኮቤቺሃ ጩብኔ ጉዕመንከ «ፈቁን» የኖ፤ ህትን ጩብችኔ ጉዕሚችን ነጠ አአኖኔ። 10 ነኡን «ጩብ አዕኖምበአ» ይናሚሃ እንኮምጎሬ መገኑ ክዝበኘ አዕናምት፤ ህትን መገን ላገንት ኒ ኣዜን ዮበአ።