1 አመኤ ኦሶ! ክዕኔቤቾን እኮሀንገን ቀርች ላገት ደዕልት አልባዕልቶተለከ ኬዕምኚን ቶገሙ ደእቶተ ኒተኔሃ ዱአ አዕዬ። 2 ህትን መናን ጉዕማንን አመዕነቱ ሄእበቤቺሃ ሾከለከ ሂለ መኒች ጡምኖተ ዱአ አዕዬ።

3 ጠዉ እኮጎሬ ጠረኝሰኖህዕኔለከ ሸይጣኒች አገረኖህዕኔ ቀርቹ አመዕነሞእሃን። 4 አዘንዛንክዕኔ ጠወ ቴሁ እኮ ከ ኤተሩ አቴነንተገ ቀርቺን አመዕንናንክዕኔ።

5 ቀርቹ ቀልብክዕኔ መገን ኢተተ ደጎኖተለከ መሲህ አታዕሉ ደጎኖተ አዎንሱንክዕኔ።

6 አመኤ ኦሶ! ኒች ተማርቴንተ ትምርቲን እሁዕነ ሆጉተ ኢትበ አመዕናንቺች አዬቺሁ አደ እኮኖተ ቀርቹሃ መሲህ ኢስ ሱዕሚን አዘንዛንክዕኔ። 7 ነኡ ክዕኔቤቾን ሄዕኖም ወክት ዋንክዕላመተ እሁ ሆጉኔ አዕኑሁ ደጌነንተቤቺሃ ኔሳሃ አጉዴን ሄኡ ሀስሰኖህዕኔገ ደጌነንተ። 8 አዬ አሌኒ እጅነተ እንካምበእገ ሀንከዕርተለከ በራሃ አጰመን ሆጉተ አዕነን ሄዕኖም ቤሉ አዬቺ ጣብተ ጠለዕለ እንቶምበአ። 9 ሁኩንን አዕኑ ኒ ምሳልተ አዎንቶኖተ ይኒት ቤሉ ሁኩን ኔሳሃ ሀዕለንሸ ደእኖተ መብትት ሄኡዕናኔ ፈንቅትበአ። 10 መሰንትስ ነኡ ክዕኔቤቾን ዮም ወክት «ሆጉተ አሲሃ ኢትቡ መንቹ እቱንከ» ይን ከ ትዛዝ ኣስኖንክዕኔ እቅ። 11 መሰንትስ መት-መቱ ሆጉተ አሲሃ ኢትቡ መኑ በላንከክዕኔ ሄኡሰ ሞጮጭኖም፤ እሰን ኣግስበሰ ጠዋን ኣገን መቱርቹሃ አቱዕነ ሄኣእራን። 12 ህትኔ መነ ረጀይት ሆጉተ አተን ገይሰ እቸተ እቶተ ቀርቹሃኔ መሲህ ኢስ ሱዕሚን አዘንዛንሰ፤ ሸንዛንሰ።

13 አመኤ ኦሶ! አዕኑ እኮጎሬ ጡመ ሆጉተ አቶኖተ «ቆንዶድኖም» ይቶኖቼ።

14 ተን ዳብዳቤን ክዕኔኤሃ ኩልኖም ሸዘነተ ሞጮጭቡ መንቹ ሄዕዮ ጎሬ ህትናሙ መንቹ አጥራመቴን ደጌ፤ እስን ሙሎተ እሲን ደቀንቶኖቼ። 15 ጠው እኮጎሬ አመቤትገ ኡሙዕርዬስ ቤሉ ዲንገ አቴን ለኦኖቼስ።

16 ወገሬት ቀርቹ ገውንኩስ ጉዕመ ወክት ጉዕመ ጠዋንን ወገሬት ኣሱንክዕኔ፤ ቀርቹ ጉዕሚንከክዕኔ ሜጡበ እሁን።

17 ከ ወገሬት ገይኤ አንጋን ከተቦንክዕኔሁ አኔት ጳዉሎሴት፤ አን ሶኮም ዳብዳቤን ጉዕማንን ደገንታ መላት ተኒት፤ ከተባሚንኩ ህትጎታን።

18 ቀርቹሃኔ መሲህ ኢስ ኣስቱት ክዕኔን ጉዕሚንከክዕኔ ሜጡበ እኩን።