1 መቱ በር ኢስ «ጌንሴሬጠ» ዬኖ ባር መዴን ኡርዮሃኔን ልግቡ መኑ እስበ ሆንጠክ መገን ላገተ ሞጮጭቶተ ሀንበዕለንተን 2 ኢስ ባር ገበላን ኡርት ሄኦ ለሙ ጀልበ ለዕዮ፤ ቁርጩሜተ ወሻዳሩ ጀልብ ኣዚች ፉልት ወሻደሰ ኣንሽታኢት እቅ። ጀልብ አሌን ቁርጩሜተ ዎሻዳሩ 3 ኢስን ህከን ጀልቢች መቶንከስ ስሞኔሀኔን ኣግ ሎረ ባርበ ሽቅ አኦተ ስሞኔ ጠዕሜስ፤ ህከን ጀልባን አፉዕል ኡመት ተማርሴእ።✝

4 ኢስ ጠወዕይ ሹሎች ኤተሮን ስሞኔ «ጥዕላሻ አደ ዋሽቴን ቁርጩሜተ ወሻዶኖተ ወሻዳክኔ ኡጅዬ» ዬሰ።

5 ስሞንን ፈንቀሽ «ቀርቾ! ዊመ ሀዎሩተ አጰመን ገልን መቱርቹሃ አንፎምበአ፤ ጠዉ እኮጎሬ አት ይቶንቴኤች ወሻዳኤ ኡጃም» ዬእ።✝ 6 እስ ዬገን አቶ ወክት ልግብ ቁርጩሜተ አፋን ወሻዱሰ ፊልተኡ ጀመሮ።✝ 7 እሰን ዎሎ ጀልባን ሄኦ ጃለሰ አሜት ሀዕልቶሰተ ቀቀሶሳ፤ ጃለሰን አሜት ለሞ ጀልባን ቁርጩሜተ ዊንሽታን ጀልቡሰ ዊን ኣአሞተ እኮ። 8 ስሞን ጴጥሮስ ህካን ለዕዮ ወክት ኢስ ሎከ አሌን ኡብ «ቀርቾ! አን ጩበኘ እኮምቤቺሃ ኢ መድ ሆንጠኮት» ዬእ።

9 እስ ህካን ዬ መሰት አፎ ቁርጩሜተስ እስለከ እሲን ሜጡበ ሄኦእሩ ጉዕሙንኩ አበ አጀብሲጭቶቤቺሃት እቅ። 10 ህትን ስሞኔ ጃለት ዘብደዎሴ ኦሱት ያቁብለከ ያህይ አጀብሲጭቶኡ፤ ጠዉ እኮጎሬ ኢስ ስሞኔ «ዋጅቶት ከኒች ኤተሪሃ መነ ወሻዳንቲሃ እካንት» ዬስ።

11 እሰን ጀልበሰ ኡለ አደ ሽቅ አቶች ኤተሮን ጉዕመርቹንከሰ አጉርት ኢሰ አዎንቶኡ።

12 መቱ በር ኢስ መቶ ከተማን ሄዕዮገን ጎግ አል ጥዘናን* ጥዦ መቱ መንቹ አሜች ኢሰ ለዕዮ ወክት ብሬንከስ ኡብ «ቀርቾ! ተሽዬሄ ጎሬ ፈይሶኤተ አታልታንት» ይ ኡጬስ።

13 ኢስን አንጋንከስ አልስ ሀጣዊ «ኤ ፈይ!» ዬስ፤ ህከ ወክትንከ ሁኩ ጎግ አል ጥዘነት ገፈርቶስ። 14 ህትን ኢስ መንቹስ «ከ ጠወ መቶ መንቺሃ ጠወኦት፤ ጠዉ እኮጎሬ መርት ገዉክ ቂስቺሃ ለሊስ፤ እሲንከ እማኘ እሆተ ሙስ አዘዦገን ፈይቶንትቤቺሃ ክትመ ሆንጠህስ» ዬስ።✝

15 ጠዉ እኮጎሬ ኢስ ዱዱቡ ጉዕመ ወክቲችን በትሽ ሞጮጨሞ፤ ልግቡ መኑ እሲች ሞጮጭቶተለከ ጥዘናችሰ ፈይቶተ ጭም ይታኢት እቅ። 16 እሁን ቤሉ እስ ኡለ ኡድመ መር ሜጡንኩስ ዱአ አአኖ እቅ።

17 መቱ በር ኢስ ተማርሰን ገሊላን ይሁድ ባዶን ዮ ኦሌች ጉዕሚችለከ ዬሩሳሌም ከተሚች አሜቶ ፈርሳውያኑትለከ ሕግ አስተማረት መዴንከስ አፉዕልቶ እቅ፤ ኢሲንከ ጥዘናመተ ፈይሰኖ ቀርች ዎልቀት አሌስ ሄኦ እቅ። 18 ህከ ወክት መቱ ሎከተ ናፈ መንቹ ዴሲን እጅት ኤቦኡ፤ እሱንከ ምኒ ኣግስ ኢስ ብሬን አፉሽቶተ ዎቃ ሀሳኢት እቅ። 19 ጠዉ እኮጎሬ መኑ በተዕዮቤቺሃ ሎከተ ናፈ መንቹ ምኒ ኣግሳ ዎቃሃ ሆጎኡ፤ ህካን እኮቤቺሃ ምኒ እሌ አል ፉልት እሌስ ብሎኬቲች መቱ ጌሰ ፈንት ህከ ናፈ መንቹ ዴሲንከስን ኢስ ብሬን ድርሶኡ።* 20 ኢስን አመዕነቱሰ ለዕይ «ኮ መንቾ! ጩቡክ አጉረሞሄ» ዬስ።

21 ህካን እኮቤቺሃ ሕግ አስተማረትለከ ፈርሳውት «ኩ መገን አሌን ቦሮር ላገተ ጠወአኖሁ አዬት? ሜጥቾሃ መገን ቤሉ ጩብ ፈቁን ዮተ አታለኖሁ አዬት?» ይተን ሰውዩ ጀመርቶኡ።

22 ኢስ ሰውትሰ ደግ «ካን ቀልቤንከክዕኔ ሚሃት ሰውይቴነንታሁ? 23 ‹ጩቡክ ፈቁን› ዪችለከ ‹ኬዕ ሃም› ዪች ሀኩንስ ቆሀኖ? 24 ጠዉ እኮጎሬ ከን ኣዱንያ አሌን መንች ቤቲሃ ጩብ ፈቁን የኖ ሹምነቱ ሄኡስ ለሊሳንክዕኔ» ይ ፈንቀሽ ናፈ መንቹንከ «አን ኬሳሃ ያንኬ፤ ኬእ ዴሰክ እጅት ምንክ ኦሮእ» ዬስ። 25 ህከ ወክትንከ ብሬሰ ኬዕይ ኦሰዕዮ ዴሰ እጅ መገኑ ገለትጨን ምንስ ኦሮዕዮ። 26 ህካን እኮቤቺሃ ጉዕመንከ መነ አጀብሲሻን መገኑ ገለትጭተን «ከበር አጀብሲሰኖ ጠወ ለዕኖም» ይት አበ ዋጅቶኡ።

27 ህከኒች ኤተሮን ኢስ ህከን አዲች ፉል «ሌዌ» ዬኖ ቀረጠ ሙረኖሃ ቀረጤኖቤቾን አፉዕሌእሃ ለዕይ «አወኔኤ» ዬስ። 28 እስን ጉዕመርቹንከ አጉር ኬዕይ አዎኞስ።

29 ሌዊን ኢስሃ ምኔንከስ አበ ድግሰ ቅጥ አዕያን ልግቡ ቀረጠ ሙርታእሩለከ ዎሉ መኑሁ እሳን ሜጡበ ማዳን አፉዕልቶ እቅ። 30 ፈርሳዊያኑትለከ ሕግ አስተማረት ኢስ አሳበተ «ቀረጠ ሙርታሀኑኡንለከ ጩበኛኖን ሜጡበ እቴነንታሁለከ አጌነንታሁ ሚሃት» ይት ቁንቁቶኡ።✝

31 ኢስን «ሀኪሙ ሀስሰኖሁ ጥዘናማታት ቤሉ ፈይሃበአ። 32 አን አሜቾሚሁ ፈያኑተ ገኦተ እሁዕነ ጩበኛኑት ጩብችሰ ቶበት ፈንቀልታገ አኦታት» ይ ፈንቀሼእ።

33 ህከኒች ኤተሮን መት-መት መናከት ኢሰ «ያህይ አዎናኑትለከ ፈርሳዊያኖ አዎናኑት ልግብ ወክት ሶመንተን ዱአ አታአ፤ ጠዉ እኮጎሬ ኪ አሳበት እታኢሁለከ አጋኢሁ ሚሃት?» ይት ጠዕምቶስ።

34 ኢስን «እዜቹ እሳን ሜጡበ ሄዕዮገን ቦሎቸ ገኤመ ኮሃ ሶመንታገ አቶኖተ አታልቴነንንዶ? 35 ጠዉ እኮጎሬ እዜቹንከ እሳች አደ አኤን መሴኖ ወክቱ አሜተኖ፤ ህከ ወክት ሶመንታአ» ዬሰ።

36 ኢስን መት ምሳልተ «አዪሁ ሃዕሮ ኦድኖች ቃፈተ ፊል ኑባጵቶ ኦድኖን ቃፈኖሁ ዮበአ፤ ህካን አዕዮ ጎሬ ሃዕሮ እሱ ፊለኖ ቤሉ ሃዕሮ ቃፈት ኑባጵቶ ኦድኖን መክታበአ። 37 ህትን አዪሁ ሃዕሮ ወይነ ቦበጤማሃ ኑባቾ ሆቆማዶን አፉሸኖበአ፤ ህካን አዕዮ ጎሬ ሃዕሮ ወይነ ቦበጤማሁ ሆቆማዱንከ ፊላንስ እስን ዱንተአኖ፤ ሆቆማዱንኩ በአኖ። 38 ህካን እኮቤቺሃ ሃዕሮ ወይነ ቦበጤማሃ ሃዕሮ ሆቆማዶን አፉሹ ሀስሰኖ። 39 ህትን አዪሁ ‹ዱንኬኢሁ ቆሀኖ› የኖቤቺሃ ዱንኬ ወይነ ቦበጤማሃ አጎች ኤተሮን ሃዕሮ እሱ ሀሰኖሁ ዮበአ» ይ ኩሎሰ።