Apocalipse 7

Ɓǝɓeng nda nafiya Faara a hǝrgha nda

1 A kwasamad yanɗiya, na fathlǝngya Faara ni faɗa ƙǝƙǝt a kudma faɗa yi hu ƙǝshiirha, ˈyaɗang kwamana nda ɓereukina fa faɗa piirha fa aten chehweerha, ko aten wuri aama, ko aten kala tur ɗǝfrha. 2 Nggǝryi na tǝthlǝnda Faara a tǝra sǝ a man kyad yanfara ɓa, ƙǝsɗǝ ǝn ɗǝf haar Faara ha na tǝ yibrha fa. Tǝ urarha manggǝn nagha a aah fathlǝngya Faara na Faɗa fǝrang nanda sǝsǝmnda kanda na a sǝɓang ngganda chehweerha ɗǝ tǝ wuri aama. 3 Ndagha tǝthlǝnda Faara, "A ǝnang ɗun wundǝrha ƙǝshiirha fa wa, ko wuri aama ni, ko ɗǝfya ni, ƙǝl a ɗǝfang ɗǝm haara mafaya Faara fa a pǝm ndan." 4 Tǝrgha sǝk hang nda nafina ni ɗǝfang nanda haara kanda fa hu turya kumkap sǝri yi Isǝreela, kanda kumnggitghǝn haru tǝ kumnggit faɗa kap faɗa (144,000). 5 Ɗǝf harɗi ǝnang nanda turya Isǝreela nǝghǝn kiya. Turya Yahuda 12,000, turya Roben 12,000, turya Nggad, 12,000, 6 turya Ashir, 12,000, turya Naftali, 12,000, turya Manasa, 12,000, 7 turya Siman, 12,000, turya Lawi 12,000, turya Issakar, 12,000, 8 turya Dzabuluna, 12,000, turya Yisufu, 12,000, turya Mbenjemen, 12,000.

Teera na manggǝn yi nafiya na lukkya fa pǝpet

9 A kwasamad yanɗiya, ƙǝlee ɗǝ na manda teera ni yi fiya mbuwa nǝm mbang thlǝɗang kanda. Kyagha nda ɓa hu chehweeya, tǝ kiwa, tǝ turya, tǝ miiya, kanda ƙǝƙǝt a mbed tsǝnggam kutǝryirha tǝ a mbed Wan Kamnda ƙǝm. Kanda tǝ lukkya fa pǝpet, tǝƙǝm ƙǝs nda wuhwar ɗǝf temburu ha. 10 Tǝrangganda urayi ndan sǝ na nda a ndaarha, "Ɓagha hǝrǝkrha ɓa a thlǝmad yinǝm Faara, yanɗi na tsau hu tsǝnggam kutǝryirha tǝƙǝm a thlǝmad Wan Kamnda ɓa!" 11 Fathlǝngya Faara heu kanda ƙǝƙǝt muwang nda tsǝnggam kutǝryidɗi a maɗufu, tǝ shinggini, tǝ ǝnggini natǝ yibrha fa faɗa. Tǝrgha ɓǝra nda hai kwang ngganda tendan hweeɗe hai a mbed tsǝnggam kutǝryidɗi, tǝrang shilee nda Faara in, 12 na nda a ndaarha, "Atsaukake! Faala tǝ fǝr mamnggirha, tǝ thladwayirha, tǝ usaarha, tǝ mamnggirha, tǝ sǝsǝmnda, tǝ shembe, a tsauka yi yinǝm Faara ni pakwanɗǝ! Atsaukake!" 13 Tǝrgha tal ahur shinggini tsahe mee nǝn, "Nda wunni ya natǝ lukkya fa pǝpet kiya? Tǝƙǝm ɓagha nda ɓa a yanggi?" 14 Tǝrgha ndanggi, "Mbarkama, sǝnnasǝ." Tǝrgha ndeeghǝn, "Kanda ni kyagha ɓa hu sǝsaarha na thlerghǝn. Tsaɓang nda lukki ndan ɗǝ tǝ far Wan Kamndǝɗi, ndǝn tsau nanda pǝpet." 15 Ndǝn ǝnagha ndǝn, "Na nanda ƙǝƙǝt a mbed tsǝnggam kutǝryid Faara, na nda a ǝnang taara sǝ nda fǝɗikrha tǝ yanfara hu ƙǝnggǝn. Yanɗi na tsau hu tsǝnggam kutǝryidɗi nǝghǝn a ƙǝla kanda ha hu chamnggǝn a mbǝɗi nanǝn sǝ. 16 Mbǝ miirha nggǝr ƙǝs kanda wa, mbǝ hushimnda nggǝr ƙǝs kanda wa, mba nda nggǝr tǝk yanfara fa wa nduwa tǝk kala ǝn thleera nda fa wa. 17 Ƙǝsǝr Wan Kamndǝɗi na a maɗufud tsǝnggam kutǝryidɗi nǝn a tsaurha tǝlafǝd ndan, nǝn a takkwarha tǝ kanda a mbǝya ngǝtta aama ɗǝ na fǝr yibrha. Na Faara a pang aam yid ndan ɗǝ heu."