Hebreus 1

Kalgha Faara sǝ tǝ mii Wanggǝn

1 Kaar, kalang Faara chichiyinǝm sǝ ahu kwamangya hangga tǝ ƙǝm hu sayi hangga tǝ mii annabiya. 2 Amma ahu ɓengginiya na yi mii ngwala ƙǝshiirha, kalang ɗǝ ƙǝm sǝ tǝ mii Wanggǝn. Tǝ Wan ɗa ni ǝnana Faara ǝngya heu, tǝƙǝm wur ɗa ndǝn a thlǝ ǝngya nǝn heu. 3 Ndǝghǝn ni kukwaryid mamnggid Faara tǝ ƙǝm ndǝghǝn ni thlǝgha Faara fa. Ndǝghǝn ni ƙǝsgha ǝngya heu ahu laɓarghǝn na tǝ sǝsǝmnda. A kwasamadɗi tsaɓang nǝn ƙǝm ɗǝ hu ɗimiyid nǝm, tsauka a talara a yisǝmad Faara na tǝ sǝsǝmnda fa kaan.

Kal Wanɗi fathlǝngya Faara

4 Nanǝn kee wal mamnggirha nǝn kalgha fathlǝngya Faara ƙǝla ɗǝfang na nda thlǝma kalgha yi ndan mamnggirha.

5 Ƙǝsǝr mbǝ tǝthlǝnda Faara sǝ ˈwana Faara ndang nda,

"Waana ni sa,

Tsauɗi Tsu a weeriya."

Nduwa ƙǝm,

"Niya tsaurha Chin,

Ndǝghǝnggi ƙǝm tsauka Waana wa."✝1:5 Dzabura2:7; 2 Samaila7:14; 1 Ɗeleewar fa sǝngya17:13

6 Amma ˈwanǝn thlǝn Wan ˈwadghǝn hu ƙǝshiirha ɗǝ, ndǝghǝn,

"Ngwa fǝrangga fathlǝngya Faara mamnggirha."✝1:6 Ɗeleewar nggǝr ngwa kumarha32:43

7 Aten fathlǝngya Faara, ndaaghǝn,

"Na Faara tsang fathlǝnggighǝn ƙǝla sǝsǝna,

mafayighǝn ƙǝm tsawa nda ƙǝla sheneu waarha."✝1:7 Dzabura104:4

8 Amma aten Wanɗi ndǝghǝn,

"Tsǝnggam kutǝryid wa, Faara,

nǝn a tsaurha pakwanni ɗǝ,

Sǝsal kutǝryid wa yi nggayirha ni

9 Tar nggayirha ndǝna midwa,

Kar na tar mbǝlfeerha!

Tsaunǝn kee, yiwa Faara ndǝn ɗǝfowa aten shayiwa,

ƙǝmo fǝɗeerha nǝn fa yi mbǝna farha."✝1:9 Dzabura45:7-8✝1:9 Dzabura45:6,7

10 Ndǝghǝn ƙǝm,

"Ka a katǝradghǝn, Chinǝm,

Sa ǝnagha ƙǝshiirha,

Talara ƙǝm tar harwa ni.

11 Na nda a ngwalarha,

Amma sa na a naarha sǝ;

kanda heu na nda a tǝla ɗǝ ƙǝla kaɓarha na kaɓaarha ǝnaarha.

12 Na a faɗang kanda ƙǝla ɓar kaɓarha,

Na nda a nggǝrang kanda hai ƙǝla na niifa mbeɗeng karidghǝn hai.

Amma sa mba tam kyaharra hai wa,

Mbǝ hurad wa tam ngwalarha wa."✝1:12 Dzabura102:25-27

13 Ahur fathlǝngya Faara mbusǝ ˈwana Faara ndang nda,

"Tsawu a yisǝmanna

ƙǝl tsawang ni fatsanggiwa

akamu saryiwa."✝1:13 Dzabura110:1

14 Fathlǝngya heu sǝsǝn fatarya ni kee. Thlǝnna Faara kanda ka a ɗangganda fingyayina sǝ na har langaad hǝrǝkrha.