Mateus 26

Ƙǝnang mamngya Yahudaya hai a ɓǝlang ngganda Yeeso

1 Ngwalang na Yeeso thlǝk ǝnggini heu, ndanggǝn fatsahayighǝn, 2 "Ƙǝla sǝnnunsǝ, takhƙǝn ɓeena sǝri na a ǝna wutsǝfayid tǝɗaarha nda, na nda a fǝr Wan Niifa ka a tawang ngganda ɗǝ."*26:2 Kyarhaɓa 12:1-27

3 Tǝrgha mamnda firistaya tǝ shingya na nda a wumnda hai a kwakirǝm Firis na manggǝn, na thlǝmnggǝn Kayafa. 4 Ƙǝnang ngganda hai na nda a ƙǝsang Yeeso ɓǝɓee ɓǝlang ngganda. 5 Ndaa nda, "Amma mbǝ a sayid wutsǝfayidɗi wa. Naɗǝ fiya ǝna kakyathlaanga."

Irang nuneefa fǝɗeerha Yeeso teena a Mbetani

6 Nana Yeeso a Mbetani, a minda kii Siman ˈwana termeerha ƙǝsa. 7 Nanǝn a hǝb ǝnnarhami, ɓagha nuneefa ɓa tǝ ƙǝthlikrha urdi na sǝdghǝn mbǝnggǝn na tǝ wuɗǝɓǝla fa kaan iranggǝnǝn Yeeso a tenggǝn.*26:7 Luka 7:37-38 8 Amma nana fatsahayina ndǝn sǝbgha hur ndan ɗǝ ndaa nda, "Yanɗiya sǝbrha ni ɗǝ kee." 9 "A ndam kwang heng nda fǝɗedɗa ɗǝ na nda a wal wuɗǝɓǝla sǝ kaan fǝrang wuɗǝɓǝlghǝn nda fa yamiya."

10 Amma sǝnang na Yeeso ǝnɗa hai na nda a thlǝkrha ndanggǝn kanda, "Kama nun a ɓilla nuɗiya? Ai ǝnaɗǝ ˈya na ngga a nggi. 11 Ƙǝtsar na fa yamiya narha tǝ kun, amma mbi naarha ƙǝtsar tǝ kun wa.*26:11 Nggurub Ngwa Kumaarha 15:11 12 Iree nǝn urdi ɗa fa ya, ngwe nǝn fa ka yi panna. 13 Niya pǝrang ƙǝkafek kun, Kala mbǝrha pǝrna nda laɓar Faara sǝ ahu ƙǝshidɗiya, ǝnɗi ǝnana nuɗiya mbǝ tam mbǝtta wa na nda naarha ɗalghǝn teena."

Nggǝm Yahuda fa a fǝr Yeeso nǝn

14 Tǝrgha Yahuda Iskaryoti tal ahur fatsahaya Yeeso kumkap sǝri ɗǝgha thlǝma mamnda firistaya ɗǝ 15 tsakhmee nǝn, "Ma nun a fǝreerha a fǝrangɗi Yeeso kun?" Nanǝn kee fǝrang wuɗǝɓǝl wurirha nda kumnggit mahan.*26:15 Dzakariya 11:12 16 Ka a farɗi nagha Yahuda a kaɗa kwamana na a fǝrang Yeeso nǝn kanda.

Hǝb Yeeso ǝnnarhami yi Tǝɗaarha tǝ fatsahayighǝn

17 A katǝra far wutsǝfayidɗi yi mburodi kula mekhna, ɓagha fatsahaya Yeeso thlǝmadghǝn ɓa tsahang mee nda, "A yanggi na midwa ɗan nggorha fa ɗǝna hǝb ǝnnadmid tǝɗaarha sǝ?"

18 Ndanggǝn kanda, "A kyaɗun hu wupǝri ɗa hai, na niifa sǝ nun a naarha. Ndaman, ‘Ndagha mala, nduwus sayid na ɓa, ni a hǝb ǝnnadmid Wutsǝfayid Tǝɗaarha tǝ fatsahayina a minda kyawa.’ "

19 Nanǝn kee ǝnagha fatsahayini ƙǝla ndangna Yeeso kanda ngwa nda fa tǝ ǝnnadmid Wutsǝfayid Tǝɗaarha a mbǝɗi.

20 Tsǝna figrha hai tsauka Yeeso hai hǝb ǝnnarhami nǝn tǝ fatsahayighǝn kumkap sǝri. 21 Na nanda a hǝb ǝnnarhami ndangga Yeeso kanda, "Niya pǝrang ƙǝkafek kun, tal ahur nun nǝn a fǝr nggi."

22 Sǝbgha hur ndan ɗǝ nagha kowunni a ndang nda, "Nggini wa, Chinǝm?"

23 Nggǝrangga Yeeso kanda sǝ, "Tal ahur nun hǝbgha ǝnnarhami tǝ nggi hu tasau tal nǝn a fǝr nggi.*26:23 Dzabura41:9 24 Ƙǝsǝr tǝtani a mǝrgha Wan Niifa, ƙǝla thlǝkna Ɗeleewar Faara ƙǝtǝm. Amma ǝn kawa ni a niifɗi fǝrgha ndǝn. Nǝn a tsaurha a fad niifɗi a nggushi nggǝt waana ndan."

25 Tǝrgha Yahuda yanɗi na a fǝr Yeeso, ndǝghǝn nggi ƙǝm Tsakhmee nǝn, "Mala, nduwa nggini wa?"

Nggǝrangga Yeeso sǝ, "Sa ma thlǝk nan."

Hǝb ǝnnarhami yi Chinǝm

26 Na nanda a hǝb ǝnnarhami, tǝrangga Yeeso mburodi sǝ usa Faara nǝn kyanggǝn hai fǝranggǝnǝn fatsahayighǝn ɗǝ ndanggǝn kanda, "Thlaama kyaman, thlu fanna ni ya."

27 Tǝranggǝn wuhuleurha sǝ na tǝ aam inabi usa Faara nǝn atenggǝn. Fǝranggǝnǝn kanda ɗǝ ndǝghǝn, "Saama kun heu. 28 Ƙǝsǝr farna ni ya yi lǝghǝtta ɗǝfmee, irang nanda ɗǝ ka fiya hangga yi chakh ɗimiyirha.*26:28 Kyarhaɓa 24:8; Irmiya 31:31-34