Romanos 10

1 Shayina, ǝnɗi na minna tǝ hwan Faara na a walgha nafina Isǝreelaya hǝrǝkrha. 2 Ni fǝr shedawa tǝ ndarha na mindan ǝnang taara Faara, amma sǝnangwa nda hai wa. 3 Hǝrǝm nǝn naarha sǝnangwa nda nggayid Faara hai wa, na mindan sǝ kaɗa yi alten ndan, fǝr wanda alten ndan hu nggayid Faara wa. 4 Ƙǝrǝsti ndǝna nggǝl mii ngyakhrha, kala niifa fǝrgha ƙǝkafek nǝn naarha tǝ nggayirha fa.

Hǝrǝkrha yi kowunni ni

5 Chirelthgha Musa aten nggayirha tsauka yi ngyakhrha: "Kala niifa ǝnagha ǝngginiya a ǝna taara nǝn sǝ." 6 Amma nggayirha tsauka hu fǝrƙǝkafek ndǝghǝn, "A ndanna ahurwa, ‘Wunni a tǝra talara ɗǝ?’ " Ka ɗǝgha ɓarha hai tǝ Ƙǝrǝsti. 7 "Nduwa, ‘Wunni a ɗǝrha mbǝd tsawud mǝrya ɗǝ?’ " Ka ɗǝgha thleng Ƙǝrǝsti sǝ hu mǝrra. 8 Amma ma nǝn a ndaarha? "Na laɓarɗi tsau tǝ sa fa; nǝghǝn hu miwa tǝ hurwa," ndǝna laɓar fǝrƙǝkafek nǝm a pǝra. 9 A pǝr nan tǝ miwa tǝ ndaarha, Yeeso ndǝna Chinǝm, tǝ ƙǝm fǝrna ƙǝkafek ahurwa tǝ ndaarha thleng Faara sǝ ahu mǝrra, na wal hǝrǝkrha. 10 Ƙǝsǝr tǝ hura ni na niifa fǝrƙǝkafek ndǝna tsaurha mǝmǝl a mbed Faara, tǝ mee ƙǝm nǝm pǝrghǝn ndǝnǝm wal hǝrǝkrha. 11 Ƙǝsǝr ndagha ɗeleewar Faara, a "Kala niifa fǝrgha ƙǝkafek tǝghǝn mbǝ kyarha hu shilee hai wa." 12 Ƙǝsǝr mbǝ tsawud ɗǝɗamǝn nggirha sǝ a pathlang Tǝyahudarha tǝ fingya mbuwa Yahudaya wa, ƙǝsǝr Chinǝm ɗani tal, ndǝna chinǝm heu, ndǝghǝn ni na fǝr parka a kala niifa aagha ndǝn. 13 Ƙǝla ndaana laɓar Faara, "Kala niifa aagha thlǝm Chinǝm nǝn wal hǝrǝkrha." 14 Amma ƙǝƙǝn nanda aaghǝn kanda kula fǝrƙǝkafek? Ƙǝƙǝn nanda fǝrƙǝkafek aten niifɗi ˈwawa nanda sǝk laɓarghǝn? Ƙǝƙǝn nanda sǝƙƙǝn a pǝrang ngwa niifa ndǝn kanda wa? 15 Ƙǝƙǝn na niifa pǝr laɓar Faara a thlǝn ngwa nda kanda wa? Ƙǝla nanǝn chichirethlee hai, "ˈYa ni na ngga a nafini ɓagha ɓa tǝ Laɓara na Mbǝnggǝn."

16 Amma mbǝ Isǝreelaya heu fǝrgha ƙǝkafek tǝ Laɓarɗi na Mbǝnggǝn wa. Ƙǝsǝr ndagha Ishaya, "Chinǝm, wun fǝrgha ƙǝkafek tǝ laɓarɗi sǝk nǝn a mii nan?" 17 Nanǝn kee, kyagha fǝrƙǝkafek ɓa hu sǝk laɓara, sǝkrha ƙǝm laɓar Ƙǝrǝsti ni.

18 Amma tsakh mee ni, "Sǝkkwa nda Laɓarɗi wa?" Ƙǝkafek sǝk ndan. Ƙǝsǝr "Sǝk nda urad ndan hu ƙǝshiirha heu, sǝk fiya laɓar ndan ta mii ngwala ƙǝshiirha ɗǝ." 19 Amma nggǝryi tsakh mee, "Sǝnangwa na Isǝreelaya hai wa? ˈWagha Musa ndaarha, ‘Ni kyang kun hu sǝrǝkrha hai tǝ nafini mbuwana chehweed nun tal, tǝ ƙǝm niya sǝɓang hur nun ɗǝ tǝ nurya nafiya.’"

20 Tǝrgha tǝrangga Ishaya uradghǝn sǝ ndǝghǝn, "Waled nafiya kaɗa wa nggi, kyaɗang ɗi fadna nafiya tsakhkwa nggi". 21 Amma aten Isǝreela ndǝghǝn, "Hu parra fara heu tǝrang ɗi harna sǝ a nafiya mbuwa fǝr mamnggirha tǝ fingya na tendan kakrak".