João 21

Yɨɨsu arabhahwarʉkɨra abhɨɨga bhaazɨ Gariraaya

1 Hanʉ gayo gaahitirɨ, Yɨɨsu akahwarʉkɨra naatu abhɨɨga bhaazɨ rusizʉ wɨ ɨnyanza ya Tibhɨɨriya.*21:1 Ɨnyanza ya Tibhɨɨriya, ni-riina ɨrɨndɨ ryɨ ɨnyanza ya Gariraaya. 2 Bhaareho Simʉʉni Peetero, Tomaaso wʉnʉ iriina ryazɨ ɨrɨndɨ nɨ-Mbasa, Natanaɨri wa Kana ya Gariraaya, abhaana bhabhɨrɨ bha Zebhedaayo*21:2 Abhaana bhabhɨrɨ bha Zebhedaayo, bhaarɨ nɨ-Yaakobho na Yoohana. Rora Mataayo 10:2. na abhɨɨga abhandɨ bhabhɨrɨ.

3 Simʉʉni Peetero akabhʉʉrɨra abhakɨndichazɨ, "Nɨraja mʉnyanza kuwesena ziiswɨ."

Ebho bhakamʉgarukirya, "Na niitwɨ tʉraja hamwɨmwɨ na naawɨ." Mmbe bhakaja, bhakatiira mubhwatʉ, bhakawesena ubhutikʉ nyangima, nawe bhatabhwɨnɨ ziiswɨ.

4 Ritabhʉʉri, Yɨɨsu akiimɨɨrɨra rusizʉ wɨ ɨnyanza, nawe abhɨɨga bhaazɨ bhataamɨnyirɨ kʉbha nɨ-Yɨɨsu. 5 Yɨɨsu akabhabhɨrɨkɨra, "Bhasaani bhaanɨ, nangʉ, mubhwɨnɨ ziiswɨ zʉzʉʉsi?"

Ebho bhakamʉgarukirya "Zɨyi."

6 Yɨɨsu akabhabhʉʉrɨra, "Mʉtaashɨ enzero ʉrʉbhaara rwu ubhuryʉ rwu ubhwatʉ, mʉrabhona ziiswɨ." Mmbe, bhakataasha enzero mʉnyanza, nawe bhakatamwa kuyiruta kʉ kʉbha bhakabhona ziiswɨ nzaru bhʉkʉngʼu.

7 Umwɨga wʉnʉ Yɨɨsu aasɨɨgirɨ bhʉkʉngʼu, akabhʉʉrɨra Peetero, "Nɨ-Mʉkʉrʉ!" Hanʉ Simʉʉni Peetero igwirɨ kʉbha nɨ-Mʉkʉrʉ, akiibhoha engebho yaazɨ yɨnʉ aaruushiryɨ hanʉ aatangirɨ kuwesena, akiirekera mʉnyanza. 8 Abhɨɨga abhandɨ bhakaja rusizʉ wɨ ɨnyanza nu ubhwatʉ, kʉ kʉbha bhataarɨ kore, nawe bhaarɨ matambʉka igana rɨmwɨbhu. Bhakaruta enzero yɨnʉ yiizwirɨ ziiswɨ.

9 Hanʉ bhaahikirɨ rusizʉ wɨ ɨnyanza, bhakarora ʉmʉkaatɨ na rinota ryo omorero rɨnʉ ziiswɨ zaarɨ zɨrakarwaku.

10 Yɨɨsu akabhʉʉrɨra abhɨɨga bhaazɨ, "Muuzɨ, moreete hanʉ ziiswɨ obhorebhe zɨnʉ mʉwɨsɨnirɨ."

11 Mmbe Simʉʉni Peetero akasikɨra mubhwatʉ, akaruta enzero yɨnʉ yiizwirɨ ziiswɨ. Monzero yiyo zaarɨmu ziiswɨ zɨkʉrʉ igana rɨmwɨ merongo ɨtaanʉ ni isatʉ. Nangabha zaarɨmu ziiswɨ nzaru bhʉkʉngʼu, enzero ɨtaatarandukirɨ.