Mateus 21

Yɨɨsu arasʉngʼaanwa Yɨrusarɨɨmu ncha Masiya

1 Hanʉ Yɨɨsu na abhɨɨga bhaazɨ bhiisɨmɨɨrɨ Yɨrusarɨɨmu, bhakahika mʉrʉbhɨri rwa Bhɨtifagɨ kʉkɨgʉrʉ chɨ Ɨmɨzɨyituuni. Neho Yɨɨsu akatʉma abhɨɨga bhaazɨ bhabhɨrɨ, akabhabhʉʉrɨra, 2 "Mujɨ mʉrʉbhɨri rʉnʉ rore embere waanyu. Hanʉ mukusikɨramu, mʉrarora ɨtɨkɨrɨ nu umwana wayʉ zɨbhʉhirwɨ. Mʉzɨtazʉrɨ, mondeetere hanʉ. 3 Nʉ ʉmʉʉtʉ wʉwʉʉsi araabhabhuuryɨ, mʉmʉgarukiryɨ, ‘Ʉmʉkʉrʉ arazeenda,’ hayohayo wʉʉsi arabhiisiririrya muuzɨ nazʉ."

4 Gayo gaakʉriibhwɨ, korereke gabhɨ amangʼana ganʉ Mungu aagambirɨ kʉhɨtɨra ʉmʉrʉʉtɨrɨri waazɨ,

5 "Ʉbhʉʉrɨrɨ abhaatʉ bha Sayuuni,*21:5a Sayuuni ni-riina ɨrɨndɨ rya Yɨrusarɨɨmu.

‘Rora, ʉmʉtɨmi waanyu araaza kwa niimwɨ,

nɨ-mʉnyʉʉhu,

araaza iikɨɨrɨ kʉtɨkɨrɨ,

nɨ ɨkɨmʉʉri chayʉ.’ "*21:5b Rora Zaakariya 9:9.

6 Mmbe, abhɨɨga bhaazɨ bhakaja, bhakakora chɨmbu Yɨɨsu aabhatumirɨ. 7 Hanʉ bhaagarukirɨ kwa Yɨɨsu nɨ ɨtɨkɨrɨ yirya nu umwana wayʉ, bhakaara zengebho igʉrʉ waazɨ, na Yɨɨsu akiikara igʉrʉ wayʉ. 8 Abhaatʉ bhaaru kwiribhita riyo, bhakaara zengebho zaabhʉ kʉnzɨra. Abhandɨ bhakatɨna ibhisha bhyɨ ɨmɨtɨ na kwara kʉnzɨra igʉrʉ wʉ ʉkʉsʉʉka Yɨɨsu. 9 Abhaatʉ bhanʉ bhaakangatirɨ embere na bhanʉ bhaarɨ inyuma, bhakatiirya riraka bharabhuga,

"Akumibhwɨ Umwana wʉ ʉmʉtɨmi Daudi!

Anʉ ʉrʉbhangʉ wʉnʉ akuuza kuriina ryʉ Ʉmʉkʉrʉ!*21:9 Rora Zabhuri 118:26.

Akumibhwɨ Mungu wa mwisaarʉ!"

10 Hanʉ Yɨɨsu aasikiirɨ mʉrʉbhɨri rwa Yɨrusarɨɨmu, ʉrʉbhɨri rwʉsi rukiitiimaata. Abhaatʉ bhakiibhuurya, "Nɨ-wɨɨwɨ wuyo?"

11 Abhaatʉ kwiribhita riyo bhakagarukirya, "Wʉnʉ nɨ-Yɨɨsu! Nɨ-mʉrʉʉtɨrɨri wa Nazarɨɨti mucharʉ cha Gariraaya!"