मार्क 3

शब्बाथ दिवशी हात वाळलेल्या मनुष्यास बरे करणे

1 मग येशू पुन्हा एका सभास्थानात गेला, तेथे वाळलेल्या हाताचा एक मनुष्य होता. 2 येशूवर आरोप करण्यासाठी कारण मिळावे म्हणून तो शब्बाथ दिवशी त्या मनुष्यास बरे करतो की काय हे पाहण्यासाठी ते त्याच्यावर बारकाईने नजर ठेवून होते. 3 येशू वाळलेल्या हाताच्या मनुष्यास म्हणाला, "ऊठ आणि लोकांच्या समोर उभा राहा." 4 नंतर तो त्यांना म्हणाला, "शब्बाथ दिवशी चांगले करणे किंवा वाईट करणे, जीव वाचवणे किंवा जीवे मारणे यांतील कोणते योग्य आहे?" पण ते गप्प राहीले. 5 मग त्याने त्यांच्या मनाच्या कठीणपणामुळे खिन्न होऊन त्या सर्वांकडे रागाने पहिले व त्या मनुष्यास म्हणाला, "तुझा हात लांब कर," त्याने हात लांब केला आणि तो बरा झाला.