मत्तय 15

एक परराष्ट्रीय भूतग्रस्त मुलगी

21 नंतर येशू तेथून निघून सोर व सिदोनाच्या भागात गेला. 22 तेव्हा एक कनानी स्त्री त्या भागातून येशूकडे आली. ती स्त्री ओरडून म्हणाली, "प्रभू, दाविदाच्या पुत्रा, माझ्यावर दया करा. माझी मुलगी भूताने फार पिडलेली आहे." 23 पण येशूने तिला एका शब्दानेही उत्तर दिले नाही, तेव्हा त्याच्या शिष्यांनी येऊन त्यास विनंती केली, "तिला पाठवून द्या, कारण ती आमच्या मागे ओरडत येत आहे." 24 पण येशूने उत्तर दिले, "मला देवाने फक्त इस्राएलाच्या हरवलेल्या मेंढरांकडे पाठवले आहे." 25 मग ती स्त्री पुन्हा येशूकडे आली, ती येशूच्या पाया पडली व म्हणाली, "प्रभूजी, मला मदत करा." 26 परंतु त्याने म्हटले, "मुलाची भाकर घेऊन कुत्र्यास टाकणे योग्य नाही." 27 ती स्त्री म्हणाली, "होय प्रभूजी, परंतु तरीही कुत्रीही आपल्या धन्याच्या मेजावरून पडलेला चूरा खातात." 28 तेव्हा येशूने तिला उत्तर दिले, "मुली, तुझा विश्वास मोठा आहे. तुझ्या इच्छेप्रमाणे तुला प्राप्त होवो." आणि त्याचवेळी तिची मुलगी बरी झाली.