మార్కు రాసిన సువార్త 3

చెయ్యి చచ్చుబడిన వాణ్ణి బాగు చెయ్యడం

1 యేసు మరోసారి సమాజమందిరంలో ప్రవేశించాడు. అక్కడ చెయ్యి చచ్చుబడిపోయిన వాడొకడు ఉన్నాడు. 2 అక్కడివారు ఆయన మీద నేరం మోపే ఉద్దేశంతో, యేసు విశ్రాంతి దినాన ఆ మనిషిని బాగుచేస్తాడేమో అని జాగ్రత్తగా గమనిస్తున్నారు. 3 యేసు ఆ చెయ్యి చచ్చుబడిపోయిన వాడితో, "ఇటు వచ్చి అందరి ముందూ నిలబడు" అన్నాడు. 4 అప్పుడు ఆయన వారితో, "విశ్రాంతి దినాన మేలు చేయడం ధర్మమా? కీడు చేయడమా? ప్రాణాన్ని రక్షించడం ధర్మమా? చంపడమా?" అని అన్నాడు. అందుకు వారు ఏ జవాబూ చెప్పలేదు.

5 వారి కఠిన హృదయాలను బట్టి ఆయన నొచ్చుకుని, కోపంతో రగిలిపోతూ అందరి వైపూ చూశాడు. ఆ చెయ్యి చచ్చుబడిపోయిన వాడితో, "నీ చెయ్యి చాపు" అనగానే వాడు చెయ్యి చాపాడు. వెంటనే అతని చెయ్యి పూర్తిగా బాగైపోయింది.