మత్తయి రాసిన సువార్త 3

బాప్తిసమిచ్చే యోహాను పరిచర్య

1,2 ఆ రోజుల్లో బాప్తిసమిచ్చే యోహాను వచ్చి యూదయ అరణ్యంలో "పరలోక రాజ్యం దగ్గర పడింది. పశ్చాత్తాప పడండి" అని బోధిస్తూ ఉన్నాడు. 3 పూర్వం యెషయా ప్రవక్త,

అరణ్యంలో ఒకడి స్వరం ఇలా బిగ్గరగా పిలుస్తూ ఉంది.

ప్రభువు కోసం దారి సిద్ధం చేయండి.

ఆయన దారులు తిన్నగా చేయండి,

అని చెప్పింది ఇతని గురించే.

4 ఈ యోహాను ఒంటె వెంట్రుకలతో నేసిన బట్టలూ నడుముకు తోలు నడికట్టు కట్టుకునేవాడు. అతని ఆహారం మిడతలు, అడవి తేనె. 5 యెరూషలేము, యూదయ ప్రాంతం, యొర్దాను నదీ ప్రాంతాల వారంతా అతని దగ్గరికి వచ్చి, 6 తమ పాపాలు ఒప్పుకొంటూ యొర్దాను నదిలో అతని చేత బాప్తిసం పొందుతూ ఉన్నారు.